நீங்கள் எப்போதாவது அறுவை சிகிச்சை அரங்கம் (Operation Theatre) அல்லது மருத்துவமனைக்குள் நுழைந்தால், அறுவை சிகிச்சை நிபுணர்கள் மற்றும் அவர்களது குழுவினர் பெரும்பாலும் பச்சை அல்லது நீல நிறத்தில் மட்டுமே ஆடைகளை அணிந்திருப்பதை கவனித்திருப்பீர்கள். மஞ்சள், சிகப்பு அல்லது வெள்ளை நிற ஆடைகளை அவர்கள் அரிதாகவே பயன்படுத்துவார்கள். இதற்கு பின்னால் உள்ள காரணம் வெறும் நடைமுறை சார்ந்ததல்ல; அது ஆழமான அறிவியல் அடிப்படையை கொண்டது.
வெள்ளை நிறத்தை தவிர்க்க என்ன காரணம்..?
அறுவை சிகிச்சை குழுவினர் சிவப்பு நிறத்தை, அதாவது ரத்தத்தை, மணிக்கணக்கில் கூர்ந்து பார்க்க நேரிடுகிறது. பொதுவாக, சிவப்பு நிறத்தை நீண்ட நேரம் தொடர்ந்து பார்த்துக் கொண்டே இருப்பது, அறுவை சிகிச்சை நிபுணரின் விழித்திரையை சோர்வடையச் செய்யும்.
முந்தைய காலங்களில் அறுவை சிகிச்சை நிபுணர்கள் வெள்ளை நிற ஆடையை அணிந்திருந்தனர். ஆனால், நீண்ட நேரம் ரத்தத்தை பார்த்துக் கொண்டிருந்த பிறகு, அவர்கள் வெள்ளை நிறச் சுவர்கள் அல்லது வெள்ளை நிற ஆடையைப் பார்க்கும்போது, அவர்களின் மூளை ஒரு “நிறப் பிம்பத்தை” (Complementary After Image) உருவாக்கியது.
இதனால், அவர்களுக்கு சிறிது நேரத்திற்கு எல்லாமே பச்சை நிற ஷேட் கொண்டதாக தோன்றியது. இது தலைசுற்றல் மற்றும் தற்காலிக பார்வை குறைபாட்டை ஏற்படுத்தியது. 1914 முதல் 1920-ஆம் ஆண்டுகளுக்கு இடையில் நடந்த சில அறுவை சிகிச்சைப் பிழைகளுக்கு இந்த பார்வை கோளாறு ஒரு காரணமாகக் கூறப்பட்டது. இத்தகைய பிழைகளை தவிர்க்கவே, மருத்துவர்கள் வெள்ளை நிறத்தில் இருந்து பச்சை நிற கவுன்களுக்கு மாறினர்.
பச்சை மற்றும் நீல நிறத்தின் பங்கு :
சிவப்பு நிறத்தின் எதிர் நிறங்களாக பச்சை மற்றும் நீல நிறங்கள் உள்ளன. அறுவை சிகிச்சையின் போது இந்த பச்சை அல்லது நீல நிற கவுன்களை அணியும்போது, அறுவை சிகிச்சை நிபுணர்கள் பார்க்கும் சிவப்பு நிற ரத்தம் கூர்மையாகவும், மிகத் தெளிவாகவும் தனித்துத் தெரியும். இதனால், நிபுணர்கள் மிக சிறிய ரத்தப்போக்கை கூட உடனடியாக கண்டறிவது எளிதாகிறது. இது அறுவை சிகிச்சையின்போது பிழைகள் ஏற்படுவதை தடுக்க முடியும்.
மேலும், பச்சை மற்றும் நீல நிறங்கள் கண் அழுத்தத்தை குறைக்கின்றன: இவை குளிர்ச்சியான நிறங்கள் என்று கருதப்படுவதால், 8 முதல் 10 மணி நேரம் வரை நீடிக்கும் அறுவை சிகிச்சையின்போது நிபுணர்களின் பார்வை சோர்வையும், மன அழுத்தத்தையும் குறைக்க உதவுகின்றன.
ரத்தத்தின் சிவப்பு நிறத்தை அதிக தெளிவாக முன்னிலைப்படுத்தி, நிபுணர்களின் கவனம் சிதறாமல் இருக்க உதவுகின்றன. இதே அறிவியல் காரணத்துக்காகவே, நாசா போன்ற ஆராய்ச்சி நிறுவனங்கள் கூட தங்கள் கட்டுப்பாட்டு அறைகளில் பச்சை-நீல நிற டோன்களை பயன்படுத்துகின்றன என்பது குறிப்பிடத்தக்கது.
மேலும், தற்போது பல மருத்துவமனைகள் பொது அறுவை சிகிச்சைக்கு பச்சை, நரம்பியல் அறுவை சிகிச்சைக்கு நீலம் போன்ற தனிப்பட்ட துறைகளை குறிக்கச் சிறப்பு குறியீட்டு வண்ணங்களைப் பயன்படுத்துகின்றன.
