மாருதி சுஸுகி நிறுவனம் ‘ஸ்மார்ட் மெயின்டனன்ஸ் பிளான்’ (SMP) எனப்படும் முன்பணம் செலுத்தும் சேவைத் திட்டத்தை அறிமுகப்படுத்தியுள்ளது. இத்திட்டத்தின் மூலம், வாடிக்கையாளர்கள் வாகனப் பராமரிப்புச் செலவுகளை முன்கூட்டியே நிர்ணயம் செய்துகொள்ளலாம். இதன் விளைவாக, எதிர்காலத்தில் தொழிலாளர் கூலி, உதிரிபாகங்கள் மற்றும் இதர பராமரிப்புப் பொருட்களின் விலையில் ஏற்படும் உயர்வால் அவர்கள் பாதிக்கப்படமாட்டார்கள். வாடிக்கையாளர்களுக்கு அதிக வசதியை அளிக்கவும், கார் பராமரிப்புச் செலவுகளை முன்கூட்டியே கணிக்க உதவவும் இப்புதிய அமைப்பு வடிவமைக்கப்பட்டுள்ளது.
மாருதி சுஸுகியின் நிர்வாக இயக்குநரும் தலைமை நிர்வாக அதிகாரியுமான ஹிசாஷி டகேவுச்சி இதுகுறித்து பேசிய போது “வாடிக்கையாளர்களின் தேவைகள் இப்போது தனிப்பயனாக்கம் மற்றும் நெகிழ்வுத்தன்மையை நோக்கி மாறி வருகின்றன. அதனால்தான் நாங்கள் இந்த ‘ஸ்மார்ட் மெயின்டனன்ஸ் பிளான்’-ஐ அறிமுகப்படுத்தியுள்ளோம். இது முன்பணம் செலுத்தும் ஒரு சேவைத் திட்டமாகும். ஒவ்வொரு ஓட்டுநரின் தேவைக்கேற்ப இதை மாற்றியமைத்துக்கொள்ளலாம். எதிர்காலத்தில் சேவைச் செலவுகள் அதிகரித்தாலும், முன்கூட்டியே கட்டணத்தை நிர்ணயம் செய்திருப்பதால் கூடுதல் சுமை குறையும்,” என்று கூறினார்.
இந்த ஸ்மார்ட் மெயின்டனன்ஸ் பிளான் தனிநபர் மற்றும் வணிக ரீதியான வாகன உரிமையாளர்கள் இருவருக்கும் கிடைக்கிறது. புதிய கார் வாங்கும்போதே இத்திட்டத்தை எடுத்துக்கொள்ளலாம் அல்லது பின்னர் மாருதி சுஸுகியின் அங்கீகரிக்கப்பட்ட பணிமனையில் (workshop) வழக்கமான பராமரிப்புப் பணிகளின்போதும் இதை வாங்கிக்கொள்ளலாம். இத்திட்டத்தின் கீழ் பல்வேறு விருப்பத் தேர்வுகள் உள்ளன. தொழிலாளர் சேவை மற்றும் உதிரிபாகங்கள் மட்டுமின்றி, வணிக வாகனங்களுக்கான சிறிய அளவிலான சேவைகள், வாடிக்கையாளர் கோரும் சிறப்புச் சேவைகள், இன்ஜின் ஆயில், கூலண்ட் (coolant) போன்ற பல வசதிகளும் இதில் அடங்கும். கிளட்ச் மற்றும் பிரேக் பாகங்கள் போன்ற சில குறிப்பிட்ட பாகங்களுக்கு ஏற்படும் தேய்மானத்திற்கான கூடுதல் பாதுகாப்பையும் (coverage) இதில் சேர்த்துக்கொள்ளலாம்.
