சர்க்கரை நோய், உயர் இரத்த அழுத்தம் (BP) மற்றும் கொலஸ்ட்ரால் ஆகியவற்றால் அவதிப்பட்டு, வாழ்நாள் முழுவதும் மாத்திரைகளையே நம்பி வாழ்பவர்கள் நம் வீடுகளில் அதிகம் உள்ளனர். வெறும் மருந்துகளால் மட்டுமல்லாமல், சரியான உணவு மற்றும் வாழ்க்கை முறைப் பழக்கங்களால் மட்டுமே இந்தப் பிரச்சனைகளை முழுமையாகக் கட்டுப்படுத்த முடியும். நம் முன்னோர்கள் பின்பற்றியது போல, இந்த மூன்று நோய்களுக்கும் சேர்த்துத் தீர்வு தரும் ஓர் அற்புத வீட்டு வைத்தியம் பற்றி இங்கே காணலாம்.
கொத்தமல்லி விதையின் பலன்கள் :
சமையலில் சுவைக்காகவும், வாசனைக்காகவும் பயன்படுத்தப்படும் கொத்தமல்லி விதை, வெறும் சமையல் பொருள் மட்டுமல்ல; நம் முன்னோர்கள் இதனைப் பல நோய்களுக்கு மருந்தாகவும் பயன்படுத்தி வந்துள்ளனர். குறிப்பாக, ஹார்மோன் சமநிலையின்மை, தைராய்டு பிரச்சனைகள், பித்தம் அதிகரிப்பதால் ஏற்படும் தொந்தரவுகள் மற்றும் தொப்பை/ஊளைச்சதை குறைப்பு ஆகியவற்றுக்கும் கொத்தமல்லி விதை மிகச் சிறந்த தீர்வாகச் சொல்லப்படுகிறது.
ரத்த அழுத்தம் (BP) கட்டுப்பாடு :
உயர் இரத்த அழுத்தத்தை கட்டுப்படுத்துவதில் கொத்தமல்லி விதைக்கு மிக முக்கியப் பங்கு உண்டு. கொத்தமல்லி விதையில் உள்ள டையூரிடிக் பண்புகள், உடலில் உள்ள அதிகப்படியான சோடியத்தை வெளியேற்ற உதவுகிறது. இதில் உள்ள கால்சியம் மற்றும் இரும்புச் சத்து இரத்த நாளங்களில் ஏற்படும் அழுத்தத்தைக் குறைத்து, இரத்த அழுத்தத்தை நிலையாக வைத்திருக்க உதவுகிறது. இதன் மூலம் இதயம் சார்ந்த அபாயங்கள் குறைகின்றன.
கெட்ட கொழுப்பை குறைக்கும் சக்தி : கொத்தமல்லி விதைகளில் நிறைந்திருக்கும் ஆன்ட்டி ஆக்ஸிடென்ட்கள், வைட்டமின்கள் மற்றும் மினரல்கள், இரத்தத்தில் உள்ள கெட்ட கொலஸ்ட்ரால் எனப்படும் LDL-ஐ கட்டுப்படுத்த உதவுகிறது. அதேசமயம், இது நல்ல கொழுப்பான HDL-ஐ அதிகரிக்கவும் துணை புரிகிறது. இதன் விளைவாக, மாரடைப்பு, பெருந்தமணியில் ஏற்படும் தடிப்பு மற்றும் பிற இதய நோய்களுக்கான அபாயம் பெருமளவில் குறைகிறது.
சர்க்கரை நோய்க்கு சிறந்தது : நீரிழிவு நோயாளிகள் தொடர்ந்து என்ன சாப்பிட்டால் இரத்த சர்க்கரை அளவைக் கட்டுக்குள் கொண்டு வர முடியும் என்று தேடிக் கொண்டிருக்கும் நிலையில், நம் முன்னோர்கள் காலங்காலமாக கொத்தமல்லி விதையைத்தான் பயன்படுத்தி வந்துள்ளனர்.
கொத்தமல்லி விதை இன்சுலின் சென்சிட்டிவிட்டியை அதிகரிப்பதில் மிக முக்கியப் பங்கு வகிக்கிறது. நீரிழிவு நோயாளிகள் தொடர்ந்து கொத்தமல்லி விதைத் தண்ணீரை (இரவில் ஊறவைத்து காலையில் குடிப்பது) எடுத்து வரும்பொழுது, இரத்த சர்க்கரை அளவு பெருமளவில் கட்டுக்குள் வருவதாக கூறப்படுகிறது.
