தமிழகம் முழுவதும் உள்ள சார்பதிவாளர் அலுவலகங்களில் கடந்த இரண்டு நாட்களாகப் பத்திரப்பதிவுப் பணிகள் முடங்கியுள்ளதால், பொதுமக்கள் கடும் அவதிக்குள்ளாகியுள்ளனர். மாநிலப் பத்திரப்பதிவுத் துறையின் மைய தரவு சேமிப்பு வன்பொருளில் (Server Hardware) கடந்த ஜனவரி 3-ஆம் தேதி ஏற்பட்ட திடீர் தொழில்நுட்பக் கோளாறுதான் இந்த முடக்கத்திற்கு காரணமாக அமைந்துள்ளது.
இந்த தொழில்நுட்பக் கோளாறு காரணமாக, ஆன்லைன் மூலம் ஆவணங்களை தாக்கல் செய்வது, வில்லங்கச்சான்றிதழ் பெறுவது மற்றும் சொத்துப் பரிமாற்ற பதிவுகள் என அனைத்து இணையவழிச் சேவைகளும் முடங்கியுள்ளன. இதனால், மாநிலம் முழுவதும் உள்ள நூற்றுக்கணக்கான சார்பதிவாளர் அலுவலகங்களுக்கு தொலைதூரத்திலிருந்து வந்த பொதுமக்கள் ஏமாற்றத்துடன் திரும்பிச் செல்லும் நிலை ஏற்பட்டுள்ளது. இந்த கோளாறை சரிசெய்வதற்காகப் பதிவுத்துறையின் உயர்மட்டத் தொழில்நுட்பக் குழுவினர் கடந்த 48 மணி நேரத்திற்கும் மேலாகத் தீவிரமாகப் பணியாற்றி வருகின்றனர்.
தற்போது சீரமைப்பு பணிகள் இறுதிக்கட்டத்தை எட்டியுள்ள போதிலும், இன்னும் சில சிக்கல்கள் நீடிப்பதாக தெரிகிறது. இதன் காரணமாக, பொதுமக்கள் தங்களது பத்திரப்பதிவு தொடர்பான திட்டங்களை சற்றுத் தள்ளி வைக்குமாறு பதிவுத்துறை தலைவர் கேட்டுக்கொண்டுள்ளார். முழுமையாக சரிசெய்யப்பட்டு, இணையச் சேவைகள் எப்போது இயல்பு நிலைக்கு திரும்பும் என்பது குறித்த அறிவிப்பு விரைவில் வெளியாகும் என எதிர்பார்க்கப்படுகிறது. அதுவரை பொதுமக்கள் பொறுமை காத்து ஒத்துழைப்பு வழங்க வேண்டும் என கோரிக்கை விடுக்கப்பட்டுள்ளது.
Read More : தடாலடி அறிவிப்பு..!! ரேஷன் அட்டைதாரர்களுக்கு ரூ.5,000 பொங்கல் பரிசுத்தொகை..!! அதிமுகவின் மெகா வாக்குறுதி..!!
