அன்றாட வாழ்க்கையின் சலசலப்பால் சோர்வடைந்த மனதுக்கும் உடலுக்கும் புத்துணர்ச்சி தரும் பயண இடங்கள் எப்போதும் மக்களின் விருப்பமாகவே இருக்கின்றன. அதிலும் பலர் அமைதியான, குறைவாக ஆராயப்பட்ட இடங்களை நாடி வருகின்றனர். அப்படிப்பட்ட ஒரு இடமே முக்தேஷ்வர், நைனிடாலில் இருந்து வெறும் 51 கிலோமீட்டர் தொலைவில் அமைந்துள்ள குமாவோன் மலைகளின் மறைக்கப்பட்ட புதையல்.
2,171 மீட்டர் உயரத்தில் அமைந்துள்ள முக்தேஷ்வர், பைன், ரோடோடென்ட்ரான் மற்றும் சிடார் காடுகளால் சூழப்பட்ட அமைதியான கிராமம். கல் மற்றும் மரத்தால் ஆன அழகிய வீடுகள், கோடை மற்றும் இலையுதிர் காலங்களில் மலரும் ஆப்பிள், பாதாமி தோட்டங்கள், மேலும் கண்கவர் இமயமலை சிகரக் காட்சிகள் இவை அனைத்தும் பார்வையாளர்களை கவர்ந்திழுக்கின்றன. குறிப்பாக, முக்தேஷ்வரின் சூரிய உதயமும் அஸ்தமனமும் பார்ப்பவரின் மனதில் அழியாத நினைவுகளை உருவாக்கும்.
முக்தேஷ்வர் வெறும் இயற்கை அழகுக்காக மட்டுமல்ல, ஆன்மீக புண்ணியத்திற்கும் பிரபலமானது. உயரமான பாறையின் மேல் 350 ஆண்டுகளுக்கு முன் கட்டப்பட்ட முக்தேஷ்வர் சிவன் கோவில் முக்கிய ஈர்ப்பு மையமாக உள்ளது.
மேலும், பாறை ஏறுதல், ராப்பெல்லிங், மலையேற்றம், முகாம் போன்ற சாகச நடவடிக்கைகளுக்கும் முக்தேஷ்வர் சிறந்த இடமாக விளங்குகிறது.
இங்கு பெரிய வணிக ஹோட்டல்கள் குறைவாக இருந்தாலும், அழகிய ஹோம்ஸ்டேக்கள், காட்டேஜ்கள் உள்ளன. இது பயணிகளுக்கு இயற்கையின் மடியில் அமைதியாகவும், வீட்டுச் சூழலோடு கூடிய அனுபவத்தையும் வழங்குகிறது.
எப்படி செல்லலாம்?
* நைனிடாலிலிருந்து முக்தேஷ்வர் 51 கிலோமீட்டர் தூரத்தில் உள்ளது. டாக்சி எடுத்து செல்லலாம் அல்லது பேருந்தில் போகலாம். சுமார் 1.5 முதல் 2 மணி நேரத்தில் அடையலாம்.
* டெல்லியிலிருந்து வருபவர்கள் முதலில் நைனிடாலுக்கு சென்று, அங்கிருந்து முக்தேஷ்வருக்குப் போக வேண்டும்.
* ரயில் வழியாக முக்தேஷ்வருக்கு நேரடி ரயில் இல்லை. அருகிலுள்ள ரயில் நிலையம் கத்கோடம் (74 கிமீ). அங்கிருந்து டாக்சியில் முக்தேஷ்வரை அடையலாம்.
Read more: துர்காதேவி தேவி சிலைகளை கரைக்கும் போது விபரீதம்.. 10 குழந்தைகள் உட்பட 13 பேர் நீரில் மூழ்கி பலி..!!
