வெனிசுலாவில் நேற்று மாலை இரண்டு சக்திவாய்ந்த நிலநடுக்கங்கள் ஏற்பட்டன. இந்த இயற்கை பேரிடரில் 164 பேர் உயிரிழந்ததாகவும், 971 பேர் காயமடைந்ததாகவும் இடைக்கால அதிபர் டெல்சி ரோட்ரிக்ஸ் இன்று அதிகாரப்பூர்வமாக அறிவித்தார். ஆரம்பத்தில் உயிரிழந்தவர்களின் எண்ணிக்கை 32 ஆக இருந்தது. ஆனால் இடிபாடுகளிலிருந்து மேலும் பல உடல்கள் மீட்கப்பட்டதால் இந்த எண்ணிக்கை வேகமாக அதிகரித்துள்ளது. காயமடைந்தவர்களின் எண்ணிக்கையும் அதிகமாக உள்ளது, மேலும் உயிரிழப்பு எண்ணிக்கை இன்னும் அதிகரிக்கக்கூடும் என்று எதிர்பார்க்கப்படுகிறது.
அமெரிக்க புவியியல் ஆய்வு மையத்தின் (USGS) தகவலின்படி, கரீபியன் கடற்கரையில் உள்ள மோரோன் நகருக்கு அருகே, ஒரு நிமிடத்திற்கும் சற்று அதிகமான இடைவெளியில் 7.2 மற்றும் 7.5 ரிக்டர் அளவிலான இரண்டு நிலநடுக்கங்கள் ஏற்பட்டன. கடந்த நூற்றாண்டில் வெனிசுலாவைத் தாக்கிய நிலநடுக்கங்களிலேயே இவைதான் மிக சக்திவாய்ந்தவை என்று நிபுணர்கள் கூறுகின்றனர்.
இதன் தாக்கம் மிகவும் தீவிரமாக இருந்ததால், தலைநகர் கராகஸிலிருந்து சுமார் 1,700 கிலோமீட்டர் தொலைவில் உள்ள பிரேசிலின் அமேசான் பிராந்தியத்திலும், கொலம்பியாவிலும் கூட கட்டிடங்கள் அதிர்ந்தன. அமெரிக்க பசிபிக் சுனாமி எச்சரிக்கை மையம் ஆரம்பத்தில் சுனாமி எச்சரிக்கையை விடுத்தது, ஆனால் பின்னர் அதைத் திரும்பப் பெற்றது.
நிலநடுக்கத்தால் கடுமையாகப் பாதிக்கப்பட்ட கடலோரப் பகுதியான லா குவைராவை “பேரிடர் மண்டலமாக” இடைக்கால அதிபர் டெல்சி ரோட்ரிக்ஸ் அறிவித்தார். அங்கு பல கட்டிடங்கள் இடிந்து விழுந்தன. இடிபாடுகளுக்குள் சிக்கியிருந்த மூன்று குழந்தைகளை மீட்புக் குழுவினர் பத்திரமாக மீட்டனர். நிலநடுக்கம் ஏற்பட்டபோது வெனிசுலா தலைநகர் கராகஸில் மக்கள் பீதியடைந்து வீதிகளுக்கு ஓடி வந்தனர். நகரில் மின்சாரம் மற்றும் செல்போன் சிக்னல்கள் முற்றிலும் துண்டிக்கப்பட்டன.
சேதம் காரணமாக நாட்டின் முக்கிய விமான நிலையமான சைமன் பொலிவார் சர்வதேச விமான நிலையம் மூடப்பட்டது. சுரங்கப்பாதை ரயில்கள் மற்றும் எரிவாயு விநியோகம் நிறுத்தப்பட்டதாக அரசு அறிவித்தது. பள்ளிகள் தற்காலிகமாக மூடப்பட்டு, அவை தங்குமிடங்களாக மாற்றப்பட்டு வருகின்றன. இதற்கிடையில், நிலநடுக்கத்திற்குப் பிந்தைய அதிர்வுகள் (aftershocks) குறித்த அச்சம் காரணமாக மக்கள் தங்கள் வீடுகளுக்குச் செல்லாமல் தெருக்கள், பூங்காக்கள் மற்றும் மெட்ரோ நிலையங்களில் இரவைக் கழித்தனர்.
இந்த பேரிடரை எதிர்கொள்ளும் வெனிசுலாவிற்கு உலகம் முழுவதிலுமிருந்து உதவிகள் குவிந்து வருகின்றன. நிவாரணக் குழுக்கள், மருத்துவ வளங்கள் மற்றும் மனிதாபிமான உதவிகள் உடனடியாக அனுப்பப்படுவதாக அமெரிக்க வெளியுறவுத்துறை அதிகாரி மார்கோ ரூபியோ அறிவித்தார். இச்சூழலில், இடைக்கால அதிபர் டெல்சி ரோட்ரிக்ஸ் அமெரிக்க அதிபர் டொனால்ட் டிரம்ப் மற்றும் ரூபியோ ஆகியோருக்கு நன்றி தெரிவித்தார்.
மேலும், ஏற்கனவே உதவிப் பணியாளர்களை அனுப்பியுள்ள கத்தார், மெக்சிகோ, எல் சால்வடார் மற்றும் ஈக்வடார் நாட்டுத் தலைவர்களுக்கும் அவர் நன்றி கூறினார். தற்போது, உள்ளூர் மக்களும் மீட்புக் குழுவினரும் இயந்திரக் கருவிகளின் உதவியுடன் இடிபாடுகளை அகற்றி உயிர்களைக் காப்பாற்ற தீவிரமாகப் பணியாற்றி வருகின்றனர்.
