இந்தியாவின் மிக முக்கியமான பழங்குடித் தலைவர்களில் ஒருவரும், ஜார்க்கண்ட் முக்தி மோர்ச்சா (JMM)-ஐ உருவாக்கியவருமான ஷிபு சோரன் தனது 81 வயதில் காலமானார்.. அவரின் மகனும், ஜார்கண்ட் முதல்வருமான ஹேமந்த் சோரன் இந்த தகவலை உறுதிப்படுத்தினார்.. ஷிபு சோரன் டெல்லியின் சர் கங்கா ராம் மருத்துவமனையில் ஒரு மாதத்திற்கும் மேலாக சிகிச்சை பெற்று வந்தார், அங்கு அவருக்கு வென்டிலேட்டர் உதவி அளிக்கப்பட்டது. சிறுநீரகக் கோளாறு காரணமாக மருத்துவமனையில் அனுமதிக்கப்பட்டிருந்த அவர் சிகிச்சை பலனின்றி உயிரிழந்தார்.. அவரின் மறைவுக்கு பல்வேறு அரசியல் தலைவர்களும் இரங்கல் தெரிவித்து வருகின்றனர்..
யார் இந்த ஷிபு சோரன்?
ஜனவரி 11, 1944 அன்று, ராம்கர் மாவட்டத்தில் (அப்போது பீகாரில், இப்போது ஜார்க்கண்டில்) உள்ள நெம்ரா கிராமத்தில் பிறந்த ஷிபு சோரன், மறைந்த ஷோபரன் சோரனின் மகனாவார். 15 வயதில், கடன் கொடுத்தவர்கள் நடத்திய தாக்குதலில் தனது தந்தையை இழந்தார். இந்த சம்பவம் அவரது அரசியல் பயணத்திற்கு அடித்தளமாக அமைந்தது..
ஹசாரிபாக்கில் உள்ள கோலா உயர்நிலைப் பள்ளியில் தனது மெட்ரிகுலேஷன் படிப்பை முடித்த அவர், ஒரு சாதாரண பின்னணியில் இருந்து உயர்ந்து ஒரு முக்கிய பழங்குடித் தலைவராகவும், ஜார்க்கண்ட் அரசியலின் ஒரு மைய நபராகவும் மாறினார்..
1962-ம் ஆண்டு ஜனவரி 1-ம் தேதி அவர் ரூபி சோரனை மணந்தார். இந்த தம்பதியருக்கு மூன்று மகன்கள் மற்றும் ஒரு மகள் என 4 பிள்ளைகள் உள்ளனர். அவரது மூத்த மகன் துர்கா சோரன் 2009 இல் காலமானார். அதே நேரத்தில் மகள் அஞ்சானி கட்சியின் ஒடிசா பிரிவை வழிநடத்துகிறார். அவரது இளைய மகன் பசந்த் சோரன் ஒரு எம்.எல்.ஏ. ஆவார்.
அவரது மகன் ஹேமந்த் சோரன் தற்போது ஜார்க்கண்டின் முதலமைச்சராக இருக்கிறார். மேலும் ஜே.எம்.எம் கட்சியில் முன்னணி நபராகத் தொடர்கிறார். தனது தந்தையின் இறப்பு குறித்து எக்ஸ் பக்கத்தில் பதிவிட்டுள்ள ஹேமந்த் சோரன் “மதிப்பிற்குரிய டிஷோம் குருஜி நம் அனைவரையும் விட்டுச் சென்றுவிட்டார். இன்று, நான் முற்றிலும் வெறுமையாக உணர்கிறேன்.” என்று பதிவிட்டுள்ளார்..
ஷிபு சோரனின் மரணம் பழங்குடியினரின் உறுதிப்பாட்டின் எழுச்சியையும் தனி ஜார்க்கண்ட் மாநிலத்தை உருவாக்குவதையும் கண்ட ஒரு அரசியல் சகாப்தத்தின் முடிவைக் குறிக்கிறது. ‘டிஷோம் குரு’ (நிலத்தின் தலைவர்) என்று பிரபலமாக அறியப்படும் ஷிபு சோரன், பழங்குடியினரின் உரிமைகளுக்காக இடைவிடாமல் போராடியதன் மூலம் மாநில, தேசிய அரசியலை மறுவடிவமைப்பதில் முக்கிய பங்கு வகித்தார்.
ஜே.எம்.எம் நிறுவனர்
1973 ஆம் ஆண்டு தன்பாத்தில் நடந்த ஒரு பொதுக் கூட்டத்தில் தொழிற்சங்கவாதிகளான ஏ.கே. ராய் மற்றும் பினோத் பிஹாரி மஹ்தோ ஆகியோருடன் இணைந்து ஷிபு சோரன் ஜார்க்கண்ட் முக்தி மோர்ச்சாவை நிறுவினார். அவரது தலைமையின் கீழ், ஜே.எம்.எம் விரைவாக தனி பழங்குடி மாநிலத்திற்காக போராடும் முக்கிய அரசியல் சக்தியாக மாறியது. சோட்டாநாக்பூர் மற்றும் சந்தால் பர்கானா பகுதிகளில் வலுவான ஆதரவைப் பெற்றது.
நிலப்பிரபுத்துவ சுரண்டலுக்கு எதிராக பழங்குடி சமூகங்களை ஷிபு சோரன் அணி திரட்டினார். இதனால் அவர் பழங்குடி மக்களிடையே ஒரு முன்னணி தலைவர் அந்தஸ்துக்கு உயர்ந்தார்.. ஷிபு சோரன் மற்றும் பிறர் தலைமையிலான பல ஆண்டு கால போராட்டங்களுக்குப் பிறகு, நவம்பர் 15, 2000 அன்று ஜார்க்கண்ட் உருவாக்கப்பட்டதன் மூலம் தனி மாநிலத்திற்கான கோரிக்கை நிறைவேறியது.
