ஜப்பானின் இஷினோமகி துறைமுகத்தை 50 சென்டிமீட்டர் உயரத்திற்கு சுனாமி தாக்கியதாக ஜப்பான் வானிலை ஆய்வு நிறுவனம் தெரிவித்துள்ளது.
ரஷ்யாவின் கம்சட்கா தீபகற்பத்தில் இன்று 8.8 ரிக்டர் அளவிலான சக்திவாய்ந்த நிலநடுக்கம் ஏற்பட்டது. இந்த நிலநடுக்கம் 19.3 கிமீ (12 மைல்) ஆழத்தில் ஆழமற்றதாக இருந்தது, மேலும் ரஷ்யாவின் கம்சட்கா தீபகற்பத்தில் உள்ள பெட்ரோபாவ்லோவ்ஸ்கின் கிழக்கு-தென்கிழக்கில் சுமார் 125 கிமீ (80 மைல்) தொலைவில் அவாச்சா விரிகுடாவின் கடற்கரையில் மையம் கொண்டிருந்ததாக USGS தெரிவித்துள்ளது.
இந்த நிலநடுக்கத்தால் ரஷ்யாவின் குரில் தீவுகள் மற்றும் ஜப்பானின் பெரிய வடக்கு தீவான ஹொக்கைடோவின் கடலோரப் பகுதிகளில் சுனாமி ஏற்பட்டது.. அமெரிக்காவின் கலிபோர்னியா, அலாஸ்கா மற்றும் ஹவாய் மற்றும் நியூசிலாந்தை நோக்கிய பிற கடற்கரைகளுக்கும் எச்சரிக்கைகள் விடுக்கப்பட்டுள்ளது..
இந்த நிலையில் ஜப்பானின் கிழக்கு கடற்கரையில் உள்ள மியாகி மாகாணத்தில் உள்ள ஒரு முக்கிய துறைமுக நகரமான இஷினோமகி துறைமுகத்தை 50 சென்டிமீட்டர் உயரத்திற்கு சுனாமி தாக்கியதாக ஜப்பான் வானிலை ஆய்வு நிறுவனம் தெரிவித்துள்ளது, இது இதுவரை பதிவு செய்யப்பட்ட மிக உயர்ந்த சுனாமி அலையாகும். பசிபிக் கடற்கரையில் உள்ள 16 இடங்களில் பசிபிக் கடற்கரையில் தெற்கே, ஹொக்கைடோவிலிருந்து டோக்கியோவின் வடகிழக்கே பகுதிகளுக்கு நகர்ந்தபோது 40 சென்டிமீட்டர் வரை அலைகள் பதிவாகியுள்ளன.
ராட்சத அலைகள் வரக்கூடும் என்பதால், மக்கள் எச்சரிக்கையாக இருக்குமாறு அதிகாரிகள் அறிவுறுத்தி உள்ளனர். நிலநடுக்கம் ஏற்பட்ட சில மணி நேரங்களுக்குப் பிறகு, ஜப்பானின் கடற்கரையில் 4 பெரிய திமிங்கலங்கள் கரை ஒதுங்கின. அவை கரையோரத்தில் கிடந்த காட்சிகள் ஊடகங்களில் வெளியாகின. அலைகள் முன்னும் பின்னுமாக வந்தபோது கரையோரத்தில் திமிங்கலங்களின் வீடியோ இணையத்தில் வைரலாகி வருகிறது.
டோக்கியோ பல்கலைக்கழக நில அதிர்வு நிபுணர் சகாய் ஷினிச்சி இதுகுறித்து பேசிய போது “ கடந்த காலங்களில் சக்திவாய்ந்த பூகம்பங்களால் ஏற்பட்ட சுனாமிகள் ஜப்பானை அடைந்து பெரும் சேதத்தை ஏற்படுத்தியுள்ளன. கம்சட்கா தீபகற்பம் மற்றும் குரில் தீவுகளின் கடற்கரையில் பெரிய பூகம்பங்கள் ஏற்பட்டுள்ளன, இதன் விளைவாக ஏற்பட்ட சுனாமிகள் ஜப்பானில் பரவலான சேதத்தை ஏற்படுத்தியுள்ளன. உதாரணமாக, 1952 நிலநடுக்கம்,” என்று தெரிவித்தார்..
இன்றைய நிலநடுக்கம் மற்றும் சுனாமி 1952 ஆம் ஆண்டு ஏற்பட்ட நிலநடுக்கத்தை ஒத்திருப்பதாக நில அதிர்வு நிபுணர் மேலும் கூறினார். 1952 ஆம் ஆண்டு ஏற்பட்ட சக்திவாய்ந்த செவெரோ-குரில்ஸ்க் நிலநடுக்கம் தூர கிழக்கில் ரஷ்யாவின் கம்சட்கா தீபகற்பத்தின் கடற்கரைக்கு அருகில் தாக்கியது. இது பெரும் சேதத்தை ஏற்படுத்தியது, சுனாமியும் ஏற்பட்டது…
சுமார் 0100 GMT தொடங்கி பெரிய கடலோரப் பகுதிகளை 1 மீட்டர் (3.3 அடி) வரை சுனாமி அடையும் என்று ஜப்பான் வானிலை நிறுவனம் தெரிவித்துள்ளது.
ரஷ்யா மற்றும் ஜப்பானின் சில கடற்கரைகளில் அடுத்த மூன்று மணி நேரத்திற்குள் “அபாயகரமான சுனாமி அலைகள்” பற்றிய எச்சரிக்கையை அமெரிக்க சுனாமி எச்சரிக்கை அமைப்பு வெளியிட்டது. அமெரிக்க தீவுப் பகுதியான குவாம் மற்றும் மைக்ரோனேஷியாவின் பிற தீவுகளுக்கும் சுனாமி கண்காணிப்பு அமலில் இருந்தது.
கம்சட்கா மற்றும் ரஷ்யாவின் தூர கிழக்குப் பகுதிகள் பசிபிக் நெருப்பு வளையத்தில் அமைந்துள்ளன. இந்த பகுதிகள் சக்திவாந்த நிலநடுக்கங்கள் மற்றும் எரிமலை வெடிப்புகளுக்கு ஆளாகக்கூடிய புவியியல் ரீதியாக ஆக்டிவான பகுதி என்பது குறிப்பிடத்தக்கது..
Read More : இந்தியாவுக்கும் சுனாமி ஆபத்தா? அச்சம் வேண்டாம்.. மக்கள் வயிற்றில் பாலை வார்த்த அறிவியல் மையம்..
