நர்சிங் கல்லூரி மாணவி ஒருவரிடம் ஆசிரியர் தனது காம இச்சைக்கு அடிபணியுமாறு பேசும் செல்போன் ஆடியோ இணையத்தில் வெளியாகி பெரும் அதிர்ச்சியை ஏற்படுத்தியுள்ளது.
நாகை மாவட்டம் புத்தூர் பகுதியில் பாஜக நிர்வாகி கார்த்திகேயனுக்கு சொந்தமான நர்சிங் கல்லூரி செயல்பட்டு வருகிறது. இந்த கல்லூரியில் நூற்றுக்கும் மேற்பட்ட மாணவிகள் பயின்று வருகின்றனர். மேலும், இக்கல்லூரியில் உடற்கூறியியல் ஆசிரியராக பணிபுரியும் நாகை வெளிப்பாளையம் பகுதியை சேர்ந்த சதிஷ் என்பவர் மாணவிகளிடம் அடிக்கடி பாலியல் சில்மிஷத்தில் ஈடுபடுவார் என்று சொல்லப்படுகிறது. இந்நிலையில், அக்கல்லூரியில் பயிலும் நர்சிங் மாணவி ஒருவரிடம் ஆசிரியர் தனது காம இச்சைக்கு அடிபணியுமாறு பேசும் செல்போன் ஆடியோ இணையத்தில் வெளியாகி பெரும் அதிர்ச்சியை ஏற்படுத்தியுள்ளது.
இருபாலர் பயிலும் நர்சிங் கல்லூரியில் மாணவர்களும், மாணவிகளும் பேசிக்கொள்ளக் கூடாது என்ற விதி உள்ள நிலையில் ஆண்களிடம் பேசும் மாணவிகளை ஆசிரியர் சதீஷ் தனியாக அழைத்து கண்டித்து வருவதாக கூறப்படுகிறது. அதன்படி, ஆசிரியர் சதீஷ் மாணவி ஒருவரை தனது வீட்டிற்கு அழைத்துள்ளார். அதற்கு அந்த பெண் நான் கல்லூரிக்கு வருகிறேன் சார் என்று கூறியும் அதற்கு அந்த ஆசிரியர் வீட்டிற்கு அழைத்து கட்டாயபடுத்துவதுமான ஆடியோ வெளியாகியுள்ளது. ஒருகட்டத்தில் தனக்கு மாதவிடாய் வலி இருப்பதாக சொல்லியும் அதை புரிந்து கொள்ளாத அந்த காமவெறி கொண்ட ஆசிரியர், ’பரவாயில்லை நான் பார்த்துக்கொள்கிறேன் வா’ என்று தனது வீட்டிற்கு அழைக்கிறார்.
இந்நிலையில், பாஜக நிர்வாகி கார்த்திகேயன் தன்னுடைய கல்லூரி மாணவிகளிடம் சமரசத்தில் ஈடுபடும் காட்சிகள் வெளியாகி பரபரப்பை ஏற்படுத்தியுள்ளது. அதனை தொடர்ந்து மாவட்ட ஆட்சியரின் உத்தரவின் பேரில் மாவட்ட சமூக நலத்துறை அதிகாரி தமிமுன்சா தலைமையிலான அதிகாரிகள் கல்லூரியில் நேரில் விசாரணை மேற்கொண்டனர். கல்லூரி மாணவிகளிடம் தனித்தனியே வாக்குமூலம் எழுதி வாங்கிய அதிகாரிகள், கல்லூரி தாளாளர், முதல்வர், ஆசிரியர்களிடம் விசாரணை மேற்கொண்டனர். இந்நிலையில், ஆசிரியர் மீது நடவடிக்கை எடுக்கக்கோரி வலியுறுத்தப்பட்ட நிலையில், கல்லூரி சார்பில் அந்த ஆசிரியர் சதீஷ் உடனடியாக பணி நீக்கம் செய்யப்பட்டுள்ளார். மேலும், தொடர்ந்து கல்லூரி நிர்வாகம் சார்பில் அளிக்கப்பட்ட புகாரின் பேரில் நாகை நகர காவல் நிலையத்தில் வழக்குப்பதிவு செய்யப்பட்டது. இதனைத் தொடர்ந்து சதீஷ் கைது செய்யப்பட்டு சிறையில் அடைக்கப்பட்டார்.
