தமிழக அரசின் ‘கலைஞர் மகளிர் உரிமைத்தொகை’ திட்டத்தில், தொடக்கத்தில் விண்ணப்பித்துத் தொழில்நுட்பக் காரணங்களாலோ அல்லது பிற தரவுப் பிழைகளாலோ நிராகரிக்கப்பட்ட பெண்களுக்குத் தற்போது ஒரு முக்கிய விடியல் பிறந்துள்ளது. தகுதியிருந்தும் தங்களுக்கு இந்த உதவித்தொகை கிடைக்கவில்லை என கருதிய பெண்கள், அரசின் kmut.tn.gov.in என்ற இணையதளம் வாயிலாக தங்களின் நியாயமான கோரிக்கைகளை மேல்முறையீடாகப் பதிவு செய்திருந்தனர். ஆயிரக்கணக்கில் குவிந்த இந்த மனுக்கள் மீது நடவடிக்கை எடுக்குமாறு முதலமைச்சர் தரப்பிலிருந்து அதிகாரிகளுக்கு கண்டிப்பான உத்தரவுகள் பிறப்பிக்கப்பட்டுள்ளன.
இதனைத் தொடர்ந்து, அந்தந்த மாவட்டங்களில் உள்ள வருவாய் கோட்டாட்சியர்கள் (RDO) தலைமையிலான குழுவினர், இணையதளம் மூலம் பெறப்பட்ட மேல்முறையீட்டு மனுக்கள் மீது நேரடி கள ஆய்வை தற்போது தொடங்கியுள்ளனர். இந்த ஆய்வின் போது, விண்ணப்பதாரர்களின் உண்மையான பொருளாதாரச் சூழல், வருமான வரி விவரங்கள் மற்றும் பிற தகுதிகள் மிக நுணுக்கமாக மீண்டும் ஒருமுறை சரிபார்க்கப்படுகின்றன. தகுதி வாய்ந்த ஒரு பெண் கூட விடுபட்டுவிடக் கூடாது என்பதில் அரசு உறுதியாக இருப்பதால், அதிகாரிகள் களத்திற்குச் சென்று நேரடியாகத் தரவுகளைச் சேகரித்து வருகின்றனர்.
இந்த மறுபரிசீலனை பணிகளின் முடிவில், தகுதியுள்ளவர்களாக கண்டறியப்படும் பயனாளிகளுக்கு மகிழ்ச்சியான செய்தி காத்திருக்கிறது. அவர்களுக்கு மாதம் ரூ.1,000 உரிமைத் தொகை வழங்கப்படுவதோடு மட்டுமல்லாமல், அவர்களின் மனு நிலுவையில் இருந்த காலத்திற்கான நிலுவைத் தொகையும் சேர்த்து வழங்கப்பட உள்ளதாக கூறப்படுகிறது.
