ஏமனில் கிட்டத்தட்ட ஐந்து மில்லியன் மக்கள் பசியால் வாடும் அபாயம் இருப்பதாக ஐக்கிய நாடுகள் சபை எச்சரித்துள்ளது.
ஏமனின் தெற்கு மாகாணங்களில் கிட்டத்தட்ட 5 மில்லியன் மக்கள் உணவுப் பாதுகாப்பின்மையை எதிர்கொள்வதாகவும், அவசரத் தலையீடு இல்லாவிட்டால் நிலைமைகள் மேலும் மோசமடையும் என்றும் 3 ஐக்கிய நாடுகள் சபை நிறுவனங்கள் எச்சரித்துள்ளன. உணவு மற்றும் வேளாண்மை அமைப்பு (FAO), உலக உணவுத் திட்டம் (WFP) மற்றும் ஐக்கிய நாடுகளின் குழந்தைகள் நிதியம் (UNICEF) ஆகியவை இணைந்து வெளியிட்ட அறிக்கையில், உடனடி மற்றும் நீடித்த உதவி இல்லாமல், கூடுதலாக 4,20,000 பேர் செப்டம்பர் மற்றும் பிப்ரவரி 2026 க்கு இடையில் கடுமையான உணவுப் பாதுகாப்பின்மைக்குள் விழக்கூடும் என்று கூறியுள்ளதாக சின்ஹுவா செய்தி நிறுவனம் தெரிவித்துள்ளது.
இது கடுமையான உணவுப் பாதுகாப்பின்மையால் பாதிக்கப்பட்ட மக்களின் மொத்த எண்ணிக்கையை 5.38 மில்லியனாகக் கொண்டுவரும். இது ஏமனின் தெற்குப் பகுதிகளில் உள்ள மக்கள்தொகையில் பாதிக்கும் மேலானது. நீடித்த பொருளாதார சரிவு, நாணயத்தின் மதிப்பு வீழ்ச்சி, தொடர்ச்சியான மோதல்கள் மற்றும் அதிகரித்து வரும் தீவிர வானிலை நிகழ்வுகள் உள்ளிட்ட பல காரணிகளை இந்த உணவு பஞ்சம் ஏற்படக்கூடும் என்று இந்த நிறுவனங்கள் மேற்கோள் காட்டியுள்ளன.
நாணயம் வரலாற்றில் மிக மோசமான சரிவை ஏமன் சந்தித்து வரும் நிலையில் இந்த எச்சரிக்கை வந்துள்ளது. தெற்கு துறைமுக நகரமான ஏடன் மற்றும் பிற அரசாங்கக் கட்டுப்பாட்டுப் பகுதிகளில் ஒரு அமெரிக்க டாலருக்கு ரியால் சமீபத்தில் சுமார் 2,750 ஆகக் குறைந்துள்ளது.
2014 ஆம் ஆண்டின் பிற்பகுதியில் இருந்து, ஈரானுடன் இணைந்த ஹவுத்தி குழு பல வடக்கு மாகாணங்களைக் கைப்பற்றியதால், சர்வதேச அளவில் அங்கீகரிக்கப்பட்ட அரசாங்கம் தலைநகர் சனாவை விட்டு வெளியேற வேண்டிய கட்டாயம் ஏற்பட்டது. மேலும், 2015 ஆம் ஆண்டில் சவுதி தலைமையிலான கூட்டணி அரசாங்கத்தை மீட்டெடுக்க தலையிட்ட பிறகு மோதல் அதிகரித்தது.
தற்போது இரண்டாவது தசாப்தத்தில் நுழையும் இந்தப் போர், ஐக்கிய நாடுகள் சபை உலகின் மிக மோசமான மனிதாபிமான நெருக்கடி என்று விவரிக்கும் நிலைக்குத் தூண்டியுள்ளது. ஏராளமான மத்தியஸ்த முயற்சிகள் இருந்தபோதிலும், ஒரு நீடித்த அமைதி ஒப்பந்தம் எட்ட முடியாத நிலையில் உள்ளது குறிப்பிடத்தக்கது.
