77வது சுதந்திர தினம் இன்று கொண்டாடப்படுகிறது. இதனையொட்டி, பிரதமர் நரேந்திர மோடி தொடர்ந்து 10 முறையாக செங்கோட்டையில் தேசிய கொடியை ஏற்றிவைத்து உரையாற்ற உள்ளார். ட்விட்டரில் தனது சுதந்திர தின வாழ்த்துக்களை தெரிவித்துள்ளார்.
ஆண்டுதோறும் சுதந்திர தினத்தன்று டெல்லி செங்கோட்டையில் பிரதமர் உரை நிகழ்த்துவது வழக்கம். இந்த ஆண்டு 77வது சுதந்திர தினத்தையொட்டி, இன்றுகாலை செங்கோட்டையில் பிரதமர் மோடி தேசிய கொடியை ஏற்றிவைத்து மக்களுக்கு உரை நிகழ்த்துகிறார். 2024 மக்களவைத் தேர்தலுக்கு முன் செங்கோட்டையில் இருந்து பிரதமர் மோடி ஆற்றிய கடைசி சுதந்திர தின உரை இதுவாகும். இந்த நிகழ்வானது, பிரதமர் தனது அரசாங்கத்தின் சாதனைகள் மற்றும் நாட்டின் எதிர்காலத்திற்கான தொலைநோக்குப் பார்வையை எடுத்துரைக்கும் ஒரு மேடையாக அமையும் என்று எதிர்பார்க்கப்படுகிறது.
பிரதமர் தேசியக் கொடியை ஏற்றும் போது, ராணுவம், கடற்படை, விமானப்படை மற்றும் டெல்லி காவல்துறையைச் சேர்ந்த 5 அதிகாரிகள் மற்றும் 128 இதர ரேங்க்களைக் கொண்ட தேசியக் கொடிக் காவலர் ராஷ்ட்ரிய வணக்கம் செலுத்துவார்கள். பிரதமர் தேசியக் கொடியை ஏற்றியவுடன், லைன் ஆஸ்டர்ன் ஃபார்மேஷனில் இந்திய விமானப்படையின் மார்க்-III துருவ் என்ற இரண்டு அதிநவீன இலகுரக ஹெலிகாப்டர்கள் மைதானத்தில் மலர் இதழ்களை பொழியும். குஜராத்தின் அகமதாபாத்தில் உள்ள சபர்மதி ஆசிரமத்தில் பிரதமரால் தொடங்கப்பட்ட ‘ஆசாதி கா அம்ரித் மஹோத்சவ்’ கொண்டாட்டங்களுடன் இந்த ஆண்டு சுதந்திர தினம் முடிவடையும்.
செங்கோட்டையில் நடைபெறும் கொண்டாட்டங்களில் சிறப்பு விருந்தினராக கலந்து கொள்ள நாடு முழுவதிலுமிருந்து பல்வேறு தொழில்களை சார்ந்த சுமார் 1,800 பேர் அழைக்கப்பட்டுள்ளனர். அரசின் தொலைநோக்குப் பார்வையான ‘ஜன் பகிதாரி’க்கு ஏற்ப இந்த முயற்சி எடுக்கப்பட்டுள்ளது. இந்த சிறப்பு விருந்தினர்களில் 660 க்கும் மேற்பட்ட கிராமங்களின் 400 க்கும் மேற்பட்ட சர்பஞ்ச்கள் உள்ளனர்; உழவர் உற்பத்தியாளர் அமைப்புகளின் திட்டத்திலிருந்து 250 பேர் கலந்துகொள்கின்றனர்.
இந்நிலையில் 77வது சுதந்திர தினத்தை முன்னிட்டு பிரதமர் மோடி நாட்டு மக்களுக்கு வாழ்த்துக்களை தெரிவித்துள்ளார். அவரது பதிவில் “சுதந்திர தின வாழ்த்துகள். நமது மாபெரும் சுதந்திரப் போராட்ட வீரர்களுக்கு நாம் மரியாதை செலுத்துவதுடன், அவர்களின் தொலைநோக்குப் பார்வையை நிறைவேற்றுவதற்கான எங்கள் உறுதிப்பாட்டை மீண்டும் உறுதிப்படுத்துகிறோம். ஜெய் ஹிந்த்!” என பதிவிட்டுள்ளார்.
