மணிப்பூர் மாநிலத்தில் நிலவி வந்த நீண்ட கால அரசியல் தேக்கநிலை முடிவுக்கு வந்துள்ளது. வன்முறையால் தத்தளித்த அம்மாநிலத்தில் ஜனாதிபதி ஆட்சி விலக்கிக்கொள்ளப்பட்டு, புதிய அரசு அமைவதற்கான அதிகாரப்பூர்வ அறிவிப்புகள் வெளியாகியுள்ளன. சுமார் இரண்டு ஆண்டுகளாக நீடித்த இனக்கலவரம் மற்றும் நிர்வாக சிக்கல்களுக்குப் பிறகு, மீண்டும் மக்களால் தேர்ந்தெடுக்கப்பட்ட அரசு அரியணையில் ஏறுகிறது.
கடந்த 2023-ஆம் ஆண்டு மே மாதம் மணிப்பூரில் மெய்தி மற்றும் குகி இனத்தவர்களிடையே வெடித்த கலவரம் இந்தியாவையே உலுக்கியது. 260-க்கும் மேற்பட்ட உயிர்களை பலிவாங்கிய இந்த வன்முறையால் ஆயிரக்கணக்கான மக்கள் முகாம்களில் தஞ்சமடைந்தனர். சட்டம் ஒழுங்கு சீர்குலைந்ததையடுத்து, கடந்த 2024 பிப்ரவரி மாதம் பிரேன் சிங் தலைமையிலான பாஜக அரசு பதவி விலகியது. அதனைத் தொடர்ந்து அமல்படுத்தப்பட்ட ஜனாதிபதி ஆட்சி, ஓராண்டுக்கும் மேலாக நீடித்தது. இந்நிலையில், மீண்டும் ஜனநாயக ரீதியிலான அரசை அமைக்க பாஜக மேலிடம் மேற்கொண்ட சமரச முயற்சிகள் தற்போது கைகூடியுள்ளன.
டெல்லியில் உள்ள பாஜக தலைமையகத்தில் நேற்று நடைபெற்ற சட்டமன்ற உறுப்பினர்கள் கூட்டத்தில், மணிப்பூரின் புதிய முதலமைச்சராக முன்னாள் அமைச்சர் ஒய். கெம்சந்த் சிங் ஒருமனதாகத் தேர்வு செய்யப்பட்டுள்ளார். மெய்தி இனத்தைச் சேர்ந்த இவருடன், குகி பழங்குடியினத்தை சேர்ந்த முன்னாள் பெண் அமைச்சர் நெம்சா கிப்ஜென் துணை முதலமைச்சராகத் தேர்வு செய்யப்பட்டுள்ளார். இரண்டு வெவ்வேறு இனங்களைச் சேர்ந்த தலைவர்களை முக்கியப் பதவிகளில் அமர்த்துவதன் மூலம், மாநிலத்தில் அமைதியை நிலைநாட்டவும், இன மோதல்களுக்கு முற்றுப்புள்ளி வைக்கவும் பாஜக திட்டமிட்டுள்ளது.
புதிய அரசு அமைவதற்கு ஏதுவாக, மணிப்பூரில் நடைமுறையில் இருந்த ஜனாதிபதி ஆட்சியை மத்திய அரசு அதிகாரப்பூர்வமாக திரும்பப் பெற்றுள்ளது. புதிய அமைச்சரவை வரும் பிப்ரவரி 12-ஆம் தேதிக்குள் பதவியேற்கும் என்று எதிர்பார்க்கப்படுகிறது.
