தமிழக திரைத்துறையின் தவிர்க்க முடியாத ஆளுமையாகவும், கருணை மிக்க அரசியல் தலைவராகவும் விளங்கிய ‘கேப்டன்’ விஜயகாந்த் அவர்களின் இரண்டாம் ஆண்டு நினைவு தினம் இன்று (டிசம்பர் 28) அனுசரிக்கப்படுகிறது. கடந்த 2023-ம் ஆண்டு இதே நாளில் நம்மை விட்டு பிரிந்த அவரது வாழ்வு, சாதிக்கத் துடிக்கும் ஒவ்வொரு இளைஞனுக்கும் ஒரு சிறந்த பாடமாகும்.
மதுரையில் விஜயராஜாக பிறந்து, சென்னையில் விஜயகாந்தாக உருவெடுத்து, கோடிக்கணக்கான மக்களின் இதயங்களில் ‘கேப்டனாக’ குடியேறிய அவரது நெடிய பயணத்தை இங்கே திரும்பிப் பார்ப்போம்.
1952-ம் ஆண்டு மதுரையின் திருமங்கலத்தில் அழகர்சாமி – ஆண்டாள் தம்பதிக்கு மகனாகப் பிறந்த விஜயகாந்துக்கு, சிறுவயது முதலே படிப்பை விடவும் வெள்ளித்திரை மீதே அதீத மோகம் இருந்தது. தனது கனவை துரத்தி சென்னை வந்த அவருக்கு, ஆரம்பக்காலம் சோதனையாகவே அமைந்தது. அன்றைய சினிமா உலகம் சிவந்த நிறம் கொண்டவர்களுக்கே சிவப்பு கம்பளம் விரித்த நிலையில், தனது கறுத்த நிறத்தால் பல அவமானங்களையும் நிராகரிப்புகளையும் சந்தித்தார்.
இருப்பினும், விடாமுயற்சியால் 1979-ல் ‘இனிக்கும் இளமை’ படத்தில் வில்லனாக அறிமுகமானார். 1980-ல் ‘தூரத்து இடிமுழக்கம்’ படத்தின் மூலம் நாயகனாக உயர்ந்தவர், அடுத்த ஆண்டே வெளியான ‘சட்டம் ஒரு இருட்டறை’ படத்தின் மெகா வெற்றியால் தமிழ் சினிமாவின் முன்னணி நட்சத்திரமாக மாறினார்.
திரைத்துறையில் விஜயகாந்தின் உழைப்பு அசாத்தியமானது. 1984-ம் ஆண்டில் மட்டும் ஒரே ஆண்டில் 18 படங்களில் நடித்து அவர் படைத்த சாதனை இன்று வரை முறியடிக்கப்படவில்லை. சுமார் 36 ஆண்டுகால திரைப்பயணத்தில் 150-க்கும் மேற்பட்ட படங்களில் நடித்த இவரது 100-வது படமான ‘கேப்டன் பிரபாகரன்’, அன்றைய சூப்பர் ஸ்டார்களின் வசூல் சாதனைகளையே மிஞ்சியது. அந்தப் படத்திற்குப் பிறகே ரசிகர்கள் அவரை அன்போடு ‘கேப்டன்’ என அழைக்கத் தொடங்கினர்.
நடிகராக மட்டுமல்லாமல், 1999-ல் நடிகர் சங்கத் தலைவராகப் பொறுப்பேற்ற அவர், சிங்கப்பூர் மற்றும் மலேசியாவில் கலை நிகழ்ச்சிகள் நடத்தி, கடனில் மூழ்கிக் கிடந்த சங்கத்தை மீட்டு எடுத்தார். நலிவடைந்த கலைஞர்களுக்கு ஓய்வூதியத் திட்டம் கொண்டு வந்த அவரது மனிதாபிமானம் அனைவரையும் வியக்க வைத்தது.
சினிமாவில் ஈட்டிய நற்பெயருடன் 2005-ல் ‘தேசிய முற்போக்கு திராவிட கழகம்’ (தேமுதிக) என்ற கட்சியைத் தொடங்கி அரசியலில் அதிரடியாக நுழைந்தார். 2006 தேர்தலில் தனித்துப் போட்டியிட்டுத் தமிழக அரசியலில் ஒரு மாற்றாக உருவெடுத்தார். பின்னர் 2011-ம் ஆண்டு அதிமுக-வுடன் கூட்டணி அமைத்து 29 தொகுதிகளில் வெற்றி பெற்று, தமிழக சட்டமன்றத்தின் எதிர்க்கட்சித் தலைவர் என்ற அந்தஸ்தை எட்டிப் பிடித்தார். ஒரு நடிகராக வந்து மிகக்குறுகிய காலத்தில் பிரதான எதிர்க்கட்சி தலைவராக உயர்ந்தது இந்திய அரசியலில் ஒரு அரிதான நிகழ்வாகும். பிற்காலத்தில் ஏற்பட்ட அரசியல் மாற்றங்கள் மற்றும் உடல்நலக் குறைவு காரணமாகத் தீவிர அரசியலில் இருந்து விலகியிருந்த அவர், கடந்த 2023-ம் ஆண்டு இயற்கை எய்தினார்.
கலைத்துறைக்கும் சமூகத்திற்கும் அவர் ஆற்றிய தொண்டினைப் பாராட்டி தமிழக அரசின் எம்.ஜி.ஆர் விருது, கலைமாமணி விருது என பல கௌரவங்கள் அவரை தேடி வந்தன. அவரது மறைவிற்குப் பிறகு, கடந்த 2024-ம் ஆண்டு இந்திய அரசு அவருக்கு உயரிய ‘பத்ம பூஷன்’ விருது வழங்கிச் சிறப்பித்தது. ஏழை எளியவர்களுக்கு வாரி வழங்கும் வள்ளலாகவும், அனைவரையும் சமமாக மதிக்கும் மனித நேயராகவும் வாழ்ந்த விஜயகாந்தின் புகழ், அவர் மறைந்தாலும் அவர் செய்த தர்மங்களின் மூலமும், தத்ரூபமான நடிப்பின் மூலமும் என்றென்றும் நிலைத்திருக்கும்.
Read More : பெண்களுக்கு ஜாக்பாட்..!! மகளிர் உரிமைத்தொகை பணம் எப்போது உயரும்..? வெளியான செம குட் நியூஸ்..!!
