இன்றைய வேகமான உலகில், விடியலில் தொடங்கி அந்தி சாயும் வரை மனித இனம் எதை தேடி ஓடிக்கொண்டிருக்கிறது என்று கேட்டால், அதற்குப் பணம் என்பதே பிரதான பதிலாக இருக்கும். “பணம் மட்டுமே வாழ்க்கையல்ல” என்று தத்துவங்கள் பேசினாலும், அடிப்படை தேவைகள் முதல் ஆடம்பரங்கள் வரை அனைத்திற்கும் அதன் தேவை இன்றியமையாததாகவே இருக்கிறது. ஆனால், இந்தச் செல்வத்தை சேர்ப்பதற்கும், வளமான வாழ்வை அமைப்பதற்கும் ஒரு அறிவியல் இருக்கிறது என்று சொன்னால் நம்ப முடிகிறதா?
சுமார் 115 ஆண்டுகளுக்கு முன்பே, அதாவது 1910-ல் வாலஸ் டி. வாட்டில்ஸ் எழுதிய ‘தி சயின்ஸ் ஆஃப் கெட்டிங் ரிச்’ (The Science of Getting Rich) என்ற நூல், இன்று உலகப் புகழ்பெற்ற பல சுய முன்னேற்ற புத்தகங்களுக்கு தாய்வீடாக திகழ்கிறது. வாட்டில்ஸ் தனது நூலின் தலைப்பில் ‘சயின்ஸ்’ என்ற சொல்லை பயன்படுத்தியிருந்தாலும், இது ஆய்வகங்களில் நடக்கும் இயற்பியல் சோதனையல்ல. மாறாக, மனித மனதின் ஆற்றலையும், எண்ணங்களின் வலிமையையும் விளக்கும் ஒரு ‘மனோதத்துவ அறிவியல்’.
செல்வத்தைப் பெறுவது என்பது தற்செயலானது அல்ல, அது சில குறிப்பிட்ட கொள்கைகளை பின்பற்றுவதன் மூலம் எவருக்கும் சாத்தியமாகும் என்பதே ஆசிரியரின் ஆணித்தரமான வாதம். இதில் மிக முக்கியமாக அவர் குறிப்பிடுவது, “பணக்காரராக வாழ்வது என்பது ஒவ்வொரு மனிதனின் பிறப்புரிமை”. வறுமையில் வாழ்வது ஒரு தியாகமல்ல, மாறாக தனது முழுத்திறனையும் வெளிப்படுத்த விடாமல் தடுக்கும் ஒரு தடைக்கல் என்பதே இந்த நூலின் மையக்கருத்து.
பொதுவாக, உலகில் செல்வம் என்பது ஒரு குறிப்பிட்ட அளவில் மட்டுமே இருக்கிறது, ஒருவருக்கு கிடைத்தால் மற்றவருக்குப் பற்றாக்குறை ஏற்படும் என்ற தவறான மனநிலை பலரிடம் உண்டு. ஆனால், வாட்டில்ஸ் இதை முற்றிலுமாக மறுக்கிறார். செல்வம் என்பது ஒரு சிறிய கேக் துண்டு அல்ல; அது எல்லையற்ற பிரபஞ்சம் போன்றது. புதிய கண்டுபிடிப்புகள் மற்றும் மதிப்பை உருவாக்குவதன் மூலம் செல்வத்தை எவரும் உருவாக்க முடியும்.
உதாரணமாக, ரைட் சகோதரர்கள் விமானத்தை கண்டறிந்தபோது, அவர்கள் யாரிடமிருந்தும் செல்வத்தைப் பறிக்கவில்லை; மாறாக உலகிற்குப் புதிய பரிமாணத்தை அளித்தனர். அந்தப் படைப்பாற்றலே செல்வத்தின் ஊற்றுக்கண். நூலின் மற்றொரு சிறப்பம்சமாகச் சொல்லப்படுவது, போட்டி மனப்பான்மையை விடுத்து படைப்பாற்றல் மனப்பான்மைக்கு மாறுதல். மற்றவர்களை வீழ்த்தி முன்னேற நினைப்பதை விட, தனித்துவமான ஒன்றை உருவாக்க நினைப்பதே ஒருவரை நிலையான செல்வத்தை நோக்கி அழைத்துச் செல்லும். இதற்குக் தெளிவான குறிக்கோளும், அசைக்க முடியாத நம்பிக்கையும் அவசியம்.
எதை நாம் அடைய விரும்புகிறோமோ, அதை தெளிவாக கற்பனை செய்து, அந்தப் பிம்பத்தை மனதில் நிலைநிறுத்த வேண்டும். எல்லாவற்றிற்கும் மேலாக நன்றியுணர்வு என்ற உணர்வே செல்வத்தை ஈர்க்கும் காந்தம் என்கிறார் வாட்டில்ஸ். நம்மிடம் இப்போது இருப்பவற்றுக்கு நன்றி கூற தொடங்கும்போதே, பிரபஞ்சம் நமக்கான கதவுகளை திறக்க தொடங்குகிறது.
வெறும் சிந்தனை மட்டும் ஒருவனை பணக்காரன் ஆக்கிவிடாது என்பதையும் ஆசிரியர் எச்சரிக்கிறார். ‘Certain Way’ எனப்படும் ஒரு குறிப்பிட்ட முறையில் செயலாற்றுவது மிக முக்கியம். தான் தற்போது இருக்கும் இடத்தில் இருந்தபடியே, தனது பணிகளில் அதிக மதிப்பை சேர்க்கத் தொடங்கும் ஒருவருக்கு அடுத்தகட்ட வாய்ப்புகள் தேடி வரும். திட்டமிட்ட உழைப்பும், நேர்மறையான எண்ணங்களும் இணையும்போது வெற்றி வசப்படும். மொத்தத்தில், இந்த நூல் வெறும் பணத்தைப் பற்றியது மட்டுமல்ல; ஒரு மனிதன் தனது மனப்போக்கை மாற்றி, தன்னம்பிக்கை மிக்க ஆளுமையாக உருவெடுப்பதற்கான வழிகாட்டி. நூற்றாண்டு கடந்தும் வாட்டில்ஸின் வரிகள் இன்றும் பலரது வாழ்வை மாற்றிக்கொண்டிருப்பது வியப்பிற்குரியது.
Read More : திமுகவில் வாரிசுப் போர்..!! கனிமொழி vs சபரீசன்..!! குடும்ப மோதலால் பரபரக்கும் தென் மாவட்டங்கள்..!!
