சைவ சமய குரவர்களில் ஒருவரான மாணிக்கவாசகரால் அமைக்கப்பட்ட உலகப் புகழ்பெற்ற புதுக்கோட்டை மாவட்டம் ஆவுடையார்கோவில் (திருப்பெருந்துறை), தமிழர்களின் ஈடுஇணையற்ற கட்டிடக்கலை மற்றும் நுணுக்கமான சிற்பக்கலைக்குத் தலைசிறந்த சான்றாக விளங்கி வருகிறது. மனிதர்களால் இது சாத்தியமே இல்லை, வேற்று கிரகவாசிகளால் மட்டுமே செதுக்கப்பட்டிருக்க முடியும் என்று வெளிநாட்டினரையே வாய் பிளக்க வைத்த பிரம்மாண்ட வரலாற்றை தன்னுள் தாங்கி நிற்கிறது இத்திருத்தலம்.
இக்கோவிலில் உள்ள சிலைகள் அனைத்தும் உயிருள்ள மனிதர்களை போலவே மிக நுண்ணிய வேலைப்பாடுகளுடன் காட்சியளிக்கின்றன. இதனைப் பார்த்த ஆங்கிலேய அதிகாரிகளுக்கு இவை கல்லா அல்லது மரமா என்ற சந்தேகம் எழுந்துள்ளது. அச்சந்தேகத்தை தீர்த்துக்கொள்ள சிலைகளின் மீது அவர்கள் துப்பாக்கியால் சுட்டுப் பார்த்த குண்டு பாய்ந்த தழும்புகள் இன்றளவும் அங்குள்ள சிலைகளின் மேல் பகுதியில் தெளிவாக காணப்படுகின்றன.
சுமார் 10 அடி அகலமும் 15 அடி உயரமும் கொண்ட ஒரே பாறையில் குதிரை, வீரன் மற்றும் தூண் ஆகியவை செதுக்கப்பட்டிருப்பதுடன், நகங்கள், நரம்புகள், தசை மடிப்புகள் வரை மனித உடற்கூறு துல்லியமாக பதிக்கப்பட்டுள்ளது. மேலும், பெண் சிலைகளில் காற்றில் பறப்பது போன்ற சேலை முந்தானை கல்லில் வடிக்கப்பட்டிருப்பது சிற்பக்கலையின் உச்சமாகும்.
உருளை, சதுரம், முறுக்குக் கம்பி என 6 வகை கம்பிகளின் வடிவங்களை அக்காலத்திலேயே தமிழர்கள் கல்லில் வடித்துக் காட்டியுள்ளனர். பவுண்டேஷன் மற்றும் தாங்கு உத்தரங்கள் (Beams) ஏதுமின்றி, கற்களை ஒன்றோடு ஒன்று பிணைத்து பிரம்மாண்ட மண்டபங்கள் எழுப்பப்பட்டிருப்பது வியப்பின் எல்லை. மற்ற சிவாலயங்களைப் போலன்றி, நந்தி, கொடிமரம், பலிபீடம் இல்லாத ஒரே சிவன் கோவிலான இங்கு, இறைவனும் இறைவியும் உருவமில்லா அருவமாக வழிபடப்படுகின்றனர்.
