தமிழ்நாட்டில் எண்ணற்ற சிவாலயங்கள் இருப்பினும், ஒரு மலையின் உச்சியை நோக்கிப் பயணித்து ஈசனை தரிசிப்பதில் கிடைக்கும் பரவசமே தனித்துவமானது. அந்த வகையில், திண்டுக்கல் மாவட்டம் ஒட்டன்சத்திரம் வட்டத்தில் உள்ள கீரனூர் பகுதியில் அமைந்துள்ள ‘கொண்டரங்கி மலை’ ஆன்மிகப் பயணிகளுக்கும், மலையேற்ற விரும்பிகளுக்கும் ஒரு சொர்க்கமாக திகழ்கிறது.
கடல் மட்டத்திலிருந்து சுமார் 3,825 அடி உயரத்தில் அமைந்துள்ள இம்மலை, தூரத்திலிருந்து பார்க்கும்போது பிரம்மாண்டமான சிவலிங்கம் போன்றே காட்சியளிப்பது இயற்கை தந்த அதிசயம். கொண்டரங்கி மலையேற்றம் என்பது அத்தனை எளிதான காரியமல்ல. தொடக்கத்தில் சமதளமாக தெரிந்தாலும், செல்லச் செல்ல மலைப் பாதை மிகவும் செங்குத்தாக மாறுகிறது. ஏறுபவர்களின் உடல் மற்றும் மன உறுதியைச் சோதிக்கும் வகையில் அமைந்துள்ள இந்தப் பாதையில், நீர் தாகத்தை தணிக்க இயற்கையே இரண்டு நீச்சுனைகளை வழங்கியுள்ளது.
இந்த சுனைகள் எக்காலத்திலும் வற்றாதவை என்பது ஆச்சரியமான தகவல். மலையின் பாதியை கடந்தவுடன், மேகங்கள் நம்மைத் தொட்டுச் செல்வதும், காற்றின் வேகம் அதிகரிப்பதும் நாம் ஏதோ வானத்தின் உச்சிக்குச் செல்வது போன்ற உணர்வைத் தருகின்றன. மலையின் உச்சியை அடைந்தவுடன், அங்கே சுயம்பு லிங்கமாக வீற்றிருக்கும் சிவபெருமான் நம்மை வரவேற்கிறார். இவரை ‘மல்லிகார்ஜுனர்’ என்றும் அழைக்கின்றனர்.
முற்றிலும் பாறையை குடைந்து உருவாக்கப்பட்ட இந்தக் குடைவரைக் கோவில், பாண்டிய மன்னர்களின் கட்டிடக்கலைக்குச் சான்றாகத் திகழ்கிறது. கோவிலின் நுழைவாயிலில் விநாயகர், நந்தி மற்றும் நாகேஸ்வரர் திருவுருவங்கள் அமைந்துள்ளன. அரவக்குறிச்சி அருகே உள்ள ரெங்கமலையில் கண்டெடுக்கப்பட்ட 8-ஆம் நூற்றாண்டு கல்வெட்டுகள், இம்மலைக்கோவில் பாண்டியர் காலத்தில் செதுக்கப்பட்டது என்பதை உறுதிப்படுத்துவதாக தகவல்கள் தெரிவிக்கின்றன.
புராணக் கதைகளின்படி, வனவாசத்தின் போது பஞ்சபாண்டவர்கள் இம்மலையில் தங்கியிருந்ததாக கூறப்படுகிறது. அவர்கள் வாழ்ந்த குகைகளை இன்றும் இங்கே காணலாம். எல்லாவற்றிற்கும் மேலாக, ஒரு விசித்திரமான நம்பிக்கையும் இந்தப் பகுதியில் நிலவுகிறது. அமாவாசை அல்லது பௌர்ணமி தினங்களில் மலையுச்சியில் தியானம் செய்தால், மறைந்த நம் முன்னோர்களுடன் உரையாட முடியும் என்று இப்பகுதி மக்கள் நம்புகின்றனர்.
குளிர்ச்சியான தட்பவெப்பநிலை, தவழ்ந்து செல்லும் மேகங்கள், வேண்டுதலை நிறைவேற்றும் ஈசன் என பல சிறப்புகளை கொண்ட கொண்டரங்கி மலைக்குச் சென்று வருபவர்கள், தங்கள் வாழ்க்கையில் ஒரு நேர்மறையான மாற்றத்தை உணர்வதாக நெகிழ்ச்சியுடன் கூறுகின்றனர்.
