பங்குச் சந்தையின் ஏற்ற இறக்கங்கள் குறித்து அச்சப்படுபவர்களுக்கும், நடுத்தர வர்க்க முதலீட்டாளர்களுக்கும் மத்திய அரசின் அஞ்சலக தொடர் வைப்பு நிதி ஒரு மிகச்சிறந்த பாதுகாப்பான முதலீட்டு தேர்வாக உருவெடுத்துள்ளது. சிறிய தொகையை மாதந்தோறும் சேமிப்பதன் மூலம், எதிர்காலத்தில் ஒரு பெரிய நிதியை உருவாக்க நினைப்பவர்களுக்கு இத்திட்டம் ஒரு வரப்பிரசாதமாகும்.
தற்போதைய நிலவரப்படி, அஞ்சலக ஆர்டி திட்டத்திற்கு ஆண்டுக்கு 6.7 சதவீத வட்டி வழங்கப்படுகிறது. இதில் உள்ள சிறப்பம்சம் என்னவென்றால், வட்டித் தொகையானது ஒவ்வொரு 3 மாதங்களுக்கு ஒருமுறை கணக்கிடப்பட்டு அசலுடன் சேர்க்கப்படுவதால், முதலீட்டாளர்களுக்குக் கூடுதல் லாபம் கிடைக்கிறது. உதாரணமாக, ஒரு நபர் மாதம் 5,000 ரூபாய் வீதம் இத்திட்டத்தில் முதலீடு செய்ய தொடங்கினால், அது நீண்ட கால அடிப்படையில் ஒரு மிகப்பெரிய தொகையாக உருமாறுகிறது.
இத்திட்டத்தின் முதிர்வு காலம் 5 ஆண்டுகள் ஆகும். எனினும், முதலீட்டாளர்கள் விரும்பினால் இதனை மேலும் 5 ஆண்டுகளுக்கு நீட்டித்துக் கொள்ளலாம். இவ்வாறு தொடர்ந்து 10 ஆண்டுகள் மாதம் 5,000 ரூபாய் சேமித்து வந்தால், முதிர்வு காலத்தில் வட்டியுடன் சேர்த்து சுமார் 8.54 லட்சம் ரூபாய் வரை கையில் கிடைக்கும். குழந்தைகளின் உயர்கல்வி, திருமணச் செலவுகள் அல்லது ஓய்வுக்காலத் தேவைகளுக்காகத் திட்டமிடுபவர்களுக்கு இது ஒரு கவசமாக திகழ்கிறது.
மத்திய அரசின் நேரடி உத்தரவாதம் இருப்பதால், முதலீடு செய்யும் பணத்திற்கு 100% பாதுகாப்பு உறுதி செய்யப்படுகிறது. எந்தவொரு அஞ்சலகத்திலும் மிக எளிய நடைமுறைகளுடன் இந்த கணக்கை தொடங்கிவிடலாம் என்பதால், எளிய மக்களும் தங்களின் நிதி எதிர்காலத்தை இப்போதே உறுதி செய்ய முடியும்.
Read More : போஸ்ட் ஆபீஸ் சேமிப்பு திட்டம்..!! வட்டி விகிதத்தில் மாற்றமா..? குட் நியூஸ் அறிவித்த மத்திய அரசு..!!
