ஜெஇஇ அட்வான்ஸ்டு தேர்வுக்கான முடிவுகளை ஐஐடி கவுகாத்தி இன்று வெளியிட்டுள்ளது. இந்த தேர்வு முடிவுகளை அதிகாரப்பூர்வ இணையத்தளமான jeeadv.ac.in-இல் மாணவர்கள் அறிந்துகொள்ளலாம் என தெரிவிக்கப்பட்டுள்ளது. இணையதளத்தில் மாணவர்கள் தங்கள் பதிவு எண், பிறந்த தேதி ஆகிய விவரங்களை பதிவு செய்து, தேர்வு முடிவுகளை டவுன்லோட் செய்து கொள்ளலாம். தேர்வு முடிவுகளுடன் இறுதி விடைக்குறிப்பையும் ஐஐடி கவுகாத்தி வெளியிட்டுள்ளது.
இந்த தேர்வில் 360-க்கு 341 மதிப்பெண்கள் பெற்று ஹைதராபாத் மாணவர் வவிலாலா சித்விலாஸ் ரெட்டி அகில இந்திய அளவில் முதலிடத்தைப் பிடித்துள்ளார். பெண்களைப் பொறுத்தவரை நயாகாந்தி நாக பவ்யா 298 மதிப்பெண்களுடன் முதலிடம் பிடித்துள்ளார். இவர் அகில இந்திய அளவில் 56-வது இடத்தை பிடித்துள்ளார். இந்த அண்டு ஐதராபாத் மண்டலத்தில் இருந்து அதிக அளவிலான மாணவர்கள் தேர்ச்சி பெற்றுள்ளனர். ஜேஇஇ மெயின் தேர்வுகள் கடந்த ஏப்ரல் மாதம் 6ஆம் தேதி நடைபெற்றது குறிப்பிடத்தக்கது