பாதுகாப்பான பாலியல் உறவை ஊக்குவிக்கும் வகையில், அரசுகளும் சுகாதார அமைப்புகளும் தொடர்ந்து கான்டம் பயன்பாட்டை பற்றிய விழிப்புணர்வு நிகழ்ச்சிகளை நடத்தி வருகின்றன. இத்தனை முயற்சிகளுக்கும் இடையில், HIV உள்ளிட்ட பாலியல் வழியாக பரவும் நோய்கள் (STI) பரவல் குறித்த கவலைகள் இன்னும் நீடித்தே வருகின்றன.
இந்த சூழலில் பாலியல் நோய்களை கண்டறிய உதவும் புதிய யோசனையாக ‘நிறம் மாறும் காண்டத்தின் ’ (Colour-changing condom) உருவாக்கப்பட்டுள்ளது. குறிப்பிட்ட கிருமிகள் அல்லது வைரஸ்களுடன் தொடர்பு ஏற்பட்டால், இந்த கான்டம் உடனடியாக நிறம் மாறும் வகையில் வடிவமைக்கப்பட்டுள்ளது. இதன் மூலம் பயனர்களுக்கு உடனடி பார்வை எச்சரிக்கை கிடைக்கும்.
இந்த நிறம் மாறும் கான்டம் எப்படி செயல்படுகிறது..?
இந்த காண்டத்தின் மேற்பரப்பில், குறிப்பிட்ட பாக்டீரியா அல்லது வைரஸ்களை கண்டறியும் சிறப்பு அடுக்கு உருவாக்கப்பட்டுள்ளது. இந்த அடுக்கு, சில நோய்க்கிருமிகளுடன் தொடர்பு ஏற்பட்டால் உடனடியாக நிறம் மாறும் வகையில் செயல்படுகிறது. இதன் மூலம், பாலியல் உறவின்போது ஏற்படக்கூடிய தொற்று அபாயத்தை ஆரம்ப கட்டத்திலேயே உணர முடியும்.
காண்டத்தின் பெட்டியில், எந்த நிறம் எந்த நோயை குறிக்கிறது என்பதும் தெளிவாக விளக்கப்பட்டுள்ளது. இதனால், நிற மாற்றத்தை பார்த்த பயனாளர்கள், எந்த வகை தொற்று இருக்கலாம் என்பதை புரிந்து கொண்டு, உடனடியாக மருத்துவ ஆலோசனை பெற ஊக்குவிக்கப்படுகிறார்கள்.
நிறங்களும் நோய்களும்
இந்த நிறம் மாறும் காண்டத்தின் , ஒவ்வொரு நிறமும் ஒரு குறிப்பிட்ட பாலியல் நோயைக் குறிக்கிறது. பச்சை நிறம் க்ளமிடியா (Chlamydia) நோயைக் குறிக்கிறது. மஞ்சள் நிறம் ஹெர்பிஸ் (Herpes) தொற்றைக் சுட்டிக்காட்டுகிறது. நீல நிறம் சிபிலிஸ் (Syphilis) நோயை குறிக்கிறது. ஊதா (Purple) நிறம் மனித பாப்பிலோமா வைரஸ் (HPV) இருப்பதற்கான எச்சரிக்கையாகும்.
இந்த அமைப்பு, போக்குவரத்து சிக்னல் போல செயல்பட்டு, பயனாளிகள் தங்கள் உடல்நல அபாயங்களை எளிதாக உணர உதவுகிறது. நிறம் மாறும் பட்சத்தில், உடனடி மருத்துவ பரிசோதனை மற்றும் ஆலோசனை பெற வேண்டும் என்ற விழிப்புணர்வை இது ஏற்படுத்துகிறது.
பாதுகாப்பும் விழிப்புணர்வும் ஒரே நேரத்தில்
இந்த காண்டத்தின் முதன்மை நோக்கம், பாலியல் உறவின்போது பாதுகாப்பு வழங்குவதோடு மட்டுமல்லாமல், பாலியல் நோய்கள் தொடர்பான அபாயங்களை முன்கூட்டியே உணரச் செய்வதாகும். உடனடி பார்வை அடிப்படையிலான எச்சரிக்கை மூலம், பொறுப்பான பாலியல் பழக்கங்களை ஊக்குவிப்பதே இதன் முக்கிய இலக்காகும்.
இந்த யோசனை யாருடையது?
இந்த நிறம் மாறும் காண்டம் யோசனையை, லண்டனில் உள்ள நியூட்டன் அகாடமி பள்ளியை சேர்ந்த மூன்று பள்ளி மாணவர்கள் உருவாக்கினர். 14 வயதான சிராக் ஷா, தன்யால் அலி, முவாஸ் நவாஸ் ஆகியோர் இணைந்து இந்த புதுமையான திட்டத்தில் பணியாற்றினர்.
அவர்களின் இந்த கண்டுபிடிப்பு, சுகாதார விழிப்புணர்வு மற்றும் பாதுகாப்பு தொழில்நுட்பத்திற்கு அளித்த பங்களிப்புக்காக பல விருதுகளும் பாராட்டுகளும் பெற்றுள்ளது. இளம் வயதிலேயே அறிவியல் சிந்தனை மற்றும் ஆராய்ச்சியின் மூலம் சமூக நலனுக்கான புதுமைகளை உருவாக்க முடியும் என்பதற்கான உதாரணமாக இவர்களின் முயற்சி பார்க்கப்படுகிறது.
வணிக உற்பத்திக்கு இன்னும் தயாராக இல்லை
இந்த நிறம் மாறும் காண்டத்தின் யோசனை 2015 ஆம் ஆண்டில் உருவாக்கப்பட்டது. அதன் பின்னர், இதன் செயல்திறனை மதிப்பிட பல ஆய்வுகள் மேற்கொள்ளப்பட்டு வருகின்றன. ஆனால், இந்த பாதுகாப்பு கருத்து அடிப்படையிலான கான்டத்தின் உற்பத்தி செலவு அதிகமாக இருப்பதால், பெரிய அளவில் வணிக உற்பத்தி மேற்கொள்ளப்படவில்லை.
மேலும், இதன் நீண்டகால பயன்பாடு மற்றும் பக்க விளைவுகள் குறித்து தொடர்ந்து ஆய்வுகள் நடைபெற்று வருகின்றன. தற்போதைய நிலையில், இந்த நிறம் மாறும் காண்டம் சந்தையில் விற்பனைக்குக் கிடைக்கவில்லை என்பது குறிப்பிடத்தக்கது.
