மும்பையின் பவாய் பகுதியில் உள்ள ஸ்டூடியோ ஒன்றில் இன்று ஆடிஷனுக்காக வந்த சுமார் 20 குழந்தைகளை பிணைக் கைதிகளாக ரோஹித் ஆர்யா என்ற நபர் சிறைபிடித்துள்ளார்.. இந்த சம்பவம் பவாய் பகுதியில் உள்ள பிரபலமான RA ஸ்டூடியோவில் நடந்தது. தகவல் கிடைத்ததும் மும்பை போலீசார் மற்றும் அவசர சேவை குழுக்கள் உடனடியாக அங்கு விரைந்தன.
ஆக்டிங் ஸ்டூடியோவில் என்ன நடந்தது ?
மனநிலை பாதிக்கப்பட்டவர் என கூறப்படும் ரோஹித் ஆர்யா, ஆடிஷன் என்று கூறி சுமார் 100 குழந்தைகளை வரவழைத்துள்ளார்.. அதில் 80 குழந்தைகளை வெளியே அனுப்பிய நிலையில் சுமார் 20 குழந்தைகளுடன் ஸ்டூடியோவில் தன்னை பூட்டிக்கொண்டதாக கூறப்படுகிறது. மேலும் தனது கோரிக்கைகள் நிறைவேற்றப்படாவிட்டால், கட்டிடத்திற்கு தீ வைத்து அனைத்து குழந்தைகளையும் எரித்துவிடுவேன் என்று மிரட்டி உள்ளார்..
பிற்பகல் 3 மணியளவில் காவல்துறையினரிடமிருந்து துறைக்கு ஒரு அழைப்பு வந்ததாக மும்பை தீயணைப்புப் படையின் நிலைய அதிகாரி அபிஜித் சோனாவனே தெரிவித்தார். மேலும் “எங்கள் ஹைட்ராலிக் கருவிகளைப் பயன்படுத்தி கிரில்ஸைத் திறந்து, போலீசாருக்கு அணுகலை வழங்கினோம். அவர்கள் உள்ளே நுழைந்தனர், இப்போது அனைவரும் மீட்கப்பட்டனர்.” என்று தெரிவித்தார்.
இந்த நிலையில் போலீசாருடன் நடந்த துப்பாக்கிச் சண்டையில் காயமடைந்த ரோஹித் ஆர்யா சிகிச்சை பலனின்றி உயிரிழந்தார்.. குழந்தைகளின் மீட்பு நடவடிக்கையின் போது ஆர்யா, ஏர் கன் மூலம் போலீசாரை நோக்கி சுட்டதாகவும், இதனால் போலீசார் ஒரு சுற்று துப்பாக்கிச் சூடு நடத்தியதாகவும் காவல்துறையினர் தெரிவித்தனர். துப்பாக்கிச் சூட்டுக் காயங்களுடன் மருத்துவமனைக்கு கொண்டு செல்லப்பட்ட அவர், சிகிச்சை பலனின்றி மருத்துவமனையில் உயிரிழந்தார்..
8 முதல் 14 வயதுக்குட்பட்ட குழந்தைகள் அனைவரும் பல மணி நேரம் பணயக்கைதிகளாக வைக்கப்பட்டிருந்ததாகவும், பின்னர் காயமின்றி மீட்கப்பட்டதாகவும் போலீசார் தெரிவித்தனர்.
பவாய் காவல் நிலையத்தைச் சேர்ந்த ஒரு குழு மதியம் 1:45 மணியளவில் ஒரு துயரச் செய்தியைப் பெற்று சம்பவ இடத்திற்கு விரைவாக வந்ததாக காவல்துறை அதிகாரிகள் தெரிவித்தனர். பேச்சுவார்த்தை உடனடியாகத் தொடங்கியது, ஆனால் அவர் குழந்தைகளை விடுவிக்க மறுத்துவிட்டார். அவர்களுக்கு தீங்கு விளைவிப்பதாக அவர் மிரட்டியதால், காவல் குழு குளியலறை வழியாக வலுக்கட்டாயமாக நுழைந்து 17 குழந்தைகளையும் பத்திரமாக மீட்டது என்று காவல்துறையினர் தெரிவித்துள்ளனர்..
ஸ்டுடியோவுக்குள் காவல்துறைக்கும் ரோஹித்துக்கும் இடையே மோதல் வெடித்தது.. ஆர்யா துப்பாக்கிச் சூட்டில் காயமடைந்ததாகவும் கூறப்படுகிறது. சிகிச்சைக்காக அவர் உடனடியாக ஜோகேஷ்வரி மருத்துவமனைக்கு கொண்டு செல்லப்பட்டார், ஆனால் வந்த சிறிது நேரத்திலேயே இறந்துவிட்டதாக அறிவிக்கப்பட்டது. ஸ்டுடியோ வளாகத்திலிருந்து ஒரு ஏர் கன் மற்றும் அடையாளம் தெரியாத சில ரசாயனங்களை அதிகாரிகள் மீட்டனர்.
ஏன் குழந்தைகளை பிடித்து வைத்தார்?
அரசுப் பள்ளி திட்ட ஒப்பந்தத்தில் செலுத்தப்படாத பாக்கி தொடர்பான தொடர்பான கடுமையான மன அழுத்தத்தை ரோஹித் ஆர்யா எதிர்கொண்டதாக முதற்கட்ட விசாரணைகள் தெரிவிக்கின்றன. சுமார் 2 கோடி ரூபாய் நிலுவையில் இருப்பதாகவும், முன்னாள் கல்வி அமைச்சர் தீபக் கேசர்கரின் இல்லம் அருகே உண்ணாவிரதம் உட்பட இந்த விவகாரம் தொடர்பாக கடந்த காலங்களில் போராட்டங்களை நடத்தியதாகவும் அவர் கூறியதாக கூறப்படுகிறது.
எனினும் அவர் எப்படி போலி ஆடிஷனை ஏற்பாடு செய்து குழந்தைகளை ஸ்டுடியோவிற்கு வரவழைக்க முடிந்தது என்பது குறித்து போலீசார் விசாரணை மேற்கொண்டு வருகின்றனர்.. சம்பவ இடத்தில் காணப்பட்ட ரசாயனங்களின் தன்மையையும் அதிகாரிகள் ஆய்வு செய்து வருகின்றனர். குழந்தைகள் பிடித்து வைக்கப்பட்டதால், இந்த முழு மீட்பு நடவடிக்கையும் மிகவும் சவாலானது என்று அதிகாரிகள் தெரிவித்தனர்.
