ஆசிய விளையாட்டுப் போட்டிகள் 2026-ல் இந்திய மகளிர் ஹாக்கி அணியின் ஆதிக்கம் தொடர்ந்து வருகிறது. வெள்ளிக்கிழமையன்று ககாமிகஹாராவில் நடைபெற்ற பூல் பி (Pool B) லீக் போட்டியில், போட்டியை நடத்தும் ஜப்பானை 3-1 என்ற கோல் கணக்கில் இந்திய அணி வீழ்த்தியது. இந்த வெற்றியின் மூலம் இந்திய அணி தனது அரையிறுதி வாய்ப்பை உறுதி செய்துள்ளது. லீக் சுற்றின் கடைசிப் போட்டியில் இந்திய அணி சிங்கப்பூரை எதிர்கொள்ளவுள்ளது.
முன்னதாக, உஸ்பெகிஸ்தானுக்கு எதிரான முதல் போட்டியில் 19-0 என்ற கணக்கிலும், இந்தோனேசியாவுக்கு எதிராக 17-1 என்ற கணக்கிலும், தாய்லாந்துக்கு எதிராக 20-1 என்ற கோல் கணக்கிலும் இந்திய அணி அபார வெற்றி பெற்றிருந்தது. தற்போது ஜப்பானுக்கு எதிரான இந்த முக்கியமான போட்டியில் லால்ரெம்சியாமி, இஷிகா மற்றும் நவ்நீத் கவுர் ஆகியோர் இந்தியாவுக்காக தலா ஒரு கோல் அடித்து அசத்தினர்.
போட்டியின் தொடக்கத்திலிருந்தே ஜப்பான் அணிக்கு இந்தியா கடும் நெருக்கடி அளித்தது. நேஹா மற்றும் நவ்நீத் கவுர் ஆகியோர் ஆரம்பத்தில் கிடைத்த சில வாய்ப்புகளைத் தவறவிட்டனர். பின்னர் ஆட்டத்தின் 5-வது நிமிடத்தில், நவ்நீத் அடித்த பந்து ஜப்பானிய வீராங்கனையின் ஹாக்கி ஸ்டிக்கால் தடுக்கப்பட்டு வேகம் குறைந்த நிலையில், அதை லாவகமாகப் பிடித்த லால்ரெம்சியாமி, ஜப்பான் கோல்கீப்பர் யூ குடோவைத் தாண்டி முதல் கோலை அடித்தார்.
7-வது நிமிடத்தில் இந்தியாவுக்குக் கிடைத்த பெனால்டி கார்னர் வாய்ப்பு நழுவியது. அதைத் தொடர்ந்து ஜப்பான் அணி பதில் தாக்குதல் நடத்திய நிலையில், இந்திய வீராங்கனை பிச்சு தேவி தனது காலை நீட்டி பந்தை அருமையாகத் தடுத்து இந்திய அணியைக் காப்பாற்றினார்.
முதல் கால்பகுதியின் முடிவில் இந்தியா 1-0 என முன்னிலை வகித்தது. தொடர்ந்து நடைபெற்ற இரண்டாவது கால்பகுதியில், 30-வது நிமிடத்தில் நவ்நீத் கவுர் நேரடியாக அடித்த பெனால்டி கார்னர் வாய்ப்பு தடுக்கப்பட்டது. எனினும், திரும்பி வந்த பந்தை இஷிகா அபாரமாக கோலாக மாற்றினார். இதனால் ஆட்டத்தின் முதல் பாதியில் இந்தியா 2-0 என முன்னிலை பெற்றது.
மூன்றாவது கால்பகுதியில் ஆட்டத்தின் 36-வது நிமிடத்தில் நவ்நீத் கவுர் அசத்தலான கோலை அடித்தார். வட்டத்திற்குள் பந்தைப் பெற்ற அவர், வலதுபுறமாக நகர்ந்து ஜப்பானிய கோல்கீப்பருக்கு மேலாகப் பந்தைச் செலுத்தி 3-0 என இந்தியாவின் முன்னிலையை அதிகரித்தார்.
நான்காவது கால்பகுதியின் முதல் நிமிடத்தில் ஜப்பான் அணி தனது முதல் கோலைப் பதிவு செய்தது. அந்த அணியின் ஷிஹோ கோபயகாவா இந்திய கோல்கீப்பர் சவிதா புனியாவின் இடதுபுறம் இருந்த இடைவெளியைப் பயன்படுத்தி ஒரு கோல் அடித்தார். இதனால் கோல் கணக்கு 3-1 என மாறியது.
ஆட்டத்தின் எஞ்சிய நேரத்திலும் இந்திய வீராங்கனைகள் பதற்றமின்றி நிதானமாக விளையாடி ஆதிக்கத்தைச் செலுத்தினர். இறுதியில் 3-1 என்ற கோல் கணக்கில் ஜப்பானை வீழ்த்தி இந்திய அணி வெற்றியைப் பதிவு செய்தது.
