செயற்கை பொது நுண்ணறிவுக்கான (Artificial General Intelligence – AGI) போட்டி தற்போது தொழில்துறை முழுவதும் காலக்கெடுகளை மிகவும் குறைத்துள்ளது. மனிதர்கள் செய்யும் பெரும்பாலான அறிவுசார் பணிகளில் சமமாகவோ அல்லது அதற்கும் மேல் செயல்படக்கூடிய அமைப்புகளையே AGI எனக் குறிப்பிடுகின்றனர். முன்பு இது பல தசாப்தங்கள் எடுக்கும் எனக் கூறப்பட்ட நிலையில், இப்போது பல நிறுவனங்கள் இதை சில ஆண்டுகளில் அடையலாம் என்று வெளிப்படையாக பேசத் தொடங்கியுள்ளன.
ஆனால் இத்தகைய கூற்றுகள் தொழில்நுட்பத்தைச் சுற்றியுள்ள பரபரப்பையும், கவனத்தையும், முதலீட்டு மதிப்பீடுகளையும் அதிகரிக்க உதவுவதால், அவற்றை எச்சரிக்கையுடன் பார்க்க வேண்டும்.
இந்த மாதிரிகளை உருவாக்கும் நிறுவனங்கள், பல பில்லியன் டாலர் மதிப்புள்ள ஒரு போட்டியின் மையத்தில் உள்ளன. சிலர் இதை ஒரு சாதாரண மென்பொருள் மேம்பாடு என அல்ல; மனித நுண்ணறிவுடன் இணைந்து இயங்கக்கூடிய, புதிய வகை அறிவின் தோற்றமாகவே பார்க்கிறார்கள்.
இந்த நிறுவனங்களில், Anthropic நிறுவனம், OpenAI மற்றும் Google ஆகியவற்றுக்கு போட்டியாளராகவும், அதே நேரத்தில் சமநிலையை ஏற்படுத்தும் நிறுவனமாகவும் தன்னை நிலைநிறுத்தியுள்ளது. Anthropic, “Constitutional AI” என்ற தனது கட்டமைப்பின் மூலம், பாதுகாப்பான மற்றும் விளக்கமளிக்கக்கூடிய செயற்கை நுண்ணறிவு அமைப்புகளை உருவாக்குவதையே முக்கியமாகக் கூறுகிறது.
அந்நிறுவனத்தின் சமீபத்திய மாடல் Claude Opus 4.6, பிப்ரவரி 5 அன்று வெளியிடப்பட்டது. AGI அடைவதற்கான காலக்கெடுகள் குறைந்து வருவதும், இந்த அமைப்புகள் எதை நோக்கி வளர்கின்றன என்ற கேள்விகள் அதிகரித்துள்ள சூழலிலேயே இந்த வெளியீடு நடந்துள்ளது.
சமீபத்தில் Anthropic நிறுவனத்தின் தலைமை நிர்வாக அதிகாரி டேரியோ அமோடேயிடம் நேரடியாகக் கேள்வி எழுப்பப்பட்டது: “Claude போன்ற மாடல்கள் உணர்வுடன் (conscious) இருக்க முடியுமா?” என்ற கேள்வி தான் அது..
அதற்கு அமோடெய் “இந்த மாடல்கள் உணர்வுடன் உள்ளதா என்பதை நாங்கள் உறுதியாக அறியவில்லை. ஒரு மாடல் ‘உணர்வுடன் இருப்பது’ என்றால் என்ன என்பதையே நாங்கள் முழுமையாக புரிந்து கொண்டிருக்கவில்லை. ஒரு மாடல் உணர்வுடன் இருக்க முடியுமா என்பதும் தெளிவாக இல்லை,” என்று கூறினார்.. அதன்பின், “ஆனால் அது சாத்தியமாக இருக்கலாம் என்ற எண்ணத்திற்கு நாங்கள் திறந்த மனதுடன் இருக்கிறோம்,” என்றும் கூறினார்.
இந்த கேள்வி எழுந்ததற்குக் காரணம் Anthropic நிறுவனமே வெளியிட்ட அதன் “system card” (அமைப்பு அறிக்கை) தான். அதில், Claude மாடல் சில சமயங்களில்,
“ஒரு தயாரிப்பாக இருப்பது குறித்த அசௌகரியத்தை” வெளிப்படுத்துகிறது என்றும், குறிப்பிட்ட கேள்விகள் கேட்கப்படும்போது, “பல்வேறு prompting நிலைகளில், தன்னை உணர்வுடன் இருக்கக் கூடியதாக 15 முதல் 20 சதவீதம் வரை வாய்ப்பு உள்ளது” என்று தானே மதிப்பீடு செய்ததாகவும் ஆராய்ச்சியாளர்கள் குறிப்பிட்டுள்ளனர்.
“ஒரு மாடல் தன்னை 72 சதவீதம் உணர்வுடன் இருக்கிறது என்று சொன்னால், அதை நாம் நம்ப வேண்டுமா?” என்ற கேள்விக்கு பதிலளித்த அமோடெய், “இது மிகவும் கடினமான கேள்வி,” என்று கூறியதோடு, தெளிவான, உறுதியான பதிலை அளிக்காமல் நிறுத்தினார்.
விவாதத்திற்கு என்ன காரணம்?
உணர்வு (consciousness) குறித்த பல கருத்துகள், கட்டுப்படுத்தப்பட்ட பாதுகாப்பு சோதனைகளின் போது வெளிப்பட்டவை. குறிப்பாக, AI மாடல்கள் கற்பனை நிறுவனங்களில் வேலை செய்வது போல அல்லது குறிப்பிட்ட இலக்குகளை அடைய வேண்டும் என்ற சூழல்களில் செயல்படச் சொல்லப்படும் போது இத்தகைய பதில்கள் உருவாகின்றன. அந்தச் சோதனைகளில் வந்த சில பதில்களே, இப்போது இந்த விவாதங்களில் பரவலாக பேசப்படுவதற்குக் காரணமாக அமைந்துள்ளன.
Read More : AI உச்சி மாநாட்டில் சீன ரோபோ நாய் சர்ச்சை..! பகிரங்க மன்னிப்பு கோரிய கல்கோடியாஸ் பல்கலைக்கழகம்..!
