சென்னையில் தெரு நாய்கள் மற்றும் வளர்ப்பு நாய்களால் பொதுமக்கள் பாதிக்கப்படுவது அண்மைக்காலமாக பெரும் கவலையை ஏற்படுத்தியுள்ளது. இந்தப் பிரச்சனைக்கு முற்றுப்புள்ளி வைக்க தமிழக அரசு உத்தரவிட்டதன் அடிப்படையில், சென்னை மாநகராட்சி தற்போது அதிரடியான கட்டுப்பாடுகளை அமல்படுத்தியுள்ளது. குறிப்பாக, வீடுகளில் வளர்க்கப்படும் நாய்களுக்கு முறையான உரிமம் பெறாவிட்டால், அதன் உரிமையாளர்களுக்கு ரூ.5,000 அபராதம் விதிக்கப்படும் என எச்சரிக்கை விடுக்கப்பட்டுள்ளது.
கடந்த 2024-ஆம் ஆண்டு மேற்கொள்ளப்பட்ட விரிவான கணக்கெடுப்பின்படி, சென்னையில் சுமார் 1.80 லட்சம் தெரு நாய்கள் இருப்பது கண்டறியப்பட்டது. இவற்றை கட்டுப்படுத்தவும், வெறிநாய் கடி (ரேபீஸ்) பாதிப்பை தவிர்க்கவும் மாநகராட்சி தீவிர நடவடிக்கைகளை எடுத்தது. அதன் பலனாக, இதுவரை சுமார் 1.47 லட்சம் தெரு நாய்களுக்கு ரேபீஸ் தடுப்பூசி போடப்பட்டுள்ளது. இதில் குறிப்பிடத்தக்க அம்சமாக, 16,611 நாய்களுக்கு கருத்தடை சிகிச்சை அளிக்கப்பட்டு, அவற்றின் கழுத்தில் கண்காணிப்பிற்காக ‘மைக்ரோ சிப்’ பொருத்தப்பட்டுள்ளது.
தெரு நாய்கள் ஒருபுறமிருக்க, வீடுகளில் வளர்க்கப்படும் நாய்கள் கடித்தும் பலர் காயமடைந்து வந்தனர். இதனால் வளர்ப்பு நாய்களுக்கும் கடுமையான விதிமுறைகள் கொண்டுவரப்பட்டுள்ளன. சென்னையில் சுமார் 1 லட்சத்திற்கும் மேற்பட்ட வளர்ப்பு நாய்கள் உள்ள நிலையில், அவற்றில் வெறும் 74 ஆயிரம் நாய்களுக்கு மட்டுமே முறையான உரிமம் பெறப்பட்டு, தடுப்பூசிகள் போடப்பட்டுள்ளதாக மாநகராட்சி புள்ளிவிவரங்கள் தெரிவிக்கின்றன. மீதமுள்ள சுமார் 26,000-க்கும் மேற்பட்ட நாய்கள் எந்தவிதமான அரசு அனுமதியும் இன்றி வளர்க்கப்பட்டு வருவது உறுதி செய்யப்பட்டுள்ளது.
முறையான உரிமம் பெறாத வளர்ப்பு நாய் உரிமையாளர்களை கண்டறிய, மாநகராட்சி ஊழியர்கள் இனி நேரடியாக வீடுகளுக்கே சென்று ஆய்வு நடத்த உள்ளனர். அப்போது நாய்களுக்கு ரேபீஸ் தடுப்பூசி போடப்பட்டுள்ளதா, கழுத்தில் மைக்ரோ சிப் உள்ளதா மற்றும் உரிமம் பெறப்பட்டுள்ளதா என்பது சரிபார்க்கப்படும். இந்த விதிகளை பின்பற்றாதவர்களுக்கு உடனடி அபராதமாக ரூ.5,000 விதிக்கப்பட உள்ளது. எனவே, நாய் வளர்ப்பவர்கள் தேவையற்ற சட்ட சிக்கல்களை தவிர்க்க, உடனடியாக தங்கள் செல்லப் பிராணிகளுக்கு தடுப்பூசி போட்டு உரிமம் பெறுமாறு அறிவுறுத்தப்பட்டுள்ளனர்.
Read More : டி20 உலகக் கோப்பை..!! சரிந்தது ஆஸ்திரேலியாவின் கோட்டை..!! ஜிம்பாப்வேயின் மாஸ் கம் பேக்..!!
