சளி என்பது பொதுவாக 7 நாட்கள் வரை நீடிக்கும் என்றாலும், சில அறிகுறிகள் இரண்டு வாரங்கள் வரை இருக்கக்கூடும். இதில் மோசமான அறிகுறிகள் முதல் 3 நாட்களிலேயே உச்சத்தை அடைகின்றன. மூக்கில் லேசான அரிப்பு, வறட்டு இருமல் போன்ற அறிகுறிகள் தென்பட்டாலே உடனடியாக மாத்திரை எடுக்க வேண்டிய அவசியமில்லை. இந்த தொந்தரவுகளை விரைவாகக் கவனித்து, உடனடியாக நிவாரணம் பெறவும், விரைவில் குணமடையவும் சில எளிய வழிமுறைகள் உதவும்.
தேன் கலந்த நீர் : ஓரளவு சூடான அல்லது வெதுவெதுப்பான நீர் அல்லது தேநீரில் சிறிதளவு தேன் கலந்து பருகுவது தொண்டைக்கு இதமளிக்கும். தேன் இருமல் மற்றும் தொண்டை எரிச்சலை குறைப்பதோடு, கிருமிகளை எதிர்த்துப் போராடவும் உதவுகிறது. சளி தொடங்கும்போதே 1 முதல் 2 ஸ்பூன் தேனை அப்படியே சாப்பிடலாம் அல்லது பானங்களில் கலக்கலாம். இது பெரியவர்களுக்கும் குழந்தைகளுக்கும் பாதுகாப்பானது. (ஆனால், 1 வயதுக்குட்பட்ட குழந்தைகளுக்குத் தேன் கொடுக்கவே கூடாது).
நீர்ச்சத்துடன் இருங்கள் : சளி பிடிக்கும் நேரத்தில் நிறைய தண்ணீர், பழச்சாறு போன்ற திரவ பானங்களை குடிப்பது அவசியம். இது தொண்டை புண் மற்றும் மூக்கடைப்புக்கு நிவாரணம் அளிக்க உதவும். ஆல்கஹால் அல்லது காஃபின் கலந்த பானங்களை தவிர்ப்பது நல்லது.
ஆரோக்கியமான உணவுகள் : ஆரோக்கியமான உணவுகளை சாப்பிட வேண்டும். குறிப்பாகக் கோழி, மீன், முட்டை அல்லது பீன்ஸ் போன்ற புரதம் நிறைந்த உணவுகளையும், பிரவுன் அரிசி அல்லது ஓட்ஸ் போன்ற முழு தானியங்களையும் சேர்க்க வேண்டும். காய்கறிகளை அதிகமாக உணவில் சேர்த்துக்கொள்வது உடலைப் பாதுகாக்கும்.
சூடான சூப் : உடல்நிலை சரியில்லாதபோது சூடான சிக்கன் நூடுல்ஸ் சூப் அல்லது இறைச்சி தவிர்ப்பவர்கள் காய்கறி சூப், மிளகு ரசம் அல்லது பருப்பு சூப் குடிப்பது சிறந்த தேர்வாகும். இது தொண்டையில் ஏற்படும் வீக்கத்தை குறைக்க உதவுகிறது.
உப்பு நீரில் வாய் கொப்பளித்தல் : ஒரு கிளாஸ் வெதுவெதுப்பான நீரில் அரை டீஸ்பூன் உப்பை கலந்து, தொண்டையில் படும் அளவிற்கு நன்கு வாய் கொப்பளிப்பது தொண்டை வலியை குறைக்க உதவும். (வாய் கொப்பளிக்கத் தெரியாத சிறு குழந்தைகளுக்கு இது பாதுகாப்பானது அல்ல).
மற்ற முக்கிய வழிமுறைகள் :
உடற்பயிற்சி மற்றும் ஓய்வு : படுக்கையில் படுத்தே இருப்பதை விட, பூங்காவில் நடப்பது அல்லது சில சுவாசப் பயிற்சிகளில் ஈடுபடுவது சளித் தொந்தரவை குறைக்க உதவும். இருப்பினும், ஆஸ்துமா அல்லது இதய பிரச்சனைகள் உள்ளவர்கள் மருத்துவரின் ஆலோசனை பெறுவது நல்லது.
மருந்துகள் மற்றும் ஸ்பிரே : தேவைப்பட்டால், டைலெனால் (Tylenol) போன்ற வலி நிவாரணி மருந்துகள் அல்லது பெனாட்ரைல் (Benadryl) போன்ற ஓவர்-தி-கவுண்டர் (OTC) மருந்துகள் சளியின் ஆரம்ப கட்டத்தில் வலி, அசௌகரியம் மற்றும் இருமலில் இருந்து உடனடியாக நிவாரணம் அளிக்கும். Saline நாசல் ஸ்பிரே பயன்படுத்துவது சளி அறிகுறிகளைக் குறைப்பதிலும், மூக்கில் இருந்து சளியை வெளியேற்றுவதிலும் சிறப்பாக செயல்படுகிறது. 4 வயதுக்குட்பட்ட குழந்தைகளுக்கு மருத்துவரின் அறிவுறுத்தலுடன் தேர்ந்தெடுக்கப்பட்ட மருந்துகளை மட்டுமே பயன்படுத்த வேண்டும்.
Read More : பூஜையின் போது மணி அடிப்பதற்கு எதற்காக தெரியுமா..? இப்படி ஒரு அறிவியல் காரணமும் இருக்கா..?
