இந்தியாவின் ஒவ்வொரு மாவட்டமும் தன்னுள் ஏதோ ஒரு மறைந்த ஆன்மிக ரகசியத்தைக் கொண்டுள்ளது. ஆனால் விழுப்புரம் மாவட்டத்தில் அமைந்துள்ள ஸ்ரீ அபிராமேஸ்வரர் கோயில் அதில் சிறப்பு பெற்ற ஒன்று. உலகிலேயே சிறிய துவாரம் வழியாக சிவலிங்கத்தை தரிசிக்க முடியும் ஒரே ஆலயம் இதுவே என்பது இதன் பெருமை.
விழுப்புரம் நகரத்திலிருந்து சுமார் 10 கிலோமீட்டர் தொலைவில் இயற்கையின் அமைதியால் சூழப்பட்ட பகுதியில் இந்தக் கோவில் அமைந்துள்ளது. இங்கு ஸ்ரீ அபிராமேஸ்வரர் உடனுறை ஸ்ரீ முத்தாம்பிகை அம்மன் அருள்பாலித்து வருகிறார். இந்த ஆலயத்தின் பெயர் “ஒரு கோடி” என அழைக்கப்படுவதற்கு காரணம், புராணங்களின் படி ஒரு கோடி சித்தர்கள் இங்கு வந்து சிவனை வழிபட்டதாக கூறப்படுகிறது.
இதனால் இந்த ஊருக்கும் கோயிலுக்கும் “ஒரு கோடி சித்தர் வழிபட்ட ஆலயம்” என்ற மரியாதையான பெயர் நிலைத்துள்ளது. அம்மன் இங்கு “ஓலை படித்த நாயகி” என்ற பெயரால் பக்தர்களால் வழிபடுகிறார். ஆகவே இந்த ஆலயம் முழுப்பெயராக “முத்தாம்பிகை உடனுறை அபிராமேஸ்வரர், ஓலை படித்த நாயகி உடனுறை கோடி கொடுத்த நாதர் ஆலயம்” என அழைக்கப்படுகிறது.
கோயிலின் மிகப்பெரிய அதிசயம் சிவலிங்கத்தை காணும் துவாரம் உலகிலேயே மிகச் சிறியது! அந்தச் சிறு வாசல் வழியே நுழைந்து தான் பக்தர்கள் தரிசனம் செய்ய வேண்டும். இது ஆன்மீகத்திற்கும், தாழ்மைக்கும் ஒரு அடையாளமாக கருதப்படுகிறது. கோயிலின் பூசாரி கூறுகையில், “நான் இந்த ஆலயத்தில் நான்கு தலைமுறையாக பூஜை செய்து வருகிறேன்.
இங்கு வழிபட்டால் நினைத்த காரியங்கள் நிச்சயமாக நிறைவேறும் என்ற நம்பிக்கை பல நூற்றாண்டுகளாக நிலவுகிறது,” என தெரிவித்துள்ளார். அதிகாலை வேளையில் சூரிய உதயமாகும் பொழுது அந்தச் சிறிய துவாரம் வழியாக சூரியஒளி நேரடியாக சிவலிங்கத்தின் நெற்றிப் பகுதியில் விழும் காட்சி மெய்சிலிர்க்க வைக்கும். இதை காண வருடந்தோறும் நூற்றுக்கணக்கான பக்தர்கள் பல மாவட்டங்களில் இருந்து வருகை தருகிறார்கள்.
Read more: சனி பகவானுக்குப் பிடித்த ராசிகள் இவை தான்… சனியின் அருளால் புகழும் பணமும் பெறும் அதிர்ஷ்டசாலிகள்!
