அக்டோபர் 2-ம் தேதி மொபைல் போன், ஆக்சஸரீஸ் உள்ளிட்ட பொருட்களை கடைகளில் வாங்கத் திட்டமிட்டுள்ளவர்கள் மாற்று கட்டண முறையைத் தயாராக வைத்திருக்க வேண்டிய நிலை ஏற்பட்டுள்ளது. நாடு முழுவதும் உள்ள மொபைல் சில்லறை விற்பனையாளர்கள் அன்று ‘No UPI Day’ கடைப்பிடிக்க அழைப்பு விடுத்துள்ளனர்.
UPI மூலம் நடைபெறும் குறிப்பிட்ட வணிகப் பரிவர்த்தனைகளுக்கு 0.4 சதவீத Merchant Discount Rate (MDR) அமல்படுத்தப்பட உள்ளதை எதிர்த்து இந்தப் போராட்டம் முன்னெடுக்கப்படுகிறது. அக்டோபர் 15 முதல் ₹2,000-க்கும் அதிகமான தகுதியான merchant UPI பரிவர்த்தனைகளுக்கு 0.4% MDR அமலுக்கு வர உள்ளது. அதே நேரத்தில், தனிநபர் முதல் தனிநபருக்கான UPI பணப்பரிவர்த்தனைகளுக்கும், விதிகளுக்குள் வரும் சிறிய வணிகப் பரிவர்த்தனைகளுக்கும் இந்தக் கட்டணம் பொருந்தாது.
ஏன் மொபைல் விற்பனையாளர்கள் போராட்டம்?
ஆல் இந்தியா மொபைல் ரீட்டெய்லர்ஸ் அசோசியேஷன் (AIMRA) இந்தப் போராட்டத்திற்கு அழைப்பு விடுத்துள்ளது. UPI மூலம் பணம் பெறுவதற்கான கூடுதல் செலவு சிறிய மற்றும் நடுத்தர மொபைல் விற்பனையாளர்களின் வருவாயை பாதிக்கலாம் என்பது அமைப்பின் முக்கிய கவலை.
அக்டோபர் 2-ம் தேதி விற்பனையாளர்கள் தங்களது UPI QR குறியீடுகளை கருப்பு துணியால் மூடி, அன்று UPI பணப்பரிவர்த்தனைகளை ஏற்காமல் போராட்டத்தில் ஈடுபட உள்ளதாக AIMRA தெரிவித்துள்ளது.
UPI பரிவர்த்தனைகளுக்கு தொடர்ந்து பூஜ்ய MDR நடைமுறையே இருக்க வேண்டும் என்பதுதான் தங்களது முக்கிய கோரிக்கை என AIMRA தெரிவித்துள்ளது.
விற்பனையாளர்களுக்கு எவ்வளவு கூடுதல் செலவு?
AIMRA சார்பில் மத்திய நிதியமைச்சரிடம் அளிக்கப்பட்ட மனுவில், மாதத்திற்கு ₹5 லட்சம் முதல் ₹30 லட்சம் வரை UPI மூலம் பரிவர்த்தனை செய்யும் சிறிய விற்பனையாளர்களுக்கு 0.4% MDR மூலம் மாதம் ₹2,000 முதல் ₹12,000 வரை கூடுதல் செலவு ஏற்படலாம் என கணக்கிடப்பட்டுள்ளது.
மேலும், நாடு முழுவதும் உள்ள சிறிய மொபைல் விற்பனையாளர்களுக்கு இந்தக் கட்டணம் மாதத்திற்கு சுமார் ₹40 கோடியும், ஆண்டுக்கு கிட்டத்தட்ட ₹500 கோடியும் கூடுதல் சுமையை ஏற்படுத்தும் என AIMRA மதிப்பிட்டுள்ளது. இவை சங்கம் முன்வைத்த கணக்கீடுகள்.
வாடிக்கையாளர்களிடம் MDR வசூலிக்கப்படுமா?
புதிய MDR-ஐ வாடிக்கையாளர்களிடம் நேரடியாக வசூலிக்கக் கூடாது என்பதே அரசின் நிலைப்பாடு. இந்தக் கட்டணம் வணிகர்களால் ஏற்கப்பட வேண்டும்.
NPCI-யின் விளக்கத்தின்படி, குறிப்பிட்ட UPI வணிகப் பரிவர்த்தனைகளுக்கு மட்டுமே MDR பொருந்தும். இதனால் வாடிக்கையாளர்கள் செலுத்தும் பொருளின் பட்டியல் விலையில் நேரடி மாற்றம் ஏற்படாது.
இதனால் அக்டோபர் 2-ம் தேதி மொபைல் கடைகளில் UPI ஏற்கப்படாத சூழல் ஏற்பட்டால், அன்றைய தினம் மொபைல் அல்லது ஆக்சஸரீஸ் வாங்கச் செல்லும் வாடிக்கையாளர்கள் பணம் அல்லது கார்டு போன்ற மாற்று கட்டண முறைகளைப் பயன்படுத்த வேண்டியிருக்கும்.
Also Read: செப். 28 முதல் வங்கி வேலைநிறுத்தம் இல்லை.. கடைசி நேர பேச்சுவார்த்தையில் முக்கிய முடிவு!
