மணிரத்னம் இயக்கத்தில் கமல்ஹாசன், சிம்பு, த்ரிஷா, அசோக் செல்வன் உள்ளிட்டோர் நடிப்பில் உருவாகியுள்ள திரைப்படம் ”தக் லைஃப்”. இப்படத்திற்கு ஆர்.ரஹ்மான் இசை அமைத்துள்ளார். மேலும், இப்படத்தில் இடம்பெற்றுள்ள பாடல்கள் அனைத்தும் ரசிகர்களின் மத்தியில் நல்ல வரவேற்பை பெற்றுள்ளது. மேலும், இப்படத்தில் வரும் “முத்த மழை” என்ற பாடலை தமிழில் “தீ” பாடியுள்ளார்.
ஆனால், “தக் லைஃப்” படத்தின் ஆடியோ வெளியீட்டு விழாவில் பாடகி தீயால் பெர்ஃபார்மன்ஸ் செய்ய முடியாததால், அவருக்கு பதிலாக அந்தப் பாடலை சின்மயி பாடினார். இந்த பாடலை கேட்ட ரசிகர்கள், தீ-யின் குரலைவிட சின்மயியின் குரலை பாராட்டி வருகின்றனர். மேலும், இன்ஸ்டாகிராம் முழுவதும் சின்மயி பாடிய முத்த மழை பாடல் தான் நிறைந்துள்ளது.
இந்நிலையில் இதுகுறித்து பேசியுள்ள சின்மயி, “தீ வர்ஷன், சின்மயி வர்ஷன் என்றெல்லாம் கூறுவது தேவையில்லாத ஒன்று. கலைஞர்களாக நாங்கள் ஒருவரை ஒருவர் போட்டியாளராக பார்க்கவில்லை. தக் லைஃப் இசை வெளியீட்டு விழாவில் அந்த பாடலை தீ தான் பாடியிருக்க வேண்டும். ஆனால், அவர் அன்றைய தினம் ஊரில் இல்லை. இதனால், நான் பாடினேன். ஆனால், எனக்கு இவ்வளவு வரவேற்பு கிடைக்கும் என்று நான் எதிர்பார்க்கவில்லை.
இன்னும் 15 ஆண்டுகளில் தீ 100 சின்மயி, 100 ஸ்ரேயா கோஷல் குரலை விழுங்கக்கூடிய ஒரு பாடகியாக வலம் வருவார். அவருக்கு நல்ல எதிர்காலம் உள்ளது. நான் பல பயிற்சிகளுக்கு பிறகு தான் இந்த இடத்திற்கு வந்துள்ளேன். ஆனால், தீ அப்படி கிடையாது. இந்த நேரத்தில் நான் அவரிடம் மன்னிப்புக் கேட்க விரும்புகிறேன். என்னை வைத்து அவருடைய திறமைகளை குறைவாக மதிப்பிட வேண்டாம்” என்று பேசியிருக்கிறார்.
