தமிழ், மலையாளம், கன்னடம் உள்ளிட்ட தென்னிந்திய மொழித் திரைப்படங்களில் நடித்துள்ள நடிகை உமா சங்கரி, தற்போது மார்பகப் புற்றுநோய்க்கு எதிராக சிகிச்சை பெற்று வருகிறார். அவரது உடல்நிலை குறித்த தகவல் ரசிகர்கள் மத்தியில் கவலையை ஏற்படுத்தியுள்ளது.
ஒரு காலத்தில் பல்வேறு கதாபாத்திரங்களில் நடித்து ரசிகர்களின் கவனத்தை ஈர்த்த உமா சங்கரி, குறிப்பாக ‘சொக்கத் தங்கம்’ திரைப்படத்தில் நடித்ததன் மூலம் பரவலாக அறியப்பட்டார். திருமணத்திற்குப் பிறகு திரைப்படங்களில் இருந்து விலகி, குடும்ப வாழ்க்கையில் கவனம் செலுத்தி வந்த அவர், நீண்ட இடைவெளிக்குப் பிறகு தனது உடல்நிலை குறித்த தகவலை பகிர்ந்துள்ளார்.
தற்போது மார்பகப் புற்றுநோய்க்காக மருத்துவர்களின் கண்காணிப்பில் சிகிச்சை பெற்று வரும் அவர், கீமோதெரபி மற்றும் இம்யூனோதெரபி சிகிச்சை மேற்கொண்டு வருவதாக கூறியுள்ளார். மருத்துவக் குழுவின் ஆலோசனையின்படி சிகிச்சை தொடர்ந்து நடைபெற்று வருவதாகவும் தகவல் வெளியாகியுள்ளது.
இதுகுறித்து அவர் வெளியிட்டுள்ள பதிவில், சிகிச்சைப் பயணம் சவாலாக இருந்தாலும் மன உறுதியை இழக்காமல் முன்னேறி வருவதாக தெரிவித்துள்ளார். மேலும், தனக்காக தொடர்ந்து பிரார்த்தனை செய்து, அன்பும் ஆதரவும் அளித்து வரும் அனைவருக்கும் நன்றியைத் தெரிவித்துள்ள அவர், விரைவில் குணமடைந்து வழக்கமான வாழ்க்கைக்குத் திரும்புவேன் என்ற நம்பிக்கையையும் வெளிப்படுத்தியுள்ளார்.
இந்த தகவல் வெளியாகியதைத் தொடர்ந்து, சமூக வலைதளங்களில் ஏராளமான ரசிகர்கள் மற்றும் திரையுலக பிரபலங்கள், உமா சங்கரி விரைவில் முழுமையாக உடல்நலம் பெற்று மீண்டு வர வேண்டும் என வாழ்த்துகளை பதிவிட்டு வருகின்றனர்.
Also Read: 2 மாத பெண் குழந்தையின் உடலில் இருந்த காயங்கள்.. சிசிடிவியில் பதிவான அதிர்ச்சி காட்சிகள்!
