ஒரு வங்கி அல்லது வங்கி அல்லாத நிதி நிறுவனத்திலிருந்து (NBFC) கடன் பெறுவது, பலருக்குப் பின்னர் சவாலான காலகட்டத்தைத் தொடங்குகிறது. கடன் முழுமையாக அடைக்கப்படும் வரை, ஒவ்வொரு மாதமும் நிர்ணயிக்கப்பட்ட தேதிக்குள் தவணைத் தொகை (EMI) கட்டாயமாக செலுத்த வேண்டும்.
ஒரு கடன் பெறுபவர் சில தவணைகளை செலுத்தத் தவறினால், அந்த கடன் வழங்கிய நிறுவனம் வழக்கமாக பணம் வசூலிக்கும் முகவர்களை (recovery agents) அனுப்புகிறது. பொதுவாக, அவர்கள் வசூலிக்கும் தொகையின் அடிப்படையில் கமிஷன் பெறுவதால், கடன் தொகையைப் பெற எந்த வழியையும் பயன்படுத்த அவர்களுக்கு ஊக்கம் கிடைக்கிறது. ஆனால் இந்த நிலைமை விரைவில் மாறவுள்ளது. இந்திய ரிசர்வ் வெளியிட்டுள்ள புதிய வழிகாட்டுதல்கள், வரும் ஜூலை 1 முதல் அமலுக்கு வரவுள்ளன. இவை கடன் வசூல் முறைகளில் முக்கிய மாற்றங்களை ஏற்படுத்தும் என எதிர்பார்க்கப்படுகிறது.
இதுவரை, கடன் வசூல் முகவர்கள் (Recovery Agents) கடன் பெறுபவர்களை தவறாக நடத்துவது, வாய்மொழி அவமதிப்பு செய்வது, சமூக மரியாதையை பாதிக்கும் வகையில் நடந்து கொள்வது போன்ற சம்பவங்கள் பல இடங்களில் நடந்துள்ளன. கடன் தொகை எவ்வளவு அதிகமாக வசூலிக்கப்படுகிறதோ, அதற்கேற்ப அவர்களுக்கு கிடைக்கும் கமிஷனும் அதிகமாக இருப்பதால், சில முகவர்கள் வாடிக்கையாளர்களை மிரட்டுதல், மன அழுத்தம் கொடுத்தல், சில நேரங்களில் உடல் வன்முறை வரை செல்லும் நிலையும் உருவாகியுள்ளது.
இந்த வகையான செயல்கள், கடன் பெறுபவர்களுக்கு பொருளாதார பாதிப்பை மட்டுமல்ல, சமூக அவமானம் மற்றும் மன அழுத்தத்தையும் ஏற்படுத்தி வந்தன. ஆனால் இனி இந்த நிலை மாறவுள்ளது. கடன் வசூல் நடவடிக்கைகளின் போது, கடன் பெறுபவர்களுக்கு அதிக பாதுகாப்பும் மரியாதையும் வழங்கப்படும் என புதிய விதிகள் கூறுகின்றன.
RBI வெளியிட்ட புதிய விதிமுறைகள்
இந்திய ரிசர்வ் வங்கி கடன் வசூல் செய்வது தொடர்பாக புதிய வரைவு விதிகளை வெளியிட்டுள்ளது. இந்த விதிகள் “RBI (Commercial Banks – Responsible Business Conduct) Second Amendment Directions, 2026” என்ற பெயரில் கொண்டு வரப்பட்டுள்ளன. இந்த விதிகளின் முக்கிய நோக்கம், கடன் பெறுபவர்கள்மீது எந்தவிதமான அத்துமீறல், அழுத்தம், மிரட்டல் அல்லது தவறான நடத்தை நடைபெறாததை உறுதி செய்வதே ஆகும். இந்த விதிகள் குறித்த பொதுமக்கள் கருத்துகள் 2026 மார்ச் 6 வரை கேட்கப்பட்டுள்ளன. அவை ஒப்புதல் பெற்ற பிறகு, இந்த ஆண்டின் ஜூலை 1 முதல் அமலுக்கு வர வாய்ப்பு உள்ளது.
வங்கிகளில் என்ன மாற்றங்கள் வரவிருக்கின்றன?
ஒவ்வொரு வங்கியும் தெளிவான கடன் வசூல் கொள்கை (Recovery Policy) ஒன்றை உருவாக்க வேண்டும்.
