தமிழ்நாடு முழுவதும் நேற்று (நவம்பர் 16) நடிகர் விஜய் தலைமையிலான தமிழக வெற்றிக் கழகம் சார்பில், வாக்காளர் பட்டியல் சிறப்புத் தீவிர திருத்தப் பணிகளுக்கு (SIR) எதிராகப் போராட்டங்கள் நடைபெற்றன. இந்தப் போராட்டங்கள் நடந்து முடிந்த சில மணி நேரங்களிலேயே, அக்கட்சியில் இருந்து விலகும் நிகழ்வுகள் அரங்கேறி, பெரும் பரபரப்பை ஏற்படுத்தியுள்ளன.
காலையில் தமிழ்நாடு முழுவதும் தவெக நடத்திய போராட்டங்கள் நடந்து முடிந்த நிலையில், மாலையில் அக்கட்சியில் இருந்து விலகுவதாக அறிவித்து, பல இளைஞர்கள் சமூக வலைத்தளங்களில் வீடியோக்களை வெளியிட்டனர். அந்த வீடியோக்களில், தாங்கள் வைத்திருந்த தவெக உறுப்பினர் அட்டைகளை உடைத்தும் கிழித்தும் போடுகின்றனர். அத்துடன், கட்சியின் முக்கிய நிர்வாகியான புஸ்ஸி ஆனந்துடன் தாங்கள் எடுத்துக்கொண்ட புகைப்படங்களையும் கிழித்துப் போட்டு, தங்கள் எதிர்ப்பைப் பதிவு செய்தனர்.
இந்த விலகல் மற்றும் எதிர்ப்பு வீடியோக்கள் குறித்து தமிழக வெற்றிக் கழகத்தின் நிர்வாகிகள் பதிலடி கொடுத்துள்ளனர். “கட்சியில் இருந்து இளைஞர்கள் விலகுவது போல் வெளியாகும் இந்த வீடியோக்கள் அனைத்தும், கட்சியின் வளர்ச்சியைத் தாங்க முடியாத சிலரால் திட்டமிட்டு நடத்தப்படும் அரசியல் நாடகம் மற்றும் பொய்ப் பிரசாரம்” என்று கருத்து தெரிவித்துள்ளனர். கட்சியைப் பலவீனப்படுத்த நடக்கும் இதுபோன்ற முயற்சிகளுக்கு தாங்கள் அஞ்சப் போவதில்லை என்றும் அவர்கள் உறுதியளித்துள்ளனர்.
