பீகார் சட்டமன்ற தேர்தல் முடிவடைந்த நிலையில் நேற்று மாலை வெளியான தேர்தலுக்கு பிந்தைய கருத்துக் கணிப்புகள், பாஜக-ஜேடியு தலைமையிலான தேசிய ஜனநாயகக் கூட்டணி (NDA) 130-209 இடங்களைப் பெற்று அமோக வெற்றி பெறும் என்று கணித்துள்ளன.. பீகார் சட்டமன்றத் தேர்தலில் இந்தியா கூட்டணி இரண்டாவது இடம் பிடித்துள்ளது.. இருப்பினும், பலர் முதலிடத்தில் வரக்கூடும் என்று நினைத்த பி.கே என்று அழைக்கப்படும் பிரசாந்த் கிஷோரின் ஜான் சுராஜ் கட்சி, மாநிலத்தில் சிறிய தாக்கத்தை ஏற்படுத்தியதாகத் தெரிகிறது.
ஜேடியு மற்றும் பாஜக இந்த கணிப்புகளைக் கொண்டாடி வரும் நிலையில், எதிர்க்கட்சிகள் அவற்றை நிராகரித்துள்ளன. மெட்ரிஸ், பி-மார்க், பீப்பிள்ஸ் பல்ஸ் உள்ளிட்ட பல கருத்துக் கணிப்புகள், 243 உறுப்பினர்களைக் கொண்ட பீகார் சட்டமன்றத்தில் NDA க்கு 130-209 இடங்கள் கிடைக்கும் என்று கணித்துள்ளன, இது தேவையான பெரும்பான்மையான 122 ஐ விட அதிகமாகும்.
இதனிடையே RJD, காங்கிரஸ் மற்றும் இடதுசாரி கட்சிகளை உள்ளடக்கிய மகாகத்பந்தன் 70-102 இடங்களுடன் பின்தங்கியிருக்கும் என்று கணிக்கப்பட்டுள்ளது.
நவம்பர் 14 ஆம் தேதி காலை 8 மணிக்கு 38 மாவட்டங்களிலும் பலத்த பாதுகாப்புடன் வாக்கு எண்ணிக்கை தொடங்கும் போது அறிவிக்கப்படும் உண்மையான முடிவுகளிலிருந்து எக்ஸிட் போல் புள்ளிவிவரங்கள் வேறுபடலாம்.
இந்த நிலையில் ஆக்சிஸ் மை இந்தியா நிறுவனத்தின் கருத்துக் கணிப்பு இன்று வெளியானது.. இந்த கருத்துக் கணிப்பிலும் பாஜக -ஜேடியு தலைமையிலான தேசிய ஜனநாயகக் கூட்டணி வெற்றி பெறும் என்று கணித்துள்ளது, மற்றவற்றைப் போலவே இந்தியா கூட்டணி இதில் இரண்டாவது இடத்தில் உள்ளது.
ஆக்சிஸ் மை இந்தியா கணிப்புகள் :
தேசிய ஜனநாயக கூட்டணி : 121-141 தொகுதிகள்
இந்தியா கூட்டணி : 98-118 தொகுதிகள்
ஜன் சுராஜ் கட்சி : 0-2
மற்றவை: 1-5
பீகார் தேர்தல் 2025
பீகார் சட்டமன்றத் தேர்தல் 2025 இரண்டு கட்டங்களாக நடத்தப்பட்டது. சட்டமன்றத் தேர்தலுக்கான ஒட்டுமொத்த வாக்குப்பதிவு 66.91 சதவீதமாக இருந்தது, இது இதுவரை இல்லாத அளவுக்கு பதிவான அதிக சதவீதமாகும் என்று இந்திய தேர்தல் ஆணையம் தெரிவித்துள்ளது.
நவம்பர் 6 ஆம் தேதி முதல் கட்ட வாக்குப்பதிவு நடைபெற்றது, 65.08 சதவீத வாக்குப்பதிவு பதிவாகியுள்ளது. நவம்பர் 11 ஆம் தேதி நடத்தப்பட்ட இரண்டாம் கட்ட வாக்குப்பதிவும் முடிவடைந்துள்ளது, வாக்குப்பதிவு 68.67 சதவீதமாக உள்ளது.
நவம்பர் 14-ம் தேதி வாக்குகள் எண்ணப்பட்டு, தேர்தல் முடிவுகள் அறிவிக்கப்படும்.. 243 இடங்களைக் கொண்ட பீகார் சட்டமன்றத்தில் அரசாங்கத்தை அமைக்க 122 இடங்களின் எளிய பெரும்பான்மை தேவை. நிதிஷ் குமாரின் தேசிய ஜனநாயகக் கூட்டணி ஆட்சியைத் தக்க வைத்துக் கொள்ளுமா அல்லது தேஜஸ்வி யாதவின் மகா கூட்டணி ஆட்சியைக் கைப்பற்றுமா என்பதை இந்தத் தேர்தல் தீர்மானிக்கும்.
