விஜய் டிவியில் ஒளிபரப்பாகும் பிக்பாஸ் சீசன் 10 மேடையில் ‘தலைமைத்துவம்’ குறித்து தான் பேசிய வார்த்தைகள், சர்ச்சையான நிலையில், அதற்கு விஜய் சேதுபதி விளக்கம் அளித்துள்ளார்.
நடிகர் கமல்ஹாசனுக்குப் பிறகு பிக்பாஸ் நிகழ்ச்சியை தொகுத்து வழங்கி வரும் விஜய் சேதுபதி, சமீபத்திய வார இறுதி எபிசோடில் போட்டியாளர் ஒருவருக்கு ஆலோசனையும் அறிவுரையும் வழங்கினார். அப்போது, “தலைவன் என்றால் என்னவென்றே தெரியாமல், தலைமைப் பண்பைப் பற்றிப் புரிதலே இல்லாமல் வாய்க்கு வந்த வாக்குறுதிகளை அள்ளி வீசிவிட்டு, களத்தில் சிக்கல்களும் பொறுப்புகளும் எழும்போது அடுத்தவர் மீது பழியைப் போட்டுவிட்டு நழுவுவது நல்ல தலைவனுக்கான இலக்கணம் அல்ல; அது அப்பட்டமான ஏமாற்று வேலை” என்று தனது கருத்துகளைப் பதிவு செய்திருந்தார்.
அவர் நிகழ்ச்சிச் சூழலைக் கருத்தில் கொண்டு இதைப் பேசியிருந்தாலும், தற்போதைய அரசியல் சூழலில் தமிழக முதல்வராகப் பொறுப்பு வகிக்கும் தவெக தலைவர் விஜயை மறைமுகமாகத் தாக்கித்தான் விஜய் சேதுபதி இவ்வாறு பேசினார் என்ற விவாதம் இணையத்தில் தீயாகப் பரவியது. இதனால் கொதிப்படைந்த தவெக தொண்டர்களும், விஜய் ரசிகர்களும் சமூக வலைதளங்களில் விஜய் சேதுபதியைக் கடுமையாகச் சாடி பதிவுகளை வெளியிடத் தொடங்கினர். இயக்குநர் சீனு ராமசாமி, நாம் தமிழர் கட்சி ஒருங்கிணைப்பாளர் சீமான் மற்றும் அமைச்சர்கள் எனப் பல்வேறு தரப்பினரும் இதில் அடுத்தடுத்து கருத்துத் தெரிவித்ததால், இச்சம்பவம் ஒரு பெரும் அரசியல்-சினிமா மோதலாக உருவெடுத்தது.
சர்ச்சை நாளுக்கு நாள் பூதாகரமாக வெடித்ததைத் தொடர்ந்து, இந்நிகழ்ச்சியை ஒளிபரப்பும் விஜய் தொலைக்காட்சி நிர்வாகம் விஜய் சேதுபதி விளக்கம் அளிக்கும் வீடியோவை வெளியிட்டுள்ளது.
அந்த வீடியோவில் “பிக்பாஸ் மேடையில் நான் முன்வைக்கும் கருத்துகள் அனைத்தும் இந்த வீட்டின் எல்லைக்குள்ளும், இங்கே இருக்கும் போட்டியாளர்களுக்கும், எங்களின் நிகழ்ச்சி தயாரிப்புக் குழுவிற்கும் மட்டுமே உரியவை. வெளியுலகில் இருக்கும் எந்தவொரு குறிப்பிட்ட தனிநபரையோ, அரசியல் அமைப்புகளையோ சுட்டிக்காட்டி இது பேசப்படவில்லை.
#Day13 #Promo1 of #BiggBossTamil
— Vijay Television (@vijaytelevision) September 19, 2026
Bigg Boss Tamil Season 10 – இன்று இரவு 9:30 மணிக்கு.. நம்ம விஜய் டிவில.. #BiggBossTamilSeason10 #Ottikichi #VijaySethupathi #CarniVizha #BiggBossSeason10Tamil #BiggBoss10 #BiggBossSeason10 #BiggBossTamilBB10 #VijayTV #VijayTelevision pic.twitter.com/cu6fRBUSF1
இயல்பாகவே இது அனைவருக்கும் புரிந்திருக்கும் என்றுதான் முதலில் நினைத்தேன்; ஆனால் முந்தைய வாரமே இதைத் தெளிவுபடுத்தியிருக்க வேண்டும், இப்போது சூழ்நிலை இதை வெளிப்படையாக பேச வேண்டிய கட்டாயத்திற்குத் தள்ளிவிட்டது” என்று தனது நிலைப்பாட்டை தெரிவித்துள்ளார்.
