உத்தரபிரதேச மாநிலம் ஆக்ரா நகரின் நக்லா தல்ஃபி பகுதியில் வசித்து வரும் இளைஞர் கர்மவீர் சிங். இவர் கடந்த சில வருடங்களாக அரசு வேலைக்கு முயற்சி செய்து வந்தார். அதேபோல், இந்திய ராணுவத்தில் சேர்வதற்கும் முயற்சி செய்துள்ளார். ஆனால், அவருக்கு எந்த வேலையும் கிடைக்கவில்லை.
இந்நிலையில், வேலை கிடைக்காததால் மிகுந்த மன உளைச்சலில் இருந்த கர்மவீர் சிங் நேற்று யமுனை ஆற்றில் குதித்து தற்கொலை செய்துகொண்டார். ஆற்றில் குதிப்பதற்கு முன்பாக அரசு வேலை கிடைக்காததால் வேறுவழியின்றி தற்கொலை செய்துகொள்கிறேன் என்று தனது வாட்ஸ்-அப்பில் ஸ்டேட்டஸ் வைத்துவிட்டு ஆற்றில் குதித்துள்ளார்.
இதை பார்த்த, நண்பர்கள் மற்றும் உறவினர்கள் கர்மவீரை தேடினர். மேலும் இது குறித்து காவல் நிலையத்தில் தகவல் அளித்தனர். இதைத் தொடர்ந்து, தேடுதலை தொடங்கிய காவல்துறையினர் ஆக்ராவில் யமுனை ஆற்றின் கரையோரம் கர்மவீரின் செல்போன் மற்றும் செருப்பு இவைகளை கண்டெடுத்தனர். அவர் ஆற்றுக்குள் குதித்து தற்கொலை செய்து கொண்டதாக தெரிவித்த காவல்துறையினர் கர்மவீரின் உடலை தேடி வருகின்றனர்.
