இயற்கை தந்த வரப்பிரசாதமான வாழைப்பழங்கள் ஒரு காலத்தில் தூய்மையான உணவாக கருதப்பட்டன. ஆனால், இன்றைய வணிக உலகில் லாபத்தை மட்டுமே நோக்கமாகக் கொண்டு, வாழைப்பழங்கள் ரசாயனங்கள் கலந்த நஞ்சாக மாற்றப்படுவது வேதனையளிக்கும் விஷயமாக மாறியுள்ளது. மரத்தில் காயாக இருக்கும்போது அவை மெதுவாக ‘எத்திலீன்’ வாயுவை வெளியிட்டு இயற்கையாக பழுக்க நீண்ட காலம் எடுத்துக்கொள்ளும். இந்தத் தாமதத்தை தவிர்க்க, வியாபாரிகள் ‘கால்சியம் கார்பைடு’ போன்ற ஆபத்தான ரசாயனங்களை பயன்படுத்துகின்றனர். இந்த ரசாயனம் ஈரப்பதத்துடன் சேரும்போது ‘அசிட்டிலீன்’ வாயுவை வெளியிட்டு, பழத்தின் உட்பகுதியை விட வெளிப்புற தோலை மட்டும் இரண்டு நாட்களில் மஞ்சள் நிறமாக மாற்றிவிடுகிறது.
ரசாயனங்கள் மூலம் பழுக்க வைக்கப்பட்ட வாழைப்பழங்களை அடையாளம் காண்பது கடினமான ஒன்றல்ல. இயற்கையாக பழுத்த பழங்கள் ஒருவித இனிமையான நறுமணத்தை கொண்டிருக்கும். மாறாக, ரசாயனப் பழங்கள் எவ்வித வாசனையும் இன்றியோ அல்லது லேசான ரசாயன நெடியுடனோ இருக்கும். முக்கியமாக, இயற்கைப் பழங்கள் முழுவதும் ஒரே சீரான மஞ்சள் நிறத்தில் இருக்காது. அவற்றில் அங்கொன்றும் இங்கொன்றுமாகப் பழுப்பு நிறப் புள்ளிகள் காணப்படும்.
ஆனால், கால்சியம் கார்பைடு பயன்படுத்தப்பட்ட பழங்கள் பார்ப்பதற்கு பிளாஸ்டிக் பொம்மை போலவும், கண்ணைப் பறிக்கும் நியான் மஞ்சள் நிறத்திலும் பளபளப்பாக காட்சியளிக்கும். பழத்தின் தோல் மஞ்சளாக இருந்தாலும், காம்பு மட்டும் பச்சையாக இருந்தால் அது ரசாயனத்தால் பழுத்தது என்பதை உறுதி செய்யலாம்.
உடல்நலத்தைப் பொறுத்தவரை, இத்தகைய செயற்கைப் பழங்கள் செரிமான மண்டலத்தை நிலைகுலைய செய்கின்றன. இவற்றைச் சாப்பிடும்போது தொண்டை எரிச்சல், அமிலத்தன்மை (Acidity) மற்றும் வயிறு தொடர்பான உபாதைகள் ஏற்பட வாய்ப்புள்ளது. குறிப்பாக வெறும் வயிற்றில் இத்தகைய பழங்களை உட்கொள்வது நரம்பு மண்டலத்தை சீரழிக்கும் என மருத்துவர்கள் எச்சரிக்கின்றனர். ரசாயனப் பழங்களின் உட்பகுதி சரியாகப் பழுக்காமல் கடினமாகவும், சுவையற்றதாகவும் இருக்கும். எனவே, சந்தையில் மிகவும் அழகாகவும் பளபளப்பாகவும் இருக்கும் பழங்களைத் தவிர்த்து, ஓரளவு காயாக வாங்கி வீட்டிலேயே இயற்கையாகப் பழுக்க வைப்பது அல்லது உள்ளூர் விவசாயிகளிடம் நேரடியாக வாங்குவதே ஆரோக்கியத்திற்கு உகந்தது.
