குறுகிய காலத்தில் பணத்தை இரட்டிப்பாக்க வேண்டும் என்ற ஆசை பலருக்கும் உள்ளது. அதே நேரத்தில், முதலீட்டில் எந்தவிதமான ஆபத்தும் இருக்கக் கூடாது என்பதும் முதலீட்டாளர்களின் முக்கிய எதிர்பார்ப்பாக உள்ளது. இந்த நிலையில், அரசு நிறுவனங்கள் பாதுகாப்பான முதலீட்டு திட்டங்களை தொடர்ந்து அறிமுகப்படுத்தி வருகின்றன. அவற்றில் தபால் அலுவலக முதலீட்டு திட்டங்கள் முதலீட்டாளர்களின் கவனத்தை அதிகம் ஈர்த்து வருகின்றன.
அத்தகைய திட்டங்களில் முக்கியமான ஒன்றாக தபால் அலுவலக நிலையான வைப்பு (Post Office Fixed Deposit) திட்டம் கருதப்படுகிறது. ஒரே நேரத்தில் அதிக தொகையை சேமித்து, நீண்டகாலத்தில் நல்ல வருமானம் பெற விரும்புவோருக்கு இந்தத் திட்டம் ஏற்றதாக உள்ளது. இந்தத் திட்டத்தின் கீழ், ரூ.5 லட்சம் முதலீடு செய்தால், அதை குறிப்பிட்ட கால இடைவெளியில் மீண்டும் மீண்டும் புதுப்பித்து 15 ஆண்டுகள் வரை தொடர முடியும்.
முதலீட்டாளர்கள் ரூ.5,00,000 தொகையை முதலில் 5 ஆண்டுகளுக்கான தபால் அலுவலக நிலையான வைப்பாக செலுத்த வேண்டும். 5 ஆண்டுகள் முடிந்ததும், அதையே மீண்டும் 5 ஆண்டுகளுக்கு நீட்டிக்கலாம். இதேபோல் இரு முறை நீட்டித்தால், மொத்த முதலீட்டு காலம் 15 ஆண்டுகளாகும். இந்த முறையில், வட்டி தொகையுடன் சேர்ந்து முதலீட்டுத் தொகை காலப்போக்கில் அதிகரித்து, ரூ.15 லட்சம் வரை செல்வதாக கூறப்படுகிறது.
இருப்பினும், இந்த வருமானம் அப்போது நிலவும் வட்டி விகிதத்தைப் பொறுத்தது என்பது குறிப்பிடத்தக்கது. வங்கிகளைப் போலவே, தபால் அலுவலக நிலையான வைப்பு திட்டத்திற்கும் வட்டி விகிதம் காலகாலமாக மாற்றப்படும். இருப்பினும், அரசு உத்தரவாதம் இருப்பதால், இந்தத் திட்டம் ஆபத்து இல்லாத முதலீடாக கருதப்படுகிறது. பாதுகாப்பான சேமிப்புடன், நீண்டகால வருமானம் தேடும் முதலீட்டாளர்களுக்கு இந்தத் திட்டம் ஒரு நல்ல தேர்வாக பார்க்கப்படுகிறது.
