நாம் வாழும் பூமியில் நீர் மிகவும் இன்றியமையாத ஒன்றாகும். மனிதர்கள் உயிர் வாழ்வதற்கு உணவு மற்றும் தண்ணீர்தான் அடிப்படைத் தேவைகளாகும். பூமி முழுவதும் தண்ணீரால் சூழப்பட்டுள்ளது என்பது தெரிந்த விஷயம் என்றாலும், சில நாடுகள் தங்கள் நிலப்பரப்பில் நிரந்தரமான ஆறுகளே இல்லாமல் இருப்பது பலருக்கும் ஆச்சரியம் அளிக்கிறது. இந்த நாடுகள் எவை, மேலும் தங்கள் நீர்த் தேவையை அவை எப்படி பூர்த்தி செய்கின்றன என்பதை பற்றிப் பார்ப்போம்.
ஓர் ஆறு உருவாக வேண்டுமென்றால், ஒரு பகுதியில் தொடர்ந்து மழை பெய்ய வேண்டும் அல்லது மலைகளில் பனி உருக வேண்டும். இவை இரண்டும் இல்லாதபோது, மழைக்காலங்களில் தற்காலிகமாக ஓடும் நீர்வழிகள் நிரந்தர ஆறுகளாக மாறுவதற்கு முன்பே வறண்டு போகின்றன. இந்த நிலைமை பொதுவாக இரண்டு இடங்களில் காணப்படுகிறது:
பாலைவன நாடுகள்: இங்கு மழைப்பொழிவு மிகக் குறைவாகவும், வெப்பநிலை மிக அதிகமாகவும் இருப்பதால், விழும் நீர் கூட வேகமாக ஆவியாகிவிடுகிறது.
சிறிய தீவு நாடுகள்: இவற்றின் நிலப்பரப்பு மிகவும் சிறியதாக இருப்பதால், ஆறுகள் உருவாவதற்குக் காரணமான பெரிய நீர்ப்பிடிப்புப் பகுதிகள் இவற்றில் இல்லை.
இதனால்தான், இந்த நாடுகள் பொதுவாக நிலத்தடி நீரை, அவ்வப்போது உண்டாகும் தற்காலிக நீரோடைகளை, இறக்குமதி செய்யப்படும் நீரை, மற்றும் கடல் நீரை நன்னீராக மாற்றும் உப்புநீக்கும் ஆலைகளை (Desalination Plants) பெரிதும் நம்பியிருக்கின்றன.
ஆறுகள் இல்லாத நாடுகளுக்கு அரேபிய தீபகற்ப நாடுகள் மிகச் சிறந்த உதாரணங்கள். இங்கு எங்கு பார்த்தாலும் பரந்த பாலைவனங்கள் மட்டுமே தென்படும். ஆறுகள் இல்லாத நாடுகளில் மிகப் பெரியது சவுதி அரேபியா. இந்த நாடு தனது கடற்கரைப் பகுதிகளில் மிகப் பெரிய உப்புநீக்கும் ஆலைகளை நிறுவியுள்ளது. நாட்டின் குடிநீரில் பாதியளவுக்கும் மேல், கடல் நீரைச் சுத்திகரிப்பதன் மூலம்தான் பெறப்படுகிறது.
குவைத், கத்தார், ஐக்கிய அரபு எமிரேட்ஸ் (UAE), ஓமன், பஹ்ரைன், மற்றும் ஏமன் போன்ற அண்டை நாடுகளிலும் இதே நிலைதான் நீடிக்கிறது. ஓமன் மற்றும் ஐக்கிய அரபு எமிரேட்ஸ் போன்ற நாடுகளில், கனமழை பெய்யும்போது தற்காலிகமாக உருவாகும் நதி ஓடைகள் ‘வாடிஸ்’ என்று அழைக்கப்படுகின்றன. இந்த நீர் சிறிது நேரம் ஓடி, பின்னர் மணல் மண்ணில் உறிஞ்சப்படுகிறது.
மாலத்தீவுகள்: மிகவும் தாழ்வான தீவுக் குழுமம் என்பதால், இங்கு ஆறுகள் உருவாக வாய்ப்பில்லை. இவர்கள் பெரும்பாலும் மழைநீரைச் சேகரித்துச் சேமிப்பதையே முழுமையாக நம்பியுள்ளனர்.
மால்டா மற்றும் பஹாமாஸ்: இந்த நாடுகள் நிலத்தடியில் சுண்ணாம்பு அடுக்குகளில் சேமிக்கப்படும் நன்னீர் இருப்புகளை (நீர்நிலைகள்) நம்பியுள்ளன. பசிபிக் தீவுகளான கிரிபட்டி, துவாலு, மற்றும் நௌரு போன்ற நாடுகளிலும் இதே நிலைதான்.
ஆறுகள் இல்லாததால் இந்த நாடுகள் வளர்ச்சியில் பின்தங்கிவிடவில்லை. மாறாக, தங்கள் சூழ்நிலைகள் புதிய தொழில்நுட்பங்களை கண்டறிய அவர்களைத் தூண்டின. சவுதி அரேபியா மற்றும் ஐக்கிய அரபு எமிரேட்ஸ் போன்ற பணக்கார நாடுகள், கடல் நீரை நன்னீராக மாற்றும் தொழில்நுட்பத்தில் உலகிற்கு ஒரு முன்னோடியாகத் திகழ்கின்றன. அவர்கள் நீரைச் சேமிப்பது, கழிவுநீரைச் சுத்திகரித்து மறுபயன்பாடு செய்வது, மற்றும் உணவு, தண்ணீரை இறக்குமதி செய்வது போன்ற பல வழிகளில் தங்கள் மக்களின் தேவைகளைப் பூர்த்தி செய்கிறார்கள்.
நிரந்தர ஆறுகள் இல்லாத நாடுகள்: சவுதி அரேபியா, குவைத், ஐக்கிய அரபு எமிரேட்ஸ், கத்தார், பஹ்ரைன், ஓமன், ஏமன், லிபியா, ஜிபூட்டி, மாலத்தீவுகள், மால்டா, மொனாக்கோ, வாடிகன் நகரம், நௌரு, கிரிபட்டி, துவாலு, மார்ஷல் தீவுகள் மற்றும் டோங்கா ஆகிய நாடுகள் குறிப்பிடத்தக்கவை.
Read More : மதுரையில் மறைந்திருக்கும் பஞ்சபூத ரகசியம்.. பலருக்கும் தெரியாத சிவனின் 5 அதிசய தலங்கள்..!