EMI செலுத்துவதில் சிரமம் அடையும் கடன் பெறுபவர்களை முன்கூட்டியே கண்டறிந்து, அவர்களுக்கு தேவையான ஆலோசனைகள் மற்றும் வழிகாட்டுதல்களை வழங்க வேண்டும்.
வங்கிகள் தங்களின் கிளைகள், இணையதளம் மற்றும் மொபைல் ஆப்புகளில் அங்கீகரிக்கப்பட்ட கடன் வசூல் முகவர்களின் பட்டியலை வெளியிட வேண்டும்.
எந்தவொரு வசூல் முகவரையும் நியமிக்கும் முன், அது குறித்து கடன் பெறுபவருக்கு வங்கி முன்னதாகவே தகவல் தர வேண்டும்.
கடன் பெறுபவர் ஏதேனும் புகார் அளித்திருந்தால், அந்த புகார் தீர்க்கப்படும் வரை அந்த வழக்கை வசூல் முகவரிடம் ஒப்படைக்கக் கூடாது.
ஆனால் அந்த புகார் பொய்யானது அல்லது தப்பிக்கும் நோக்கில் செய்யப்பட்டது என நிரூபிக்கப்பட்டால், வங்கி தொடர்ந்து நடவடிக்கை எடுக்கலாம்.
கடன் வசூல் முகவர்களுக்கு விதிக்கப்பட்ட கடுமையான விதிகள்
கடன் வசூல் முகவர்களுக்கான புதிய விதிகள்:
காலை 8 மணி முதல் மாலை 7 மணி வரை மட்டுமே கடன் பெறுபவரை தொடர்புகொள்ளலாம்
கடன் பெறுபவரின் தனிப்பட்ட வாழ்க்கை மற்றும் தனியுரிமையை முழுமையாக மதிக்க வேண்டும்
உறவினர்கள், நண்பர்கள், அலுவலக சக ஊழியர்களை தொடர்பு கொள்ளக் கூடாது
துக்க நிகழ்வுகள், திருமணம், திருவிழா போன்ற நேரங்களில் அழைப்புகள் அல்லது நேரில் செல்வது அனுமதிக்கப்படாது
எப்போதும் மரியாதையுடனும், பணிவுடனும் பேச வேண்டும்
குடும்பத்தினரையோ அல்லது அறிமுகமானவர்களையோ தொந்தரவு செய்வது, வன்முறை மிரட்டல் விடுப்பது போன்றவை முழுமையாகத் தடைசெய்யப்பட்டுள்ளது
அழைப்புகள் பதிவு மற்றும் கண்காணிப்பு
புதிய விதிகளின்படி, வங்கிகள், எத்தனை அழைப்புகள் செய்யப்பட்டன, எந்த நேரத்தில் செய்யப்பட்டன என்பதற்கான பதிவுகளை வைத்திருக்க வேண்டும். கடன் பெறுபவருடன் நடைபெறும் உரையாடல்கள் பதிவு (recording) செய்யப்படும்; இது குறித்து அவர்களுக்கு முன்கூட்டியே தெரிவிக்க வேண்டும். வசூல் முகவர்களுக்கு வழங்கப்படும் இலக்குகள் (targets) அல்லது ஊக்கத்தொகைகள், அவர்கள் கடுமையான அல்லது தவறான முறைகளை பயன்படுத்த தூண்டும் வகையில் இருக்கக் கூடாது என்பதையும் வங்கிகள் உறுதி செய்ய வேண்டும்.
எந்தவிதமான மிரட்டல், அவமதிப்பு, மன அழுத்தம் கொடுத்தல் போன்ற செயல்களும் கடுமையாகத் தடைசெய்யப்படும் என ரிசர்வ் வங்கி தெரிவித்துள்ளது. இத்தகைய நடத்தை, வங்கியின் பொறுப்பான வணிக நடத்தைக் கொள்கைக்கு எதிரானதாக கருதப்படும் என்றும், அதை ரிசர்வ் வங்கி ஒருபோதும் பொறுத்துக்கொள்ளாது என்றும் அறிவித்துள்ளது.
Read More : வாகன ஓட்டிகளுக்கு மகிழ்ச்சி செய்தி..! சுங்கக் கட்டணத்தில் 25 சதவீதம் குறைப்பு..!
