இஸ்ரேலுக்கும் ஈரானுக்கும் இடையே நடந்து வரும் போர் காரணமாக, கடந்த ஒரு வாரமாக கச்சா எண்ணெய் விலை உயர்ந்து காணப்படுகிறது. இதுபோன்ற சூழ்நிலையில், வரும் நாட்களில் அதன் விலை மேலும் உயரும் வாய்ப்பு அதிகரித்துள்ளது. தற்போது மத்திய பெட்ரோலிய அமைச்சர் ஹர்தீப் சிங் பூரி இது குறித்து ஒரு அறிக்கையை வெளியிட்டுள்ளார். அதில், கடந்த ஒரு வாரமாக இஸ்ரேலுக்கும் ஈரானுக்கும் இடையே பதற்றம் நிலவுவதாகவும், ஆனால் எண்ணெய் பற்றாக்குறை இல்லை என்று தெரிவித்துள்ளார். அதாவது உலகளவில் எரிப் பொருட்கள் விலைகள் முழுமையாக கட்டுப்பாட்டில் உள்ளன என்று தெளிவுப்படுத்தியுள்ளார்.
அதாவது, கடந்த ஜூன் 13ம் தேதி ஈரானின் முக்கியமான அணுசக்தி நிலையங்களை இஸ்ரேல் தாக்கிய பிறகு, எண்ணெய் விலைகள் உயரும் என்று மக்கள் அச்சத்தில் உள்ளனர் என்று தனியார் தொலைக்காட்சிக்கு பேட்டியளித்த ஹர்தீப் சிங் பூரி, தற்போதைய நிலைமை பற்றி கவலைப்பட தேவையில்லை என்று கூறினார்.
மேலும், கச்சா எண்ணெய் விலை பீப்பாய்க்கு 100 டாலர்களைத் தாண்டும் என்று மக்கள் அச்சப்படுவதாக கூறிய அவர், ஆனால் கடந்த சில மாதங்களாக அதன் விலை எதிர்பார்ப்புகளின்படி பீப்பாய்க்கு 75 டாலர்களாக இருப்பதாகவும் கூறினார். ஈரான் உலகின் ஒன்பதாவது பெரிய எண்ணெய் உற்பத்தி செய்யும் நாடாகும், இது தினமும் 3.3 மில்லியன் பீப்பாய்கள் எண்ணெயை உற்பத்தி செய்கிறது, அதில் சுமார் 2 மில்லியன் பீப்பாய்கள் கச்சா மற்றும் சுத்திகரிக்கப்பட்ட எண்ணெயை ஏற்றுமதி செய்கிறது என்பது குறிப்பிடத்தக்கது.
இஸ்ரேல் மற்றும் ஈரான் இடையேயான போரில் அமெரிக்கா நேரடியாக தலையிடும் வாய்ப்புள்ளதால் எண்ணெய் விலைகள் உயர்ந்துள்ளன. உலகளாவிய எண்ணெய் விநியோகத்தில் சுமார் 20 சதவீதம் வரும் ஹார்முஸ் ஜலசந்தியை மூடுவது குறித்து ஈரான் பரிசீலித்து வருவதாக வெளியான தகவல்கள் குறித்து பேசிய ஹர்தீப் சிங் பூரி, இந்த நடவடிக்கை இந்தியா உள்ளிட்ட எண்ணெய் இறக்குமதி செய்யும் நாடுகளுக்கு நல்லதல்ல என்று கூறினார்.
நேற்று வியாழக்கிழமை, எதிர்கால வர்த்தகத்தில் கச்சா எண்ணெயின் விலை பீப்பாய்க்கு ரூ.63 அதிகரித்து ரூ.6,397 ஆக இருந்தது. மல்டி கமாடிட்டி எக்ஸ்சேஞ்சில் (MCX) ஜூலை மாதத்தில் விநியோகத்திற்கான கச்சா எண்ணெயின் விலை பீப்பாய்க்கு ரூ.63 அல்லது 0.99% அதிகரித்து ரூ.6,397 ஆக இருந்தது. அதில் 8,943 லாட்டுகள் வர்த்தகம் செய்யப்பட்டன. உலகளாவிய ரீதியில் வலுவான மனநிலை நிலவுவதால், பங்கேற்பாளர்கள் தங்கள் ஒப்பந்தங்களை அதிகரித்ததால், எதிர்கால விலைகள் பாதிக்கப்பட்டதாக நிபுணர்கள் கூறுகின்றனர். உலகளவில், நியூயார்க்கில் மேற்கு டெக்சாஸ் இடைநிலை கச்சா எண்ணெய் விலை பீப்பாய்க்கு 0.27% உயர்ந்து 75.34 டாலராகவும், பிரெண்ட் கச்சா எண்ணெய் பீப்பாய்க்கு 0.29% உயர்ந்து 76.92 டாலராகவும் இருந்தது குறிப்பிடத்தக்கது.
