விமான நிலையம், ரயில் நிலையம், ஷாப்பிங் மால், ஹோட்டல், கஃபே போன்ற பொது இடங்களில் இலவச Wi-Fi பயன்படுத்துவது இன்று பலரின் வழக்கமாகிவிட்டது. ஆனால், கவனக்குறைவாக பொது Wi-Fi-யை பயன்படுத்தினால், உங்கள் தனிப்பட்ட தகவல்கள் ஹேக்கர்களின் கைகளில் சிக்கக்கூடும் என சைபர் பாதுகாப்பு நிபுணர்கள் எச்சரிக்கின்றனர். பொது இடங்களில் கிடைக்கும் இலவச Wi-Fi இணைப்பு, வீட்டில் பயன்படுத்தும் தனிப்பட்ட Wi-Fi போல பாதுகாப்பாக இருக்காது. ஒரே நேரத்தில் நூற்றுக்கணக்கானோர் அதே நெட்வொர்க்கைப் பயன்படுத்துவதால், ஹேக்கர்கள் இணையப் பயன்பாட்டை கண்காணிக்கவும், போலி Wi-Fi நெட்வொர்க்குகளை உருவாக்கவும், பயனர்களின் தகவல்களைத் திருடவும் அதிக வாய்ப்பு உள்ளது.
இதனால், பொது Wi-Fi பயன்படுத்தும் போது சில முக்கியமான விஷயங்களில் கவனமாக இருக்க வேண்டும் என்று நிபுணர்கள் அறிவுறுத்துகின்றனர்.
ஆன்லைன் வங்கி பரிவர்த்தனைகளைத் தவிர்க்கவும்
பொது Wi-Fi பயன்படுத்தும் போது, வங்கி செயலிகள் (Banking Apps) திறப்பது, பணம் அனுப்புவது அல்லது UPI மூலம் பணப் பரிவர்த்தனை செய்வதை முடிந்தவரை தவிர்க்க வேண்டும். பாதுகாப்பற்ற இணைய இணைப்பில், உங்கள் பயனர்பெயர், கடவுச்சொல் மற்றும் வங்கி விவரங்களை ஹேக்கர்கள் திருட முயற்சிக்கலாம்.
போலி Wi-Fi நெட்வொர்க்குகளில் சிக்காதீர்கள்
“Airport Free Wi-Fi”, “Cafe Guest” போன்ற பெயர்களில் போலி Wi-Fi இணைப்புகளை ஹேக்கர்கள் உருவாக்கலாம். அவை உண்மையானவை என்று நம்பி இணைந்தால், உங்கள் இணையப் பயன்பாட்டை அவர்கள் கண்காணிக்க முடியும். எனவே, அந்த இடத்தின் ஊழியர்களிடம் Wi-Fi-யின் சரியான பெயரை உறுதி செய்த பிறகே இணைவது நல்லது.
File Sharing-ஐ அணைத்து வையுங்கள்
மொபைல் அல்லது லேப்டாப்பில் File Sharing மற்றும் Device Discovery போன்ற வசதிகள் இயக்கப்பட்டிருந்தால், அதே Wi-Fi பயன்படுத்தும் மற்றவர்கள் உங்கள் சாதனத்தை அணுகும் அபாயம் ஏற்படலாம். எனவே, பொது Wi-Fi பயன்படுத்தும் முன் இந்த வசதிகளை அணைத்து வைப்பது பாதுகாப்பானது.
சாப்ட்வேர் அப்டேட்டை தவிர்க்காதீர்கள்
மொபைல், லேப்டாப், இணைய உலாவி (Browser), செயலிகள் (Apps) ஆகியவற்றை எப்போதும் புதுப்பிக்கப்பட்ட நிலையில் வைத்திருக்க வேண்டும். புதிய அப்டேட்களில் பாதுகாப்பு குறைபாடுகளை சரிசெய்யும் வசதிகள் இடம்பெற்றிருப்பதால், ஹேக்கர்கள் தாக்கும் அபாயம் குறையும்.
VPN பயன்படுத்துவது கூடுதல் பாதுகாப்பு
VPN (Virtual Private Network) பயன்படுத்தினால், உங்கள் இணையப் பயன்பாடு குறியாக்கம் (Encryption) செய்யப்படும். இதனால், அதே Wi-Fi பயன்படுத்தும் மற்றவர்கள் உங்கள் தகவல்களை எளிதில் பார்க்க முடியாது. இது முழுமையான பாதுகாப்பை வழங்காவிட்டாலும், கூடுதல் பாதுகாப்பு அளிக்கும்.
பயன்படுத்தி முடித்ததும் Wi-Fi-யை துண்டியுங்கள்
பொது Wi-Fi பயன்படுத்தி முடித்த பிறகு, அதை Disconnect செய்ய மறக்காதீர்கள். சில மொபைல்களில் பழைய Wi-Fi நெட்வொர்க்குகளுடன் தானாகவே மீண்டும் இணையும் வசதி இருக்கும். இதை ஹேக்கர்கள் பயன்படுத்தி போலி நெட்வொர்க்கில் உங்கள் சாதனத்தை இணைக்க வாய்ப்பு உள்ளது.
இன்றைய டிஜிட்டல் காலத்தில், சைபர் பாதுகாப்பு என்பது நிறுவனங்களுக்கு மட்டுமல்ல, ஒவ்வொரு ஸ்மார்ட்போன் மற்றும் லேப்டாப் பயன்படுத்துபவருக்கும் அவசியமான ஒன்றாக மாறியுள்ளது. சரியான Wi-Fi நெட்வொர்க்கை தேர்வு செய்வது, பொது Wi-Fi-யில் வங்கி பரிவர்த்தனைகளைத் தவிர்ப்பது, சாதனங்களை புதுப்பித்த நிலையில் வைத்திருப்பது போன்ற எளிய முன்னெச்சரிக்கை நடவடிக்கைகள் உங்கள் தனிப்பட்ட தகவல்களை பாதுகாக்க உதவும்.
Also Read: கிச்சனில் அதிக கிருமிகள் இருக்கும் இடம் இதுதான்… நிபுணர்கள் கூறும் முக்கிய தகவல்!
