ஜம்மு-காஷ்மீர் மாநிலம், கத்ராவில் உள்ள அர்த்தகுமாரி அருகே மாதா வைஷ்ணோ தேவி யாத்திரைப் பாதையில் புதன்கிழமை ஏற்பட்ட நிலச்சரிவில் குறைந்தது 31 பேர் உயிரிழந்துள்ளனர். மேலும் 23 பேர் காயமடைந்துள்ளனர். இன்னும் பலர் இடிபாடுகளுக்குள் சிக்கியிருக்கலாம் என்பதால், தேசிய மற்றும் மாநில மீட்புக் குழுக்கள் தீவிரமாக தேடுதல், மீட்பு பணிகளில் ஈடுபட்டுள்ளன.
ஜம்மு-காஷ்மீர் முழுவதும் இடைவிடாத மழையால் திடீர் வெள்ளம், நிலச்சரிவு போன்றவை ஏற்பட்டுள்ளன. பாலங்கள் இடிந்து விழுந்தன, மின் இணைப்புகள் துண்டிக்கப்பட்டன, மொபைல் கோபுரங்கள் சேதமடைந்தன. மாவட்டம் முழுவதும் நீர் தேக்கம் ஏற்பட்டதால், இதுவரை 3,500க்கும் மேற்பட்டோர் வெளியேற்றப்பட்டுள்ளனர்.
செவ்வாய்க்கிழமை காலை 11.30 மணி முதல் மாலை 5.30 மணி வரை வெறும் ஆறு மணி நேரத்தில் 22 செ.மீ. மழை பதிவானது. தெற்கு காஷ்மீரில் ஜீலம் நதிக்கு வெள்ள எச்சரிக்கை விடுக்கப்பட்டுள்ளது; நீர்மட்டம் 22 அடி தாண்டியது. வானிலை ஆய்வு மையம், மேகங்கள் 12 கி.மீ உயரம் வரை உயர்ந்து “சுறுசுறுப்பு மிக்க புயல்” உருவாகியுள்ளதாக எச்சரித்துள்ளது.
மாதா வைஷ்ணோ தேவி யாத்திரைப் பாதையில் செவ்வாய்க்கிழமையும் நிலச்சரிவு ஏற்பட்டது; அப்போது 9 பேர் பலியாகினர், 21 பேர் காயமடைந்தனர். தற்போதைய நிலச்சரிவில் உயிரிழந்தவர்களின் எண்ணிக்கை தொடர்ந்து உயரும் அபாயம் இருப்பதாக அதிகாரிகள் தெரிவித்துள்ளனர்.
முதல்வர் உமர் அப்துல்லா, “கனமழையால் தகவல் தொடர்பு சேவைகள் கடுமையாக பாதிக்கப்பட்டுள்ளன; இணையம், தொலைபேசி அனைத்தும் துண்டிக்கப்பட்ட நிலையில் நெருக்கடி அதிகரித்துள்ளது” என்று குறிப்பிட்டார். தேசிய பேரிடர் மீட்புப் படை (NDRF), துணைப் பேரிடர் மீட்புப் படை (SDRF), இந்திய ராணுவம், உள்ளூர் தன்னார்வலர்கள் ஆகியோர் இணைந்து மீட்பு பணிகளில் ஈடுபட்டுள்ளனர். பள்ளிகள் அனைத்தும் ஆகஸ்ட் 27 வரை மூடப்பட்டுள்ளன; 10 மற்றும் 11 ஆம் வகுப்பு தேர்வுகள் ரத்து செய்யப்பட்டன.
ரயில் மற்றும் போக்குவரத்து பாதிப்பு: வடக்கு ரயில்வே, கடுமையான வானிலை காரணமாக ஜம்மு மற்றும் கத்ரா நிலையங்களில் இருந்து 22 ரயில்களை ரத்து செய்துள்ளது. 27 ரயில்கள் குறுகிய தூரத்தில் நிறுத்தப்பட்டன. ஹிமாச்சலப் பிரதேசத்தில் பதான்கோட் – காந்த்ரோரி இடையேயான ரயில் சேவைகள் வெள்ளத்தால் நிறுத்தப்பட்டுள்ளன. ஆனால், கத்ரா – ஸ்ரீநகர் பாதையில் சேவை தொடர்கிறது.
