சீனாவில் நிலக்கரிச் சுரங்கத்தில் ஏற்பட்ட வெடிவிபத்தில் குறைந்தது 82 பேர் உயிரிழந்ததாகவும், மேலும் பலர் பூமிக்கடியில் சிக்கியிருக்கலாம் என அஞ்சப்படுவதாகவும் அரசு ஊடகங்கள் செய்தி வெளியிட்டுள்ளன.. சாங்ஷி நகரின் லியுஷென்யு நிலக்கரிச் சுரங்கத்தில் வெள்ளிக்கிழமை மாலை இந்த விபத்து நிகழ்ந்ததாக அதிகாரப்பூர்வ செய்தி நிறுவனமான சின்ஹுவா தெரிவித்துள்ளது. அப்போது சுமார் 247 தொழிலாளர்கள் பூமிக்கடியில் இருந்ததாக கூறப்படுகிறது. சனிக்கிழமை அதிகாலை நிலவரப்படி, 201 பேர் பாதுகாப்பாக பூமிக்கு மேலே கொண்டுவரப்பட்டனர்.
வெடிவிபத்திற்கான காரணம் குறித்து விசாரணை நடைபெற்று வருவதாக சின்ஹுவா செய்தி வெளியிட்டுள்ளது. காணாமல் போனவர்களை மீட்க முழுமையான முயற்சி மேற்கொள்ளவும், விபத்துக்கான காரணத்தை விசாரிக்கவும், மேலும் பொறுப்பானவர்களைப் பொறுப்பேற்கச் செய்யவும் சீன அதிபர் ஷி ஜின்பிங் அழைப்பு விடுத்துள்ளார்
காயமடைந்தவர்களுக்கு சிகிச்சை அளிப்பதிலும், தேடுதல் மற்றும் மீட்புப் பணிகளை மேற்கொள்வதிலும் அதிகாரிகள் “எந்த முயற்சியையும் விட்டுவிடக்கூடாது” என்று ஷி ஜின்பிங் அழைப்பு விடுத்ததாகவும், அதே நேரத்தில் விபத்துக்கான காரணம் குறித்து முழுமையான விசாரணை நடத்தவும், சட்டப்படி கடுமையான பொறுப்புக்கூறலை உறுதி செய்யவும் உத்தரவிட்டதாகவும் சின்ஹுவா செய்தி நிறுவனம் தெரிவித்துள்ளது.
சுரங்க நிர்வாகிகள் கைது
லியுஷென்யு சுரங்கத்திற்குப் பொறுப்பான நிறுவனத்தின் நிர்வாகிகள் கைது செய்யப்பட்டதாக சின்ஹுவா செய்தி நிறுவனம் தெரிவித்துள்ளது. கைது செய்யப்பட்ட நபர்களின் எண்ணிக்கை அல்லது அவர்கள் மீதான குறிப்பிட்ட குற்றச்சாட்டுகள் குறித்து மேலதிக விவரங்கள் எதுவும் வழங்கப்படவில்லை..
ஷான்சி மாகாணம் சீனாவின் முக்கிய நிலக்கரிச் சுரங்க மாகாணமாக அறியப்படுகிறது. கிரீஸை விடப் பெரிய பரப்பளவையும், சுமார் 34 மில்லியன் மக்கள்தொகையையும் கொண்ட இந்த மாகாணத்தின் நூறாயிரக்கணக்கான சுரங்கத் தொழிலாளர்கள் கடந்த ஆண்டு 1.3 பில்லியன் டன் (1.17 பில்லியன் மெட்ரிக் டன்) நிலக்கரியை வெட்டி எடுத்தனர். இது சீனாவின் மொத்த உற்பத்தியில் கிட்டத்தட்ட மூன்றில் ஒரு பங்காகும்.