இத்திட்டத்தின் முக்கிய நன்மை செலவு சேமிப்பு ஆகும். தொழிலாளர் கூலியில் குறைந்தபட்சம் 10 சதவீத சேமிப்பு இருக்கும் என்று நிறுவனம் கூறுகிறது. உதிரிபாகங்கள் மற்றும் இதர பராமரிப்புப் பொருட்களிலும் கூடுதல் சேமிப்பைப் பெறலாம். முன்பணம் செலுத்தும் இம்முறை, எதிர்கால விலை உயர்வின் தாக்கத்தைக் குறைக்கும். தனிநபர் வாகனங்களுக்கு 2 ஆண்டுகள் அல்லது 20,000 கி.மீ முதல் அதிகபட்சமாக 10 ஆண்டுகள் அல்லது 1,00,000 கி.மீ வரையிலான திட்டங்கள் உள்ளன. வணிக வாகனங்களுக்கு 10 ஆண்டுகள் அல்லது 1,60,000 கி.மீ வரையிலான பாதுகாப்புத் திட்டங்கள் உள்ளன.
உதாரணமாக, ஒருவர் 2026-ல் ஒரு புதிய மாருதி காரை வாங்குகிறார் என்று வைத்துக்கொள்வோம். காரை வாங்கும்போதே அவர் 5 ஆண்டுகளுக்கான ஸ்மார்ட் மெயின்டனன்ஸ் பிளானை எடுத்துக்கொள்கிறார். அதற்காக அவர் ஒரு குறிப்பிட்ட தொகையை முன்கூட்டியே செலுத்துகிறார். அப்போது, ஒரு சேவைக்கான சராசரி செலவு ரூ. 3,000 என்று வைத்துக்கொள்வோம்.
ஆனால் 2-3 ஆண்டுகளுக்குப் பிறகு, அதே சேவைக்கான கட்டணம் ரூ. 4,500-ஆக உயர்ந்தது. ஒரு சாதாரண வாடிக்கையாளர் ஒவ்வொரு சேவைக்கும் கூடுதலாக ரூ. 1,500 செலுத்த வேண்டியிருக்கும். ஆனால் ரவி தனது திட்டத்தின் (plan) காரணமாக அதே பழைய கட்டணத்தில் சேவையைப் பெறுகிறார். 5 ஆண்டுகளில் அவர் குறைந்தது 8 முதல் 10 சேவைகளைப் பெற்றால், ஒவ்வொரு சேவைக்கும் அவருக்கு சுமார் ரூ. 1,000 முதல் ரூ. 1,500 வரை சேமிப்பு கிடைக்கும். ஒட்டுமொத்தமாக, அவர் ஆயிரக்கணக்கான ரூபாயைச் சேமிப்பார்.
மற்றொரு நன்மை என்னவென்றால், இந்தச் சேவை நாடு முழுவதும் கிடைக்கிறது. இந்தியாவில் உள்ள எந்தவொரு மாருதி சுஸுகி அங்கீகரிக்கப்பட்ட பணிமனையிலும் (workshop) இத்திட்டத்தின் கீழ் சேவைகளைப் பெறலாம். இத்திட்டத்தை நாட்டின் எந்தப் பகுதியிலும் பயன்படுத்திக்கொள்ளலாம்..
இதை எங்கு வாங்கினோம் என்பது முக்கியமல்ல. ஒட்டுமொத்தமாக, இந்த SMP மூலம், வாகன உரிமையாளர்கள் தங்கள் சேவைக்கான கட்டணங்களை முன்கூட்டியே நிர்ணயித்துக்கொள்ளும் வாய்ப்பை மாருதி சுஸுகி வழங்குகிறது. இது கார் வைத்திருப்பதை மிகவும் எளிதானதாகவும், செலவுகளை முன்கூட்டியே கணிக்கக்கூடியதாகவும் மாற்றும். இந்த மாற்றம் வாகன உரிமையாளர்களுக்கு நீண்ட கால அடிப்படையில் நிதிப் பாதுகாப்பையும், செலவுகள் குறித்த தெளிவையும் வழங்கும்.
