ஒடிசாவின் கந்தமால் மாவட்டத்தில் நடந்த இரண்டு வெவ்வேறு மோதல்களில், உயர்மட்ட மாவோயிஸ்ட் தளபதி கணேஷ் உய்கே உட்பட குறைந்தது 6 நக்ஸலைட்டுகள் பாதுகாப்புப் படையினரால் சுட்டுக் கொல்லப்பட்டனர் என்று அதிகாரிகள் தெரிவித்தனர். முதல் மோதல் புதன்கிழமை இரவு பெல்கர் காவல் நிலைய எல்லைக்கு உட்பட்ட கும்மா காட்டில் ஏற்பட்டது, இதில் இரண்டு மாவோயிஸ்டுகள் சுட்டுக் கொல்லப்பட்டனர்.
இரண்டாவது மோதல் வியாழக்கிழமை காலை சக்கபட் காவல் நிலையப் பகுதியில் உள்ள ஒரு காட்டில் ஏற்பட்டது, இதில் உய்கே உட்பட 4 நக்ஸலைட்டுகள் சுட்டுக் கொல்லப்பட்டனர். உய்கே சிபிஐ (மாவோயிஸ்ட்) மத்தியக் குழுவின் உறுப்பினராக இருந்தார், மேலும் அவர் மீது ரூ. 1.1 கோடி பரிசுத்தொகை அறிவிக்கப்பட்டிருந்தது.
69 வயதான உய்கே, பக்கா ஹனுமந்து, ராஜேஷ் திவாரி, சம்ரு மற்றும் ரூபா ஆகிய புனைப்பெயர்களால் அறியப்பட்டவர் என்றும், அவர் தெலங்கானாவின் நல்கொண்டா மாவட்டத்தில் உள்ள புல்லேமாலா கிராமத்தைச் சேர்ந்தவர் என்றும் அதிகாரிகள் தெரிவித்தனர். மோதல் நடந்த இடங்களில் இருந்து இரண்டு இன்சாஸ் துப்பாக்கிகள் மற்றும் ஒரு .303 துப்பாக்கி உட்பட ஆயுதங்களையும் வெடிமருந்துகளையும் அதிகாரிகள் கைப்பற்றியுள்ளதாகவும் அவர்கள் தெரிவித்தனர்.
இருப்பினும், மோதலில் சுட்டுக் கொல்லப்பட்ட மற்ற நக்ஸலைட்டுகளை காவல்துறை இன்னும் அடையாளம் காணவில்லை.
ஒடிசா காவல்துறை தலைமை இயக்குநர் (டிஜிபி) யோகேஷ் பகதூர் குரானியா இதுகுறித்து பேசிய போது “புதன்கிழமை இரண்டு மாவோயிஸ்டுகள் சுட்டுக் கொல்லப்பட்டனர், இன்று காலை நான்கு பேர் சுட்டுக் கொல்லப்பட்டனர். மத்தியக் குழு உறுப்பினர் கொல்லப்பட்டது ஒடிசா காவல்துறைக்கு ஒரு பெரிய வெற்றியாகும். இது மாநிலத்தில் மாவோயிஸ்டுகளின் முதுகெலும்பை உடைத்துள்ளது,” என்று தெரிவித்தார்..
மேலும் “கந்தமால்-கஞ்சம் மாவட்டங்களுக்கு இடையேயான எல்லையில் உள்ள பல்வேறு இடங்களில் தேடுதல் நடவடிக்கைகள் நடைபெற்று வருகின்றன, மேலும் நாங்கள் அதிக வெற்றிகளைப் பெறுவோம் என்று நம்புகிறோம். இது சமீப காலங்களில் ஒடிசாவில் மாவோயிஸ்டுகளுக்கு எதிராக நடத்தப்பட்ட மிகப்பெரிய நடவடிக்கைகளில் ஒன்றாகும். இந்த நடவடிக்கையில் ஈடுபட்ட பாதுகாப்புப் படையினருக்கு நாங்கள் நன்றி தெரிவிக்கிறோம்,” என்று அவர் கூறினார். மேலும், அடுத்த ஆண்டு மார்ச் மாதத்திற்குள் நக்ஸலிசத்தை ஒழிக்கும் மத்திய உள்துறை அமைச்சர் அமித் ஷாவின் இலக்கை அடைய பாதுகாப்புப் படைகள் உறுதியாக உள்ளன என்றும் அவர் குறிப்பிட்டார்.
இதனிடையே, இந்த வெற்றிகரமான நடவடிக்கைகளுக்காக பாதுகாப்புப் படைகளை ஷா பாராட்டினார், மேலும் இது இந்தியாவில் இருந்து நக்ஸலிசத்தை முழுமையாக ஒழிப்பதில் ஒரு “முக்கியமான மைல்கல்” என்று வர்ணித்தார். “இந்த பெரிய திருப்புமுனையின் மூலம், ஒடிசா நக்ஸலிசத்திலிருந்து முழுமையாக விடுபடும் வாசலில் நிற்கிறது. 2026 ஆம் ஆண்டு மார்ச் 31 ஆம் தேதிக்கு முன்பே நக்ஸலிசத்தை ஒழிக்க நாங்கள் உறுதியாக உள்ளோம்,” என்று எக்ஸ் பக்கத்தில் பதிவிட்டார்..
