அமெரிக்கா, இஸ்ரேல் மற்றும் ஈரான் ஆகிய நாடுகளுக்கு இடையேயான மோதல் 4வது வாரத்தில் நுழைந்துள்ள நிலையில், போர் எவ்வாறு தொடங்கியது என்பது குறித்து அதிபர் டொனால்ட் டிரம்ப் ஒரு புதிய விளக்கத்தை அளித்துள்ளார். இராணுவ நடவடிக்கைக்கு அழுத்தம் கொடுத்த முதல் மூத்த அதிகாரிகளில் பாதுகாப்புச் செயலாளர் பீட் ஹெக்ஸெத்தும் ஒருவர் என்று டிரம்ப் குறிப்பிடுகிறார். ஹெக்ஸெத் இந்த இராணுவ நடவடிக்கையின் பொது முகமாக இருந்து வருகிறார், மேலும் பென்டகனில் ஊடகங்களுக்கு அடிக்கடி உரையாற்றி வருகிறார்.
டென்னசியில் நடந்த ஒரு வட்டமேசை மாநாட்டில் பேசிய டிரம்ப், தனக்கு அருகில் ஹெக்ஸெத் அமர்ந்திருக்க, “பீட், நீங்கள்தான் முதலில் குரல் கொடுத்தீர்கள் என்று நான் நினைக்கிறேன். ‘அவர்கள் அணு ஆயுதம் வைத்திருப்பதை நாம் அனுமதிக்க முடியாது என்பதால், இதைச் செய்வோம்’ என்று நீங்கள் கூறினீர்கள்,” என்றார்.
உள்நாட்டு ஆலோசனைகளை விவரித்த டிரம்ப், நடவடிக்கை எடுப்பதற்கு முன்பு மூத்த அதிகாரிகளுடன் கலந்தாலோசித்ததாகக் கூறினார். “நான் பீட்டை அழைத்தேன், ஜெனரல் கெய்னை அழைத்தேன், நமது சிறந்த மனிதர்கள் பலரை அழைத்தேன்… ‘நாம் பேசுவோம். மத்திய கிழக்கில் நமக்கு ஒரு சிக்கல் உள்ளது… அவர்கள் அணு ஆயுதம் வைத்திருப்பதற்கு மிக அருகில் உள்ளனர்’ என்று கூறினேன்.
இதற்கு முடிவே இல்லை… அல்லது நாம் ஒரு தாக்குதல் மத்திய கிழக்குக்குள் ஒரு சிறிய பயணம் மேற்கொண்டு, ஒரு பெரிய பிரச்சனையைத் தீர்க்கலாம்,” என்று அவர் கூறினார்.
போர் எப்படி தொடங்கியது..?
இந்த மோதல் எவ்வாறு தொடங்கியது என்பது குறித்து மாறுபட்ட விளக்கங்கள் உள்ளன. சிலர், இஸ்ரேல் ஏற்கனவே தாக்குதல்களைத் தொடங்கத் தயாராக இருந்ததாகவும், அதுவே இறுதியில் அமெரிக்காவை உள்ளே இழுத்ததாகவும் கூறுகின்றனர். மற்றவர்களோ, ஈரான் அணு ஆயுதத்தை உருவாக்கும் தருவாயில் இருப்பதாகக் கூறப்படும் கவலைகள், இந்த மோதல் தீவிரமடைவதைத் தூண்டுவதில் முக்கியப் பங்கு வகித்ததாக வாதிடுகின்றனர்.
முன்னதாக, இந்தப் போர் தொடங்கியதற்கு டிரம்ப் பல்வேறு விளக்கங்களை அளித்திருந்தார். ஒரு கட்டத்தில், ஈரான் அணு ஆயுதங்களை உருவாக்குவதைத் தடுப்பதை நோக்கமாகக் கொண்டே இந்த இராணுவ நடவடிக்கை எடுக்கப்பட்டதாக அவர் கூறினார். மற்றொரு முறை, தெஹ்ரான் மீதான வான்வழித் தாக்குதல்கள் ஒரு பரந்த பிராந்திய மோதலைத் தவிர்ப்பதற்கான ஒரு முன்னெச்சரிக்கை நடவடிக்கை என்று அவர் விவரித்தார். பின்னர் ஹார்முஸ் நீரிணையை திறக்க ஈரானுக்கு 48 மணி நேரம் கெடு விதித்த டிரம்ப், காலக்கெடு முடிவதற்குள் 5 நாட்களுக்கு தாக்குதலை நிறுத்துவதாக டிரம்ப கூறினார்..
அமெரிக்க-ஈரான் போர் ஏப்ரல் 9 அன்று முடிவுக்கு வருமா?
இதனிடையே ஈரானின் எரிசக்தி உள்கட்டமைப்புகள் மீதான தாக்குதல்களை நிறுத்தி வைக்கும் தனது முடிவை அமெரிக்க அதிபர் டொனால்ட் டிரம்ப் அறிவித்ததை தொடர்ந்து, ஈரானுக்கு எதிரான தற்போதைய போரை ஏப்ரல் 9-ம் தேதி முடிவுக்கு கொண்டு வர அமெரிக்கா முடிவு செய்துள்ளதாக தகவல்கள் தெரிவிக்கின்றன..
அமெரிக்காவிற்கும் ஈரானுக்கும் இடையே பாகிஸ்தானின் இஸ்லாமாபாத்தில் ஒரு சந்திப்பைக் கூட்ட மத்தியஸ்த நாடுகள் முயற்சி செய்து வருவதாகவும், அது இந்த வாரத்தின் பிற்பகுதியில் நடைபெறக்கூடும் என்றும் பெயர் குறிப்பிடப்படாத ஒரு இஸ்ரேலிய அதிகாரி கூறியதாக செய்தி வெளியிட்டுள்ளது.
இந்த விவாதங்கள் குறித்தோ அல்லது இதில் தங்களுக்கு தொடர்பில்லை என்று ஈரான் மறுத்துள்ளது.. மேலும், நிதிச் சந்தைகளைக் கையாளும் நோக்கம் கொண்ட போலிச்செய்தி என்றும் ஈரான் கூறியிருந்தது.
