தமிழக அரசியல் களத்தில் 2026 சட்டமன்ற தேர்தலுக்கான வியூகங்கள் வகுக்கப்பட்டு வரும் வேளையில், அதிமுக-வின் உட்கட்சி விவகாரங்கள் மீண்டும் புதிய திருப்பத்தை எட்டியுள்ளன. குறிப்பாக, பிரிந்து கிடக்கும் நிர்வாகிகளை ஒன்றிணைக்கும் நோக்கில் முன்னாள் அமைச்சர் செங்கோட்டையன் முன்னெடுத்து வரும் சமரச முயற்சிகள் அரசியல் வட்டாரத்தில் பெரும் விவாதத்தை கிளப்பியுள்ளன.
தென் மாவட்ட வாக்கு வங்கியை தக்கவைக்கவும், அதிமுக-வை பலமான சக்தியாக உருவெடுக்க வைக்கவும் ஒன்றிணைந்தால் மட்டுமே வெற்றி என்ற தாரக மந்திரத்தை மூத்த தலைவர்கள் முன்வைக்க தொடங்கியுள்ளனர். இது ஓரங்கட்டப்பட்டுள்ள ஓ. பன்னீர்செல்வத்திற்கு விடுக்கப்பட்ட மறைமுக அழைப்பாகவே பார்க்கப்படுகிறது.
மத்திய அமைச்சர் அமித்ஷா உடனான சந்திப்புக்கு பிறகு, ஓபிஎஸ் மற்றும் சசிகலாவுக்கு கட்சியில் இடமில்லை என்பதில் எடப்பாடி பழனிசாமி தரப்பு உறுதியாக இருந்தது. இதனால் அதிருப்தியில் இருந்த ஓபிஎஸ், அடுத்து திமுக அல்லது தமிழக வெற்றிக் கழகம் என எந்தப் பக்கம் செல்வது என்ற குழப்பத்தில் இருந்து வந்தார். இந்த சூழலில் தான், தவெக-வில் இணைந்துள்ள செங்கோட்டையன், ஓபிஎஸ்-ஸை தொடர்பு கொண்டு ஒரு மெகா டீல் பேசியதாக கூறப்படுகிறது.
தவெக-வில் இணைந்தால் அவருக்கு தெற்கு மண்டல பொறுப்பாளர் பதவி பெற்றுத் தரப்படும் என செங்கோட்டையன் தூதுவிட்டதாகவும், அதற்கு ஓபிஎஸ் தரப்பு வரும் தை 1-ஆம் தேதி தனது இறுதி முடிவை அறிவிப்பதாக கூறியுள்ளதாகவும் அரசியல் நகர்வுகள் தெரிவிக்கின்றன. இருப்பினும், இந்த அரசியல் தூண்டிலில் ஓபிஎஸ் சிக்குவாரா என்பது இன்னும் விடைதெரியாத கேள்வியாகவே உள்ளது. ஏற்கனவே பல சட்டப் போராட்டங்களையும், அரசியல் ஏமாற்றங்களையும் சந்தித்துள்ள ஓபிஎஸ், வெறும் பெயரளவு பதவியை ஏற்றுக்கொண்டு மற்றொரு கட்சியில் இணைய விரும்புவாரா என்பது சந்தேகமே. கௌரவமான அதிகாரப் பகிர்வு மற்றும் கட்சியில் தனக்கான உரிய அந்தஸ்து உறுதி செய்யப்பட்டால் மட்டுமே அவர் தனது அடுத்தகட்ட நகர்வைத் தீர்மானிப்பார் என அவரது ஆதரவாளர்கள் கருதுகின்றனர்.
செங்கோட்டையனின் இந்த தூது முயற்சி வெற்றியடைந்து ஓபிஎஸ் தவெக-வை நோக்கி பயணிப்பாரா அல்லது அதிமுக-விலேயே மீண்டும் இணைய ஏதேனும் கதவுகள் திறக்கப்படுமா என்பது சஸ்பென்ஸாக நீடிக்கிறது.
Read More : FLASH | அடங்காத இலங்கை கடற்படை..!! தமிழக மீனவர்கள் 8 பேர் அதிரடி கைது..!! மீண்டும் பதற்றம்..!!