அரசியல் வாழ்க்கை
ஷிபு சோரனின் அரசியல் பயணம் 1980 ஆம் ஆண்டு தொடங்கியது.. தும்கா தொகுதியில் இருந்து மக்களவைக்கு தேர்ந்தெடுக்கப்பட்டார்.. அவர் பல முறை இந்த தொகுதியில் தேர்தலில் போட்டியிட்டு வெற்றி பெற்றார்.. ஜூன் 2020 முதல் மாநிலங்களவை எம்.பி.யாகவும் பணியாற்றினார், மேலும் அக்டோபர் 2024 இல் பழங்குடி விவகார அமைச்சகத்திற்கான ஆலோசனைக் குழு உறுப்பினராகவும் நியமிக்கப்பட்டார்.
மாநில அரசியலில், சோரன் ஜார்க்கண்டின் முதல்வராக 3 முறை பணியாற்றினார் – சுருக்கமாக மார்ச் 2 முதல் 11, 2005 வரை; ஆகஸ்ட் 27, 2008 முதல் ஜனவரி 12, 2009 வரை; மற்றும் டிசம்பர் 30, 2009 முதல் மே 31, 2010 வரை. ஒவ்வொரு பதவிக்காலமும் நிலையற்ற கூட்டணி உள்ளிட்ட காரணங்களால் அவர் குறைந்த காலமே முதல்வர் பதவியில் வகித்தார்.. தேசிய அளவில், 2004 மற்றும் 2006 க்கு இடையில் 3 முறை ஐக்கிய முற்போக்கு கூட்டணி அரசில்போது மத்திய நிலக்கரி அமைச்சக இலாகாவை அவர் வகித்தார். இருப்பினும், மத்திய அமைச்சரவையில் அவரது பதவிக்காலம் சட்ட சிக்கல்களால் பாதிக்கப்பட்டது.
சர்ச்சைகள் மற்றும் நீதிமன்ற வழக்குகள்
2004 ஆம் ஆண்டில், 1975 சிருடி படுகொலை வழக்கு தொடர்பாக ஷிபு சோரனுக்கு எதிராக ஒரு கைது வாரண்ட் பிறப்பிக்கப்பட்டது, இதனால் அவர் சிறிது காலம் தலைமறைவாக வேண்டியிருந்தது. அவர் கைது செய்யப்பட்டு, சிறையில் வைக்கப்பட்டார், பின்னர் ஜாமீன் பெற்ற பிறகு மீண்டும் அமைச்சரவையில் சேர்க்கப்பட்டார். மார்ச் 2008 இல் அவர் இந்த வழக்கில் இருந்து விடுவிக்கப்பட்டார்.
மற்றொரு உயர்மட்ட வழக்கில், 1994 ஆம் ஆண்டு அவரது முன்னாள் செயலாளர் சஷிநாத் ஜா கடத்தப்பட்டு கொலை செய்யப்பட்ட வழக்கில் ஷிபு சோரன் நவம்பர் 2006 இல் குற்றவாளி என அறிவிக்கப்பட்டார்..
1993 ஆம் ஆண்டு நரசிம்ம ராவ் அரசாங்கத்திற்கு எதிரான நம்பிக்கையில்லா வாக்கெடுப்பின் போது அரசியல் ரீதியாக லாபம் ஈட்டுவதற்காக ஜாவை அமைதிப்படுத்துவதற்காக அவர் கொல்லப்பட்டதாக சிபிஐ குற்றம் சாட்டியது. சோரன் பின்னர் விடுவிக்கப்பட்டார், மேலும் ஏப்ரல் 2018 இல் அவர் விடுவிக்கப்பட்டதை உச்ச நீதிமன்றம் உறுதி செய்தது.
கொலை முயற்சியில் இருந்து தப்பினார்
ஜூன் 2007 இல் சோரன் சிறைக்கு அழைத்துச் செல்லப்பட்டபோது தியோகர் அருகே அவரது வாகனம் மீது வெடி குண்டுகள் வீசப்பட்டது.. எனினும் அவர் இந்த கொலை முயற்சியில் இருந்து தப்பினார். அவரது அரசியல் சூழலின் நிலையற்ற தன்மை இருந்தபோதிலும், அவரது செல்வாக்கு அசைக்க முடியாததாக இருந்தது.
ஏப்ரல் 2025 வரை 38 ஆண்டுகள் ஜேஎம்எம் தலைவராக அவர் தலைமை தாங்கினார்.. முன்னாள் நிர்வாகத் தலைவராக இருந்த ஹேமந்த், கட்சித் தலைவராகத் தேர்ந்தெடுக்கப்பட்டு, தற்போது ஜார்க்கண்ட் முதல்வராகப் பணியாற்றி வருகிறார்.
ஷிபு சோரனின் வாழ்க்கை, ஜார்க்கண்டின் பரிணாம வளர்ச்சியை பிரதிபலித்தது.. அடிமட்டக் கிளர்ச்சியிலிருந்து நவீன ஜார்கண்டின் தந்தை என்பது வரை அவரின் அரசியல் வாழ்க்கை ஜார்கண்ட் மட்டுமின்றி, இந்திய அரசியல் தவிர்க்க முடியாததாகவே உள்ளது..
Read More : #Breaking : ஜார்கண்ட் முன்னாள் முதல்வர் ஷிபு சோரன் காலமானார்… அரசியல் தலைவர்கள் இரங்கல்..
