இந்த ஆடை அணிந்து ராக்கி கட்டலாமா? சர்ச்சையில் சிக்கிய கீர்த்தி சனோன்.. விளம்பரத்தை திரும்பப் பெற்ற நகைக்கடை!

பண்டிகை விளம்பரங்களில் இடம்பெறும் காட்சிகள் மற்றும் நடிகர்களின் தோற்றம் குறித்த விவாதங்கள் சமூக வலைதளங்களில் அவ்வப்போது எழுவது வழக்கம். அந்த வகையில், பாலிவுட் நடிகை கீர்த்தி சனோன் நடித்த ரக் ஷா பந்தன் சிறப்பு விளம்பரம் தற்போது கடும் சர்ச்சையை ஏற்படுத்தியுள்ளது. விளம்பரத்தில் இடம்பெற்ற சில காட்சிகள் குறித்து விமர்சனங்கள் எழுந்த நிலையில், அந்த விளம்பரத்தை நகைக்கடை நிறுவனம் தற்போது அனைத்து தளங்களிலிருந்தும் நீக்கியுள்ளது.

ரக் ஷா பந்தனை முன்னிட்டு வெளியிடப்பட்ட விளம்பரத்தில் கீர்த்தி சனோன் தனது செல்ல நாய்க்கு ராக்கி கட்டும் காட்சி இடம்பெற்றிருந்தது. அதே விளம்பரத்தில் அவர் அணிந்திருந்த உடை குறித்தும் சிலர் சமூக வலைதளங்களில் விமர்சனங்களை முன்வைத்தனர். இதனால் விளம்பரத்தின் நோக்கம் மற்றும் அதில் காட்டப்பட்ட காட்சிகள் குறித்து இணையத்தில் பல்வேறு கருத்துகள் பரவின.

இந்த விவகாரத்தில் நடிகை கங்கனா ரனாவத்தும் தனது விமர்சனத்தை வெளிப்படுத்தியிருந்தார். இதனால் ஏற்கனவே சமூக வலைதளங்களில் பேசுபொருளாக இருந்த விளம்பரம் தொடர்பான விவாதம் மேலும் தீவிரமடைந்தது.

இதற்கு பதிலளித்த கீர்த்தி சனோன், ரக் ஷா பந்தன் போன்ற பண்டிகைகளின் அர்த்தத்தை ஒருவரின் ஆடையை வைத்து தீர்மானிக்க முடியாது என தெரிவித்தார். பண்டிகைகளின் முக்கியத்துவம் பாரம்பரியத்தின் மீதான நம்பிக்கை, அன்பு மற்றும் அதனுடன் தொடர்புடைய உணர்வுகளில்தான் இருப்பதாக அவர் கூறினார்.

தனது சகோதரியுடன் ராக்கி கட்டிக்கொள்ளும் வழக்கம் இருப்பதாக தெரிவித்த கீர்த்தி, சகோதரர்கள் அளிக்கும் பாதுகாப்பு உணர்வைப் போலவே பெண்களும் தங்களைத் தாங்களே பாதுகாத்துக்கொள்ளும் திறன் கொண்டவர்கள் என்பதை வலியுறுத்தினார். குடும்ப உறுப்பினர்களாக கருதப்படும் செல்லப்பிராணிகளிடமும் அதே அன்பும் அக்கறையும் இருப்பதால், அவற்றுக்காகவும் நல்வாழ்வு மற்றும் நீண்ட ஆயுளுக்காக பிரார்த்திப்பதாக அவர் குறிப்பிட்டார்.

மேலும், ஒரு பெண் என்ன உடை அணிய வேண்டும் என்பதை தொடர்ந்து மற்றவர்கள் தீர்மானிப்பது எப்போது நிற்கும் என்றும் கீர்த்தி கேள்வி எழுப்பினார். காலத்துக்கு ஏற்ப ஃபேஷன் மாறினாலும், ஒரு பெண்ணின் கலாசாரம் மற்றும் பண்பாட்டை அவரது ஆடையின் அடிப்படையில் மதிப்பிடுவது சரியான அணுகுமுறை அல்ல என்றும் அவர் தெரிவித்தார். பாரம்பரியம் என்பது ஆடைகளில் மட்டும் வெளிப்படுவதில்லை; அது ஒருவரின் எண்ணங்களிலும் இதயத்திலும் இருப்பதாகவும் கூறினார்.

இதற்கிடையில், விளம்பரம் தொடர்பான சர்ச்சை தொடர்ந்து அதிகரித்ததைத் தொடர்ந்து, சம்பந்தப்பட்ட நகைக்கடை நிறுவனம் அந்த விளம்பரத்தை அனைத்து ஊடக தளங்களிலிருந்தும் திரும்பப் பெற்றுள்ளது. இதன் மூலம் கீர்த்தி சனோன் நடித்த ரக் ஷா பந்தன் விளம்பரம் தொடர்பான சர்ச்சை புதிய கட்டத்தை எட்டியுள்ளது.

Also Read: “புருஷன் வேண்டாம்.. கள்ளக்காதலன் கூட இருந்தா போதும்!” கள்ளக்காதல் மோகத்தில் மனைவி செய்த கொடூரம்!