சர்க்கரை நோய் அல்லது நீரிழிவு என்பது தற்காலத்தில் ஒரு உலகளாவிய சுகாதார நெருக்கடியாக உருவெடுத்துள்ளது. குறிப்பாக, இந்தியாவில் 2025-ஆம் ஆண்டு மேற்கொள்ளப்பட்ட சமீபத்திய ஆய்வுகளின்படி, வயது வித்தியாசமின்றி ஆண்கள் மற்றும் பெண்கள் என இருபாலரிடமும் நீரிழிவு பாதிப்பு மிகத் தீவிரமாக அதிகரித்துள்ளது கவலையை ஏற்படுத்தியுள்ளது. இதற்குப் போதிய உடலுழைப்பு இல்லாத நவீன வாழ்க்கை முறையும், சத்துக்கள் குறைந்த உணவுப் பழக்கங்களுமே முதன்மைக் காரணங்களாக முன்வைக்கப்படுகின்றன.
சர்க்கரை நோய் உறுதியானவுடன் பலரும் செய்யும் முதல் காரியம், தங்களது பாரம்பரிய உணவுகளை விடுத்து மாற்று உணவுகளை தேடுவதுதான். இதில் படித்தவர்கள் ‘இன்ஸ்டன்ட் ஓட்ஸ்’ (Instant Oats) கஞ்சியை தேர்ந்தெடுக்கிறார்கள், சாமானிய மக்கள் ராகி அல்லது கேழ்வரகு கூழை ஆரோக்கியமானது என்று கருதி அருந்துகிறார்கள். ஆனால், உண்மை என்னவென்றால் இவை இரண்டுமே இரத்தத்தில் சர்க்கரையின் அளவை மிக வேகமாக அதிகரிக்கச் செய்யும் தன்மை கொண்டவை என்கின்றனர் மருத்துவ வல்லுநர்கள்.
சிறுதானியங்கள் அனைத்தும் சர்க்கரை நோயாளிகளுக்கு உகந்தது என்று பொதுவாகக் கருதப்பட்டாலும், அவற்றின் ‘கிளைசீமிக் இன்டெக்ஸ்’ (Glycemic Index – GI) மற்றும் ‘கிளைசீமிக் லோடு’ (Glycemic Load – GL) ஆகியவற்றில் பெரும் வேறுபாடுகள் உள்ளன. சாமை, திணை, குதிரைவாலி, வரகு மற்றும் பனிவரகு போன்றவை குறைவான கிளைசீமிக் மதிப்பைக் கொண்ட நேர்மறையான சிறுதானியங்களாகும். இவற்றை உளுந்து, வெந்தயம் மற்றும் பாசிப்பருப்பு சேர்த்து இட்லி, தோசையாகவோ அல்லது பொங்கலாகவோ செய்து சாப்பிடும்போது இரத்த சர்க்கரை அளவு கட்டுப்பாட்டில் இருக்கும். ஆனால், கம்பு போன்றவை மிதமான அளவிலேயே நற்பலன் தருகின்றன.
ராகி கூழ் ஏன் ஆபத்தானது? சிறுதானியங்களிலேயே அதிக கிளைசீமிக் குறியீட்டை (GI – 70) கொண்டது ராகி எனப்படும் கேழ்வரகு ஆகும். பொதுவாக, கிளைசீமிக் லோடு 10-க்கு கீழ் இருந்தால் தாராளமாகவும், 10 முதல் 20 வரை இருந்தால் அளவோடும் சாப்பிடலாம். 100 கிராம் ராகியில் இதன் அளவு 15 முதல் 18 வரை உள்ளது. ராகியைத் திரவ வடிவில் கூழாகவோ அல்லது கஞ்சியாகவோ பருகும்போது, நாம் 100 கிராமுடன் நிறுத்துவதில்லை; இரண்டு மூன்று கோப்பைகள் வரை அருந்துகிறோம். இதனால் கிளைசீமிக் லோடு இரண்டு மூன்று மடங்காக உயர்ந்து, இரத்தத்தில் சர்க்கரையின் அளவை சட்டென்று ஏற்றிவிடுகிறது.
ராகியில் கால்சியம் சத்து அதிகம் இருப்பது உண்மைதான் என்றாலும், சர்க்கரை நோயாளிகளுக்கு அதன் திரவ வடிவம் பாதிப்பையே ஏற்படுத்தும். எனவே, ராகி சாப்பிட விரும்புவோர் அதை கூழாகவோ, கஞ்சியாகவோ குடிப்பதை முற்றிலுமாகத் தவிர்க்க வேண்டும். அதற்குப் பதிலாக, குறைந்த அளவில் (சுமார் 100 கிராம்) ராகிக் களியாகச் செய்து சாப்பிடுவதே பாதுகாப்பானது. இதன் மூலம் இரத்த சர்க்கரை அளவு திடீரென உயராமல் கட்டுக்குள் இருக்கும்.
