இந்திய ஆயுள் காப்பீட்டுக் கழகம் சார்பில் ‘எல்ஐசி ஜீவன் ஆசாத்’ என்ற புதிய திட்டம் அறிமுகப்படுத்தப்பட்டுள்ளது.
இதுகுறித்து எல்ஐசி வெளியிட்டுள்ள அறிவிப்பில், ”எல்ஐசி ஜீவன் ஆசாத் திட்டம் பங்குச்சந்தையில் சேராத, தனி நபர், சேமிப்பு ஆயுள்காப்பீடு திட்டமாகும். இதன் மூலம் உங்களுக்கு சேமிப்பும், பாதுகாப்பும் கிடைக்கும். பாலிசிகாலத்தின்போது ஆயுள்காப்பீட்டாளர் துரதிருஷ்டவசமாக இறந்துவிட்டால், அவரது குடும்பத்திற்கு இந்த திட்டம் மூலம் நிதி கிடைக்கும். மேலும், இந்த திட்டத்தில் கடனும் பெற்றுக்கொள்ளலாம். பாலிசி முதிர்வுத் தேதியில் உறுதி செய்யப்பட்ட உத்தரவாதமான பணம் பாலிசிதாரருக்கு கிடைக்கும். இந்த திட்டத்தில் குறைந்தபட்ச அடிப்படை உத்தரவாத தொகை ரூ.2 லட்சமாகவும், அதிகபட்ச அடிப்படை உத்தரவாத தொகை ரூ.5 லட்சமாகவும் உள்ளது.
இந்த பாலிசியை 15 முதல் 20 ஆண்டுக் காலத்துக்கு எடுக்க முடியும். மொத்த பாலிசி காலத்தில் 8 ஆண்டுகள் மட்டும் பிரீமியம் செலுத்தினால் போதுமானது. இந்த திட்டத்தில் 90 நாள் குழந்தை முதல், 50 வயது பெரியவர் வரை சேர முடியும். பிரீமியத்தை ஆண்டு, அரையாண்டு, காலாண்டு, மாத இடைவெளியில் செலுத்தலாம். முகவர்கள் மூலமும், ஆன்லைனிலும், எல்ஐசி அலுவலகங்களிலும் இந்த பாலிசியில் சேர முடியும். இதுகுறித்த மேலும் விவரங்களுக்கு www.licindia.in என்ற இணையதளத்தை காணலாம்” என்று தெரிவிக்கப்பட்டுள்ளது.
