தமிழகத்தின் பொருளாதார கட்டமைப்பை அடுத்தகட்டத்திற்கு எடுத்துச் செல்லும் நோக்கோடும், மாநிலத்தின் ஒட்டுமொத்த வளர்ச்சியில் பெண்களின் பங்களிப்பை உறுதி செய்யவும் ‘தமிழ்நாடு மகளிர் தொழில் முனைவோர் மேம்பாட்டுத் திட்டம்’ (Tamil Nadu Women Entrepreneurship Development Scheme) பெரும் எழுச்சியுடன் செயல்படுத்தப்பட்டு வருகிறது. குறிப்பாக, சிறு, குறு மற்றும் நடுத்தரத் தொழில் (MSME) துறைகளில் பெண்களை அதிகாரமிக்கவர்களாக மாற்றுவதே இத்திட்டத்தின் அடிப்படை நோக்கமாகும்.
அடுத்த 5 ஆண்டுகளில் தமிழகம் முழுவதும் சுமார் ஒரு லட்சம் புதிய பெண் தொழில் முனைவோரை உருவாக்க வேண்டும் என்ற லட்சிய இலக்கை நிர்ணயித்து அரசு காய்களை நகர்த்தி வருகிறது. இதற்காக, மாவட்ட தொழில் மையங்கள் (DIC) முன்னிலையில் பல்வேறு சிறப்பு முகாம்கள் மற்றும் வழிகாட்டுதல் நிகழ்ச்சிகள் நடத்தப்பட்டு வருகின்றன.
இந்த விரிவான திட்டத்தின் ஒரு பகுதியாக, நடப்பு நிதியாண்டில் மட்டும் முதற்கட்டமாக 392 பெண் பயனாளிகளுக்குத் தொழில் தொடங்குவதற்கான வங்கிக் கடன்களை வழங்க இலக்கு நிர்ணயிக்கப்பட்டுள்ளது. இதற்கான விண்ணப்பங்கள் பரிசீலிக்கப்பட்டு, தகுதியான பெண்களுக்கு நிதி உதவிகள் விரைவாக கிடைப்பதற்கான ஏற்பாடுகளை தமிழக அரசு முடுக்கிவிட்டுள்ளது.
வெறும் நிதி உதவி வழங்குவதோடு மட்டுமல்லாமல், பெண்களுக்குத் தேவையான தொழில்நுட்பப் பயிற்சிகள், சந்தைப்படுத்துதல் உத்திகள் மற்றும் தொழிலை வெற்றிகரமாக நடத்துவதற்கான ஆலோசனைகளையும் மாவட்ட வாரியாக வழங்கத் திட்டமிடப்பட்டுள்ளது. பெண்களின் வாழ்வாதாரத்தை உயர்த்துவது மட்டுமின்றி, தமிழகத்தை இந்தியாவின் ‘தொழில் புரட்சி மாநிலமாக’ நிலைநிறுத்த இந்தத் திட்டம் ஒரு வலுவான அடித்தளமாக அமையும் என்று எதிர்பார்க்கப்படுகிறது.
