நாட்டில் தகுதியற்ற மற்றும் போலியாக பயன்படுத்தப்படும் ரேஷன் கார்டுகளை ஒழிக்கும் முயற்சியில் மத்திய – மாநில அரசுகள் தீவிர நடவடிக்கைகளை எடுத்து வருகின்றன. இதன் விளைவாக, விதிகளைப் பின்பற்றாத லட்சக்கணக்கான ரேஷன் கார்டுகள் ரத்து செய்யப்பட்டு வருகின்றன. இதனால் உண்மையான ஏழை பயனாளிகளுக்குச் சேர வேண்டிய மானியங்கள் கிடைக்காமல் போவதற்கு வாய்ப்பு உள்ளது. எனவே, உங்கள் ரேஷன் கார்டின் பாதுகாப்பை உறுதி செய்ய, பொதுமக்கள் உடனடியாகச் சில முக்கிய விஷயங்களைக் கடைப்பிடிக்க வேண்டியது அவசியம்.
ரேஷன் கார்டு ரத்தாவதற்கான முக்கிய காரணங்கள் :
* அனைத்து ரேஷன் கார்டுதாரர்களும் e-KYC (ஆதார் அடிப்படையிலான பயோமெட்ரிக் அல்லது OTP) சரிபார்ப்பை முடிப்பது கட்டாயமாகும். இதைச் செய்யத் தவறினால், மானியங்கள் நிறுத்தப்பட்டு, கார்டு செயலிழக்கக்கூடும்.
* ஒன்றுக்கும் மேற்பட்ட கார்டுகள் மூலம் நடக்கும் மோசடிகளைத் தடுக்க, ரேஷன் கார்டை ஆதார் எண்ணுடன் இணைப்பது கட்டாயமாக்கப்பட்டுள்ளது. இணைக்கப்படாத கார்டுகள் ரத்து செய்யப்படும்.
* ஒரு ரேஷன் கார்டுதாரர் தொடர்ச்சியாக 6 மாதங்களுக்கு நியாய விலைக் கடைகளில் எந்தப் பொருளையும் வாங்கவில்லை என்றால், அவருக்குப் பொருட்கள் தேவையில்லை எனக் கருதி, அரசு அந்தக் கார்டைச் செயலிழக்கச் செய்யும். (ரத்தான கார்டை 3 மாதங்களுக்குள் e-KYC மூலம் மீண்டும் ஆக்டிவேட் செய்யலாம்.)
* வறுமைக் கோட்டிற்குக் கீழ் உள்ளவர்களுக்கான பி.பி.எல். (BPL) கார்டுகள் அதிக வருமானம் ஈட்டுபவர்கள், அரசு ஊழியர்கள் அல்லது வருமான வரி செலுத்துபவர்கள் வசம் இருப்பது தணிக்கையில் கண்டறியப்பட்டால், அந்தக் கார்டுகள் உடனடியாக ரத்து செய்யப்படும்.
கார்டு ரத்தானால் ஏற்படும் பாதிப்புகள் :
ரேஷன் கார்டு ரத்து செய்யப்பட்டால், தேசிய உணவுப் பாதுகாப்புச் சட்டத்தின் கீழ் கிடைக்கும் மானிய விலை உணவுப் பொருட்கள் மட்டுமின்றி, ஆயுஷ்மான் பாரத் மருத்துவக் காப்பீடு, வீட்டுவசதி திட்டங்கள் போன்ற பிற முக்கிய அரசு நலத்திட்ட உதவிகளைப் பெறுவதிலும் சிக்கல்கள் ஏற்படும். மேலும், பல இடங்களில் அடையாள மற்றும் வசிப்பிடச் சான்றாகப் பயன்படுத்தப்படும் முக்கிய ஆவணமும் இல்லாமல் போகும்.
செய்ய வேண்டியவை :
உங்கள் ரேஷன் கார்டு செயலில் உள்ளதா என்பதை உங்கள் மாநிலத்தின் பொது விநியோகத் திட்ட இணையதளத்தில் சரிபார்க்க வேண்டும். அருகிலுள்ள நியாய விலைக் கடைக்குச் சென்று உடனடியாக e-KYC சரிபார்ப்பை முடிக்கவும். ஆதார் இணைப்பை மேற்கொள்ளாதவர்கள், ஆன்லைன் அல்லது அலுவலகங்கள் மூலம் உடனடியாக இணைக்க வேண்டும். மேலும், கார்டைச் செயலில் வைத்திருக்க, ஒவ்வொரு மாதமும் தவறாமல் ரேஷன் பொருட்களை வாங்குவது அவசியம் ஆகும்.
