8வது ஊதியக் குழுவில் அரசு ஊழியர்களுக்கு 54% வரை சம்பள உயர்வு இருக்கக்கூடும் என்று தகவல்கள் தெரிவிக்கின்றன.
கடந்த ஜனவரி மாதம் 8வது ஊதியக் குழு தொடர்பான அறிவிப்பை மத்திய அரசு வெளியிட்டது.. எனினும் இந்த ஊதியக் குழு இன்னும் அமைக்கப்படவில்லை. ஆனால், ஃபிட்மென்ட் காரணி தொடர்பான விவாதங்கள் தொடர்ந்து நடந்து வருகின்றன.. இந்த நிலையில் நிதிச் சேவை நிறுவனமான அம்பிட் கேபிடல் வெளியிட்டுள்ள அறிக்கை, புதிய ஊதியக் குழு ஊழியர்களுக்கு 1.83 முதல் 2.46 வரை ஃபிட்மென்ட் காரணியை பரிந்துரைக்கக்கூடும் என்று மதிப்பிட்டுள்ளது. முந்தைய ஊதியக் குழுக்களின் போது சம்பள வளர்ச்சியின் அடிப்படையில் இந்த மதிப்பீடு செய்யப்பட்டுள்ளது.
அறிக்கையின்படி, 8வது ஊதியக் குழுவில் உண்மையான சம்பள உயர்வு (அடிப்படை ஊதியம் + அகவிலைப்படி உட்பட) குறைந்தது 14% ஆகவும், அதிகபட்சம் 54% ஆகவும் இருக்கலாம். இருப்பினும், அதிகபட்சமாக 54% உயர்வுக்கான சாத்தியக்கூறு மிகக் குறைவு என்றும், ஏனெனில் இது அரசாங்கத்தின் மீது பெரும் நிதிச் சுமையை ஏற்படுத்தும் என்றும் அறிக்கை கூறுகிறது.
அம்பிட் கேபிடல் அறிக்கையின், “நுகர்வை அதிகரிக்க அரசாங்கம் அதிக சம்பள உயர்வைக் கருத்தில் கொள்ளலாம், ஆனால் 6வது ஊதியக் குழுவைப் போல 54% உயர்வு சாத்தியமில்லை என்று தோன்றுகிறது.” என்று தெரிவிக்கப்பட்டுள்ளது.
நடுத்தர வரம்பில் 30-34% அதிகரிப்பு?
அம்பிட் கேபிடல் பகுப்பாய்வின்படி, 30-34% ‘நடுத்தர வரம்பில்’ அதிகரிப்பு என்பது அரசாங்கமும் ஆணையமும் பரிசீலிக்கக்கூடிய மதிப்பீடாகும். அறிக்கையின்படி, மோசமான சூழ்நிலை 14.3% அதிகரிப்பாகவும், சிறந்த சூழ்நிலை 54% அதிகரிப்பாகவும் இருக்கலாம். இதைக் கருத்தில் கொண்டு, மூன்று சாத்தியமான ஃபிட்மெண்ட் காரணிகள் சரி செய்யப்பட்டுள்ளன, அதாவது குறைந்தபட்சம் 1.83, சராசரி 2.15 மற்றும் அதிகபட்சம் 2.46 என்று நிர்ணயிக்கப்பட்டுள்ளன.
சம்பளம் எவ்வளவு உயரும்?
ஒரு ஊழியரின் தற்போதைய அடிப்படை சம்பளம் ₹40,000 என்றால், 8வது ஊதியக் குழுவின் வெவ்வேறு பொருத்தக் காரணிகளின்படி சாத்தியமான மொத்த சம்பளம் (அடிப்படை + டிஏ உட்பட) இப்படி இருக்கலாம்:
| ஃபிட்மென்ட் காரணி | தற்போதைய அடிப்படை சம்பளம் | சாத்தியமான சம்பளம் |
| 1.83 | ₹40,000 | ₹ 92,238 |
| 2.15 | ₹40,000 | ₹1,09,002 |
| 2.46 | ₹40,000 | ₹1,20,933 |
60% வரை டிஏ அதிகரிப்பு
தற்போது அகவிலைப்படி (டிஏ) சுமார் 55% என்றும், 2025 ஆம் ஆண்டின் இறுதிக்குள் அது 60% ஐ எட்டக்கூடும் என்றும் அறிக்கை கூறியுள்ளது. இதுபோன்ற சூழ்நிலையில், 8வது ஊதியக் குழுவின் கீழ் சுமார் 14% சம்பள வளர்ச்சி உறுதியானது என்று கருதப்படுகிறது. எனினும் அரசு ஊழியர்களும் ஓய்வூதியதாரர்களும் 8வது சம்பளக் குழுவின் உருவாக்கம் மற்றும் அதன் பணி விதிமுறைகள் அறிவிப்புக்காக ஆவலுடன் காத்திருக்கின்றனர்.
